坦白講，呢單嘢係個Project Manager唔啱在先，但係而家啲新一代又可以處理得好少少嘅……
事緣公司請人，我同個Project Manager一齊見個求職者，由於呢位後生仔嘅resume有個長達一年嘅gap，所以Project Manager問佢：「你呢一年冇做嘢係咩事？一路keep住搵工定點樣？」
嗰位見工嘅後生仔就答：「嗰段時間因為我爸爸有病，照顧佢之餘，亦都陪佢行埋最後一段路。」
Project Manager：「唔……屋企咁多長輩，可能隨住佢哋年紀愈大，我哋就愈多機會去面對呢啲問題，如果將來有呢種情況發生，你都會選擇暫時離開工作崗位？例如辭職或者唔做嘢一段時間？」
個後生仔好搶口：「咁你父母之前死嘅時候又係點處理？」
Project Manager面色一沉：「我問下你會點面對啫，唔使咒我屋企人嘅，我父母仲健在。」
後生仔：「哦，唔好意思，咁將來呢？隨住年紀愈大，你父母都有病同埋死嘅一日㗎，你會點處理吖？」
最後個interview不歡而散，我作為HR同埋當時坐喺側邊嘅旁觀者，的確認為Project Manager可以修飾下個問題，即係問得有技巧啲，或者佢傳達唔到個意思，變相令求職者聽落唔舒服，但而家嘅新一代又可唔可以多少少EQ呢？例如佢反問Project Manager父母之前死嘅時候點處理，點會無啦啦假設人哋父母唔喺度㗎？咁樣真係有欠尊重。
如果呢位後生仔有EQ，又答得有IQ，可能成個interview嘅結局都會改寫。
－－－－－
《辦公室日報》聶瞳：通常投稿我好少畀意思，不過今次例外，首先個後生仔應該唔會想改寫interview嘅結局，若然有得改寫，佢只會選擇唔send CV去你公司，另外就係後生仔反問嘅問題……喂，係你哋個Project Manager自己申請㗎喎！人哋都係請教你會點處理啫！