雖然只係11月，但其實有好多公司已經一早揀定咗，甚至係提早book好晒啲春茗同Annual dinner場地，最近就有個friend向我炫耀佢公司book咗ICC某酒店嘅米芝蓮中菜，但我完全唔會羨慕，仲好自豪咁同佢講：「冇book呀，我哋年年都唔搞飯局㗎！」
個friend聽完好驚訝，佢話平時唔搞gathering冇問題，但未聽過啲公司連Annual dinner都冇，仲講笑話我老細好孤寒。其實好難怪佢會咁諗，曾經同身邊其他人講，無論係男朋友定係阿爸阿媽都覺得堂堂一間公司冇春茗冇Annual dinner係好小家嘅行為，我個人就唔係咁睇，因為老細唔搞，但會折現派錢。
以前我公司係搞嘅，仲搞到好大添！不過自從舊老細退休交畀個仔接手，情況就改變咗喇！
首先個太子爺係好典型嘅I人，佢社唔社恐我唔知，但性格就一定內斂，同事好早就意識到太子爺成日喺公司「避」同事，例如可以唔出席嘅會就一定唔會出席，有時直頭講好咗開會都放飛機，疫情嗰幾年咪好興work from home同埋開視像嘅，公事通常開鏡頭㗎嘛，特別係同客傾嘢，多多少少涉及職場禮儀，不過太子爺永遠係唯一一個唔開鏡頭嘅人。
過往公司會搞「每月之星」，即係幫嗰個月生日嘅同事慶祝，太子爺生日嗰個月佢會避開，一到lunch time就走，同埋初期公司係有gathering同埋其他節日飯局，而太子爺一樣例不出席。
佢唔係憎啲同事，你feel到佢份人好nice好易話為，但太子爺就係唔鍾意同人接觸，有同事見過佢拎埋部MacBook落停車場，成日匿喺自己架車裡面做嘢，真係與世隔絕咁款，所以佢並唔係唔理公事㗎！
好多人誤會I人特質係冇朋友、唔鍾意講嘢，或者溝通能力有問題，但其實唔係，太子爺好明顯係揀人，佢覺得可以傾得deep嘅人先會多溝通，我公司有個男同事就同佢啱嘴型，而嗰個男同事並唔係咩高級職員。
後來有一年舊老細真係放晒手唔理公司嘢，連office都唔再返嚟巡，又適逢嗰一年臨近搞春茗同Annual dinner嘅時候，負責開嘅Admin女同事請咗產假，所以一時之間未協調搵邊個follow，跟住就收到個消息係太子爺想唔搞。
起初聽到我咪同其他人感覺一樣囉！嘩！乜咁孤寒呀！舊老細一走就cut budget？點知唔係，太子爺叫相關同事出咗張通告，話公司唔搞Annual dinner喇，改為每個同事發放HKD 1,200蚊現金！
HKD 1,200係點計出嚟呢？據講就係本來book場，除返開每圍枱每個人平均呢個budget，佢將呢啲預算套現cash派畀我哋。
以前舊老細會偶爾出席部門嘅gathering活動，其實都係亮一亮相，埋咗張單就走，唔會玩到尾，後來太子爺接手就亮相都廢事，佢每月批咗一個gathering預算出嚟，好似我個department咁，大部分人都結咗婚有小朋友，放咗工得鬼閒同你happy hour食飯咩！有時間返屋企湊仔啦！
結果阿姐就將公司畀嘅gathering預算平均派畀我哋，雖然每個月得幾嚿水，但梗係收cash好過出去應酬同事啦！返工又係呢班人，放工又係呢班人，見同事仲多過見屋企人，其實有咩咪office傾囉！
行呢啲政策嘅時候仲未有疫情，後來再遇埋疫情，取消晒所有公司飯局就變得更理所當然，所以直至而家2024年，公司一直都係冇咩Christmas Party同Annual Dinner，我真心覺得正！
聖誕冇party，每個員工有$800折現，開年飯因為以往係lunch去飲餐茶，budget唔算多，但每人都會分返$500 cash，未計開工利是，其實太子爺係畀足錢，佢冇慳，只係唔鍾意應酬，唔鍾意搞群體活動。
至於Annual dinner就仍然係派緊$1,200，總之全部折現。
又唔係個個都buy㗎！特別係一眾老臣子，佢哋覺得太子爺唔似樣，冇舊老細咁有凝聚力喎！車！間公司都唔係你哋班老臣子嘅，太子爺鍾意點就點啦，反正我就好enjoy收現金，唔使出席咁多活動仲唔使煩，多返私人時間。