西客何其多
男歡女愛嘅嘢唔係齋睇外表，仲要視乎好多嘢，例如夾唔夾啦、有冇內在美啦、談吐舉止啦……
之前有個肥哥哥嚟join 1 vs 1，安排第一個女會員同佢食飯，返嚟嘅feedback係佢嫌人太肥，我中立講句，個女仔真係一啲都唔肥，反而肥哥哥就似有咗6個月身孕，所以由佢把口講出嚟特別冇說服力。
好啦，安排第二個女會員同佢食飯之後，佢又嫌人哋唔夠靚，再介紹埋第三個，佢嫌人哋著衫唔好睇。講樣嘢你知吖，肥哥哥第一次上嚟，其實係著住件皇家馬德里波衫，配條金利來皮帶加背囊（孭晒兩邊），再攝件波衫落條吊腳西褲度，肚腩亦因為攝衫而顯得格外澎湃。
做人有要求係好，不過你彈人嗰啲嘢，自己唔單止冇，仲要係一個大反差，好牽強啫！唔怪得我老細話唔做你生意㗎喎！
搵另一半唔好只睇對方嘅外表，都要睇下自己嘅外表㗎……為你好咋肥哥哥。