我係問意見為主，想知道大家如果遇到咁樣嘅老細，會唔會選擇繼續做落去？我份工係做私人秘書，需要幫老細處理公事同埋一啲私人事務，其實唔算忙，亦唔算複雜，最大問題係老細嘅性格好躁，做錯嘢畀人鬧就話冇得怨，但係估唔中老細嘅心意而被鬧，咁樣真係好無辜，雖然話跟官咁耐點會唔知官姓乜，不過我始終唔係佢肚裡面條蟲吖嘛！
有次幫佢book位食飯，咁佢傾生意，book個卡位好合理吖，點知佢當日去到餐廳打嚟鬧我，話個卡位係對住個窗，正午曬到應一應，成餐飯都好熱好辛苦，又話lunch time好爆冇得換位，咁樣好難同個客傾嘢……間餐廳係你指定嘅，我跟足指示要卡位，又唔係去實地考察，咁都特登打返嚟公司鬧我？
又有一次我拎文件入房畀佢簽，老細粒聲唔出淨係指住自己個太陽穴，我心諗咩事呀？跟住佢就開口鬧喇：「用下個腦啦！見唔到我做緊其他嘢呀？擺低就出去，我得閒會簽，碌柒咁企喺度等運到咩！死出去啦！」
使唔使咁呀？其實我冇叫佢即刻簽，都係正常咁樣入房、擺低，一句嘢都未講，亦冇企喺側邊畀壓力，轉身行返出去都要時間啦，又叫我用腦又叫我死出去……
有時我會同佢出去一齊見client同食飯，老細真係會當住人哋面前鬧我：「喂！你醒少少吖！」大家估下係咩事？
老細話我應該醒少少拎紙巾出嚟派畀佢同個客，ok，咁我咪拎囉，一路拎仲要一路畀佢鬧：「好奇怪㗎喎你！食飯唔使抹嘴㗎？即係你食嘢食到污糟咗就由鳩佢？個嘴油淋淋咁係咪？」
其實可唔可以好聲好氣咁問：「你有冇紙巾呀？」咁咪得囉！有需要話我奇怪同埋喺個客面前講句夾雜粗口嘅字咩？
當然佢都用過更勁嘅粗口鬧我，有次駁條線入房畀佢聽電話，唔知點解佢一聽就cut咗線，然後佢衝出房當住全office好大聲鬧：「屌你係咪低能㗎！駁條線都搞唔撚掂？聽完又冇聲！想點撚樣呀？」
突然咁大聲鬧我低能，成個office嘅人都擰晒過嚟，最諷刺係個客幾分鐘之後call back，同我講頭先因為收到好差所以斷線。
呢次我hold住條線直接行入房叫老細聽啦，順便講句頭先係對方斷線，老細冇覺得唔好意思不特止，仲要好凶狠咁恕睥我……
仲有一次老細喺office行過踩到我，再強調一次，我係企定定喺度，佢踩到我，然後老細咁鬧：「屌！碌葛咁，阻撚住晒！」
畀你踩仲要畀你鬧，都未及反應，老細邊行邊擰過嚟再鬧：「你企喺路中心擺pose呀？行撚開唔好阻住條路啦！」
印象最深一次佢鬧到我喊，有個client去我哋公司，臨走同老細一齊送佢出office門口，然後個client隨口講咗自己未來三個月行程，咩22號去美國，返嚟香港兩個星期又再飛台灣，又唔知幾多號台灣飛韓國，同日晏晝老細問返我個client幾多號飛邊度，幾多號去台灣，幾多號去韓國，我點記得晒呀？對方都係忽然講，我份工又唔係有支錄音筆，當時送緊人走又冇紙同筆mark低，對方都講到好跳好亂，最多咪之後幫你打去問多次囉！
老細：「你多歲呀？廿鳩幾歲女咁冇記性嘅？唔好成日發夢戇鳩鳩咁啦！而家問你嘢又好似傻hi咁唔識答，屌你老味真係柒撚到喊！」
好多次徘徊喺辭職嘅邊緣，雖然話份糧係包埋畀老細鬧，但都會覺得難受，而導致我留低嘅當然係錢啦！因為呢個老細好跳，情緒高低起伏好大， 可以噚日問候我娘親，跟住隔一日突然話加薪，就係上次佢話我傻hi之後，加咗4000蚊人工畀我，4000唔係400，個幅度好大。
咁佢鬧完我又加薪係咪一種心理補償呢？我自己都唔肯定，因為老細根本係一個唔按章法出牌嘅人，有時唔發脾氣佢會對我好好，例如新年嘅時候，佢會無啦啦拎袋冬蟲夏草同海參乾鮑畀我，叫我拎返去送畀屋企人做節，真心啲嘢係好貴，咁我當然知道呢筆錢對老細嚟講係碎銀啦！
又有一次佢見到我部iPhone爆咗mon（仲用得），第二日佢送咗部最新嘅iPhone畀我，以上嘅嘢都係其他同事冇，你可以話因為我係佢私人秘書，亦可以話加薪、冬蟲夏草、iPhone講到底都係用錢堆砌，但無可否認佢真係畀咗呢啲待遇我，世界上好多老細都有錢，但唔一定會豪畀員工。
收到禮物又加人工梗係開心，不過畀佢鬧完之後點都會好猶疑應唔應該繼續留低，令我感到意外嘅係，父母竟然叫我唔好再做，覺得唔應該同個脾氣咁暴躁又用粗口問候員工嘅人共事，反而我同輩啲朋友就叫我唔好走，嗌我訓練自己畀人問候當唱歌，始終要睇錢份上，所以我先至咁矛盾。
打呢篇文嘅當日，我又畀老細鬧喇，話說佢行出房唔知做乜，我嗰陣企咗起身執緊啲file，老細冇原因之下睥我，丟低一句：「坐撚返低啦你，企起身做乜鳩嘢呀！」
我咩都冇做，喺自己個位執file咋喎，咁都得罪你？
講多個point，我份糧係高於市價，因為老細次次都係大手加薪，綜合以上一切一切，如果發生喺你身上會唔會繼續做呢份工？
【最高1万円放題🎉】老闆出錢 池袋扭蛋夾公仔 日本女生加分🥰 夾娃娃高手
