「喂，你哋做咩唔覆阿姐msg呀？搵個人覆下佢啦！」同事喺一個圍內嘅WhatsApp group send msg嚟，因為阿姐喺大group嘅msg冇人reply，呢位同事再補充多句：「上個msg我覆㗎，下下得我回，你哋係咁易應下機啦，回個emoji都好吖！」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
回個emoji冇問題，問題係阿姐上一個msg咪就係emoji囉，阿姐打咗個「☺️」，請問我哋仲要覆咩呀？
以上係我一年前啱啱入呢間公司做嘅疑問，做耐咗之後就知道咩事喇，因為我哋個阿姐好憎做「留言終結者」！唔明我講乜？假設阿姐喺大group最後嘅msg係一個問題，例如：「陳生單嘢跟咗未呀？」咁我哋一定要reply㗎喇，不過就算阿姐最後嘅msg係一個總結，甚至係得一個emoji，我哋同樣要覆「知道」、「冇問題」、「ok」，又或者係求其覆返個emoji，總之唔可以畀阿姐嘅msg係最後一個留言，如果佢成為咗「留言終結者」會嬲㗎！
有一次唔記得咗係星期六定星期日，總之係放假啦！可能同事們都出咗去玩啦，所以阿姐send咗句：「嘩！今日咁熱嘅！」去大group之後，大家都冇意識去reply，始終呢條唔係問題，又唔係講公事，點知阿姐隔咗陣就發癲喇，佢連續打咗以下幾個msg：
「有冇禮貌㗎你哋？」
「講嘢冇人覆嘅，呢個group仲需唔需要？」
「😡😡」
同樣嘅事見過好多次，我亦參考過班同事係點處理，有次阿姐夜晚send咗呢句msg去大group：「勁潮濕！」
放咗工我唔理你濕定係乾啦，不過我就見到其他人咁樣reply…..
A同事：「係囉」
B同事：「😥」
C同事：「🤷🏻♂️」
仲有，阿姐會對一啲好簡單嘅msg有自己嘅讀解，有次我覆咗「okok」，跟住就畀佢喺個group度話我：「你而家係咪唔耐煩呀？ok咪得囉，咩okok？即係得啦得啦咁呀？你都幾晦氣喎！」
咩事呀？okok即係晦氣咩？我冇呢個意思囉！
同事已經私底下傾過好多次，阿姐唔鍾意做「留言終結者」，就連emoji都要人reply先覺得受尊重，係因為佢份人好要面、自尊心太強、自卑、小器、天生敏感，當然最重要係心理變態啦！
然後我哋department早排嚟咗個新同事叫Daisy，佢嘅性格比較我行我素，有提過阿姐好怕做「留言終結者」呢件事，但Daisy都係唔會喺辦公時間以外回覆阿姐msg，正確嚟講，離開咗office佢係完全唔會覆大group任何msg。
有次Daisy自己出去食lunch，阿姐趁呢個新人唔喺度就向我哋投訴同抱怨：「你哋覺唔覺Daisy好冇禮貌呀，佢好似對份工好唔投入。」
我哋幾個同事都話唔覺，唔係想保住Daisy，而係日常工作方面，Daisy真係冇問題，作為一個新人更加係幾爽，啲嘢教一次就明，又唔使同佢執手尾，好難得㗎喇！
原來講到尾，阿姐係唔滿意加咗Daisy入WhatsApp大group之後，呢個新人從來唔回覆msg，好似隱咗形咁。
計先後次序，我早Daisy一年入嚟，其實我都唔認同阿姐逼人覆msg嘅要求，不過受到其他做得更耐嘅同事灌輸咗一種概念，就係多一事不如少一事，唔覆阿姐會仲麻煩，搵食啫，大家當阿姐傻仔咁hea覆囉！
問心講句，邊個會鍾意星期六日放假同阿姐msg吖，嗰啲咩好熱好潮濕嘅msg，阿姐留返同佢自己啲朋友講啦，雖然我哋都想像到佢冇朋友……
有個同事就咁形容：「可憐下佢啦，覆個emoji都係一秒啫！」
Daisy呢個新人就偏偏唔賣帳，早兩個星期阿姐終於忍唔住開Daisy波，直接喺大group詐型：「原來呢個世界真係會有人全日都唔覆msg，@Daisy你好忙咩？少少時間都冇呀？」
癲到……阿姐仲要走去tag Daisy作答。
唔知關唔關個tag事，呢次Daisy覆得好快：「唔係冇時間回msg，係冇精力回msg。」
我哋都睇到呆咗，不過呢場戰事未完。
阿姐真係太得閒，佢覆Daisy仲快：「今日唔使返工？點解冇精力回？」
Daisy：「因為你消耗緊我精力。」嘩！型到！
我哋見到Daisy咁樣答阿姐，今次真係唔敢插嘴喇，連emoji都冇回，但阿姐亦出奇地冇再send msg出嚟，呢個round變咗Daisy成為「留言終結者」，成個大group靜晒。
如無意外，阿姐應該唔會畀Daisy過試用期，但原來世界真係有意外，因為Daisy遞信先，自己唔撈，佢同我哋講已經有另一個offer。
Daisy喺呢間公司嘅時間好短，夾夾埋埋兩個月都冇，但係Daisy嘅貢獻好大，阿姐唔知係受咗重大打擊定係覺得好瘀，已經好耐冇喺大group send msg出嚟，冇再講任何廢話，所以截至呢一刻為止，大group最後一個msg仲係Daisy嗰句：「因為你消耗緊我精力。」
而家星期六日同放假都好清靜，多謝Daisy呢三句msg：「唔係冇時間回msg，係冇精力回msg，因為你消耗緊我精力。」
日本上船睇煙花🎇1万5千発東京足立花火大會🎆｜公司旅行同事前一晚想甩底😲｜花火船形屋幾錢位💰｜足立の花火大混亂👮🏻♀️
