猶疑緊係咪唔做，因為份新工返咗幾日之後，個老細叫我改名，原因係我叫Ken，而公司已經有另一個同事叫Ken，諗極都唔明點解一山不能藏二Ken，撞名好平常啫，何況大家個姓都唔一樣，有咩抵觸呢？咁嗰啲叫Carmen, Ricky, Peter, Paul, Mary嘅人點算？公司英文名都要先到先得？
因為我話唔改，老細就提議我加個Junior喺Ken後面 ，佢話Junior係講緊年紀比較細嗰個喎，佢唔想office有兩個人叫Ken會混淆，大佬呀！你有認知障礙症㗎？多一個人叫Ken就混淆，你出面啲friend唔會撞名？啲客唔會撞名？如果我叫阿Joe，係咪可以直接叫Joe Junior？
唔知係咪因為老細嘅緣故，公司裡面有幾個同事啲英文名都好怪，有個做高層嘅男人叫Cancel，你冇睇錯，我都冇串錯，所以最初聽到人叫佢Cancel，我仲以為要取消啲咩？吖！原來唔係，佢英文名真係叫Cancel，好想了解下佢嘅心路歷程，點解當時要改呢個名呢？佢有冇兄弟姊妹叫Confirm呢？
然後有個阿姐（又係高層）叫Hermès，佢張卡片個e字上面真係有一點，其實叫咩名係人哋嘅事，但係佢煩到人吖嘛，我返咗幾日工已經見佢兩三次糾正人哋讀法，係咁教人讀咩「M Mess」(聽到佢大約讀咁上下音），又好似show off咁話畀人聽呢個名唔係出自英國，唔應該跟英文讀音，煩唔煩呀你？得啦！知你鍾意Hermès喇！
另外有個男同事叫Chu B，頂你個肺我打出嚟都想笑，最初以為係嗰個Chubb嘅牌子，又唔係呀！佢的確係叫Chu B呀！三十幾歲男人，日日聽到啲同事叫佢豬B！豬B！喂你想點啫？係咪有咩可歌可泣嘅典故呀？呢啲名留畀你條女私底下嗌啦！你條女係咪叫Angela Baby呀？
有個男同事嘅英文名就叫Takehiro……想點L樣？
因為工作上我係要同呢位Takehiro接觸，所以我問過坐旁邊嘅同事：「日本人？」
「唔係呀，佢香港人嚟㗎！」
我：「咁點讀？Take Hi 羅？」
「好似唔係，啲日文名嘅英文唔係照我哋讀開咁㗎，Daiso個so都唔係讀so啦，佢哋讀傻，Dai傻，大傻大傻！」
我：「唔好講Dai傻住，咁呢個T-a-k-e-h-i-r-o點讀？其實佢點解要改自己個英文名做日文英文呢？又唔係日本人！」
「佢好祟日㗎！條友咩都覺得日本好，試過有其他人講日本某啲嘢好落後，佢無端端反面鬧人，佢個世界日本係冇壞人，日本監獄啲囚犯一定全部係中國人，你唔好讀錯喇，打個招呼擺低個file就算，最多點下頭，唔使讀佢個名啦！」
你話呢間公司啲人幾咁奇怪，改個名又介意人讀錯，人人老奉要識日文咩大哥！
我上司英文名叫Dream，男人嚟，唔係話唔得，但係柒囉……好想知外國人如果聽到你叫Dream會覺得點，係咪代表呢個人好正面好積極好有理想？
呢度仲有個同事叫SWS，點讀？照讀喎……因為佢係Admin，返工第二日我要補少少資料畀佢，我上司阿Dream話：「你拎去畀SWS吖！幫你簽咗名㗎喇！」
我：「咩名話？」
「SWS，長頭髮戴眼鏡嗰個呀！」
唔係問你邊個呀，我係想搞清楚佢個名呀？原來真係就咁讀晒三個英文SWS，我又係新人唔敢問因由，總之就冇個正常。
有冇人叫中文名呀？有！隔籬team個阿姐叫娃娃，冇50都肯定4到尾，娃娃娃娃咁叫你真係好難叫得出口，聽到有啲人嗌佢又唔係叫娃娃㗎喎，我上司就叫佢「華娃」，咁即係娃娃定華娃呀？好在我同佢唔同層次唔需要接觸，我寧願叫人做SWS都唔想叫佢做娃娃，打冷震呀！
呢度仲有個同事係叫「掗拃」，我大約估到點解，因為佢好大隻、好高，相信係因為身型問題，所以大家都叫佢掗拃，而我作為新人最初係唔敢叫佢花名，不過返工第三日佢先走嚟問我叫咩名，然後就介紹自己叫「掗拃」，ok，你想我咁叫就咁叫啦！
老細想我改名做Ken Junior之後，我有考慮過唔做，而家仲十五十六，做藝人或者做幕前就話要改個易記嘅名啫，但我返份文職工咋喎！冇觀眾冇歌迷㗎！
最好笑係我女朋友提議玩大佢，叫我改個再爆啲嘅英文名或者中文名，反正大家啲名都咁癲，唔應該得我一個人覺得唔好意思，最正路嘅做法係改一個佢哋嗌出口都覺得尷尬嘅名……有冇咩idea畀我？
【最高1万円放題🎉】老闆出錢 池袋扭蛋夾公仔
