「你幾時炒阿恆呀？如果佢遞信你話我知喎！無條件畀佢即走，一個月通知都唔使！」未過試用期嘅我，同阿頭仲有幾個同事一齊同老細開會，傾完嘢之後老細無啦啦爆句咁嘅嘢，當時已經覺得好奇怪，因為成個department得阿恆唔使入嚟開會。
阿頭又答得有啲避忌：「唔好講衰嘢啦！嚇親新人呀！」佢口中嘅新人就係我，不過老細似乎唔想終結呢個話題，一邊行出會議室一邊講：「郁佢啦！呢條正一麻煩友，嗱，你肯落手，我肯賠足錢，諗諗啦！最好年尾炒，睇佢點搵工！」
咁毒？唔似講笑喎！不過講開又講，入嚟呢間公司冇耐已經覺得阿恆唔多尊重老細，因為有一次喺pantry同阿恆沖緊咖啡，老細忽然行入嚟斟水，作為員工自然反應都係叫一聲或者打個招呼，但阿恆冇咁做不特止，我仲見到佢斜眼睥一睥老細。
另外，由office行出去廁所要經一條走廊，嗰度容納到兩個人同時行過㗎啫，都幾窄，試過喺阿恆身後，睇住老細咁啱男廁出嚟，兩條友擦肩而過互相當對方透明，而老細經過完阿恆身邊望到我都有笑笑口，即係佢純粹無視阿恆啦，兩條友咩事不和到出晒面呀？
趁住有一日阿恆請假，當事人唔喺度咪八下囉，終於有個同事話我知，阿恆同老細曾經搞到好大件事，玩到報警call差人上嚟office，呢單嘢已經記入公司史冊。
「有次開會因為甩咗個大客，老細發火掟電話，重點係部電話係屬於阿恆。」
我：「阿恆做錯嘢？」
「唔係呀，唔關阿恆事，當時老細同阿恆都放咗部iPhone喺枱面，可能係型號一樣差唔多樣所以認錯啩，老細一拎起手就掟落地，成個mon碎晒！」
我：「但部機係阿恆㗎喎！」
「咪就係囉！阿恆無辜㗎，成單嘢九唔搭八，其實老細應該係嬲到想掟自己電話，或者求其搵啲嘢掟，但道火上晒頭，佢掟完都有呆一呆，明顯係知道掟錯啦！最無賴係老細扮冇事，起身嗰下仲拎返自己部電話行出房。」
我：「咁阿恆點呀？」
「阿恆都呆L咗，正常嘅，單嘢完全唔關自己事，然後坐隔籬無啦啦成部電話個mon碎咗，個人醒返嗰陣老細已經走埋，其實呢……我哋阿頭都有好大責任，因為佢叫阿恆唔好嗌老細賠。」
我：「咁點得呀？老細還老細，你整爛我私人財物都要負責任㗎喎，我唔知阿恆部iPhone係第幾代吖，平極都幾千蚊走唔甩啦！阿頭仲要唔畀佢問老細拎返錢？」
「阿頭想息事寧人，佢話自己出一半，淨返就我哋幾個同事夾錢，當係賠返畀阿恆喎！聽完之後輪到我呆喇！」
我：「你哋唔係夾錢呀？我一定唔會夾囉！關其他人咩事？」
「冇夾呀！阿頭都冇出一半，因為阿恆即時拒絕咗呢個提議，衝咗去搵老細理論，老細唔知係未嬲完單生意甩咗，定係唔肯喺咁多人面前認衰，夠膽死喝阿恆唔好搞事，cls阿恆都唔係搞事，問你拎返錢咋喎！即係有條痴漢非禮完個女仔，個女仔想討回公道但個痴漢話佢搞事，你話通唔通吖！」
原來當日阿恆死咬住老細唔放，仲話唔賠錢就報警，真係講得出做得到，打咗999，等待差人上嚟嗰陣，阿頭已經不斷做和事佬，但老細同阿恆各不相讓，大家都為啖氣（當然係阿恆有道理），後來差人咪又係分開同佢兩個傾，老細始終都要賠錢。
由於呢件事係老細做錯在先，炒人就上硬勞工處變無理解僱，同時亦唔敢郁阿恆，報警拉老細都夠膽，如果派大信封肯定有麻煩，跟住兩個人就積怨至今，老細話以後開會唔好叫阿恆入嚟，阿恆就睬你都傻，唔使開會仲happy，自己做自己嘢。
我：「阿恆咁唔妥老細，真係冇諗過唔做？」
「有，佢耐唔耐都出去見工，今日請假都係interview之嘛，但好似見極都冇下文，佢話唔會無啦啦裸辭咁戇居喎！一係就老細炒佢然後賠錢，一係就磨落去，反正個個月逗老細份糧佢好心涼，老細就唔想自己開口，周不時問阿頭會唔會炒阿恆，點炒呀？一來阿頭咩都想大事化小，二來阿恆都做得嘢㗎！」
我：「其實呢單嘢發生咗幾耐？」
「前年囉，我記得係2021年聖誕前，話咁快又差唔多兩年喇！」
痴線兩年前？走廊同pantry撞到都無視對方，同仇人冇分別，真係好佩服佢哋仲可以共事兩年，每星期見足5日喎！
對我嚟講，最大嘅感覺唔係老細有幾衰，亦唔係阿恆有幾硬淨，反而係覺得阿頭處理手法極差，想息事寧人都可以代下屬向老細傾賠償啫，有咩理由自己出錢，再叫部門同事一齊夾錢賠呀？如果佢當日做得好少少，而家個局面可能唔會咁僵。(完)