成日聽人講同事黐順風車坐，搞到自己好煩惱，傻㗎咩！兩三下手勢就KO啦！
事件起源係一次公司gathering，有條蛋散同另一位女同事講：「你住屯門呀？跟Simon車啦！佢住新墟㗎！」
因為有老細同好多高層在場，我忍住唔爆粗，一條唔關事嘅蛋散代我決定要車邊個？呢單嘢我遲啲先同條蛋散計！問題係個女同事聽完之後好開心：「真㗎？你住新墟㗎？我住市中心呀，你附近咋！以後可以跟你車返工放工。」
成年人喇，唔想當場反枱咁失禮，車咗佢返去先，到達屯市放低佢嗰陣，呢位女同事老實不客氣叫我第二日車佢返工。
得！冇問題！第二朝我準時出現，然後呢位女同事竟然遲到10分鐘，佢話遲咗起身化緊妝……當我係你條仔定Uber司機？
呢啲小枝節唔緊要啦，因為好肯定佢聽日唔會再坐我車。
車佢返公司途中，我扮吞吐咁問呢位女同事：「Elsa，有冇兩萬蚊借住嚟先？」
「兩萬？咩事呀？」
我：「急用呀，借住嚟先吖，分期還畀你。」
「我唔知有冇喎……」
我：「咁大個人兩萬蚊都冇？我分10期還畀你，每逢月尾還2000，ok？」
「咩咁大個人兩萬都冇呀？你都冇啦！」
我：「點同呢！我噚晚輸波吖嘛，萬五吖，萬五都得！有冇萬五？」
「……你畀我考慮下先。」
跟住呢程車就靜過太空，我冇講嘢，佢又唔敢講嘢 
同日喺pantry見到呢位女同事斟水，我特登行埋去細細聲講：「萬五有冇啫？信我啦！一定還畀你！今晚車你返去嗰陣撳畀我吖，真係好趕呀！」
「放工先算啦！我可能要OT！」
竟然用OT嚟迴避！我梗係整多個三連擊佢嘆啦，搭正6點我又走去問呢位女同事：「考慮成點？車你返屯門吖，邊行邊講，你HSBC定渣打？我睇下邊度停車。」
「我未走得呀，唔使車我喇！」
我：「聽朝聽朝，聽朝車埋你ok？」
然後呢位女同事話出門時間同我唔夾，聽朝都係自己搭車喎～～笑咗！
我同老婆講呢單嘢，老婆擔心個女同事周圍唱我要借錢，影響我名聲，但我冇乜所謂，完全唔care，淨係想一個人開開心心揸車返工，唔想以後要車個唔熟嘅同事，令我嗰少少me time都冇埋。