回想起當年見呢份工，喺葵興工廠區，上到去第一個感覺係畀人呃，因為間公司一個人都冇，呀唔係，應該係得一個老闆。
個office唔大，約莫坐到8個人，好乾淨好整齊，完全冇任何工作嘅痕跡，似係新成立，唔上都上咗嚟，咪照in囉！
「你介唔介意喺屋企做嘢唔返公司㗎？」個老闆第一句就咁問，令我有啲不安，當年仲未出現疫情，work from home嘅風氣冇後來咁普及。
我冇答佢，因為我認為係騙案，你sell倫敦金？扮請文職然後叫我做保險？定係約咗求職者上嚟先話做傳銷？我腦海只有呢幾個猜測。
然後個老闆繼續講：「其實返工好嘥時間。」
隔咗太耐，依稀記得自己講咗句類似嘅說話：「咁你又出廣告請人？」
老闆：「我意思唔係打工做嘢嘥時間，係你返嚟公司好嘥時間，你計下，9點鐘開工，當7:30起身好未？刷牙洗面換衫呢樣嗰樣，你係女仔仲要化妝，搭車返工預半個鐘至一個鐘，入到嚟公司實未回魂㗎啦！食下早餐呀，同同事傾下計呀，10點鐘開工未？10點算好有效率，一陣又去廁所屙下屎屙下尿，搞呢搞路，10點幾都未正式投入工作……」
相隔太多年，佢發表嘅「偉論」已經唔係好記得，大約都係指返office好嘥時間。
後來我終於攝到位插嘴：「咁唔返公司點做嘢呀？」
老闆：「我哋又冇客會上嚟，有咩咪電郵呀，上網呀，電話呀咁囉！唔一定要棟個人喺公司㗎！如果今日唔係約你見工，我寧願留喺屋企瞓到9點，刷完牙開電腦就直接做嘢喇！」
結果佢真係請咗我，印象中老豆老母叫我唔好做呢份工，話覺得係呃人喎！嗰陣我都覺，但我冇得揀，因為都搵咗工一段時間。點知做落又真係好似老闆咁講，全部人唔使返公司做嘢，偶爾開會或者傾嘢先至返office，平均一個月3至4次，其餘時間就email同電話溝通。
而家做咗差唔多8年，呢份工搞到我返唔到轉頭，人工絕對唔高，不過自由度極大，你叫我出去搵其他工肯定適應唔到。我而家真係做到9點開工，6點收工已經喺屋企，間唔中仍然覺得份工唔真實，但個個月準時出糧，睇到e-banking條數又真實返！
還好呢個老闆係典型唔睇過程，只睇結果嘅人，例如佢吩咐你星期三之前做好一件事，只要你準時交貨就得㗎喇，佢唔會理你星期一同星期二點樣做，呢種開放式管理係唔錯㗎！呢幾年公司都有走過兩三個人，一個係唔自律被炒，嗰條友又真係過份嘅，搵多咗份全職，以致公司一個月開三四次會都出席唔到，另一個就轉咗行去做政府工，仲有一個因為唔熟，我唔知佢點解走。
除非執笠啦，否則我唔會自己走，公司嘅規模同業務唔會賺到大錢，客戶來來去去都係嗰啲，暫時都好穩陣。