坦白講，我唔係幾鍾意隔籬部門一位女同事，但係早兩日聽到佢畀人炒嘅原因，內心都有啲百感交集。點解唔鍾意佢呢？試過搭埋同一部電梯，我入去先，撳完樓層，本能反應當然係企入啲，唔好阻住其他人啦！跟住呢位女同事入埋電梯，企正喺電梯掣前面，但又唔撳閂門，喂！想點呀？
冇理由大家齋等時間吖！咁我咪行返上前撳閂門掣囉！因為呢種情況都發生過兩三次，就算有大廈其他人在場都係一樣，呢位女同事次次都等到自動閂，撳個掣啫！如果你唔想撳咪唔好企正前面囉！我都見到有其他人「睥」佢，真心唔明呢種係咩心態。
又有一次，我去完洗手間返入office，do完張staff卡就拉門啦，呢位女同事行路冇聲，唔知邊度走出嚟，趁我拉門時箭步攝入office，搞到我都差啲撞埋去。真係好典型香港人呀！有冇試過平時去商場嗰啲地方，有種人係永遠唔會自己拉門或者推門，你拉，佢就要過先，好似你職責係幫佢開門咁。
我初初係覺得佢怕蝕底，始終呢位女同事唔係嚟咗好耐，兩個月都唔知有冇，加上唔係同一個部門呢，所以我同佢完全唔熟，但早兩日得悉佢過唔到試用期，提早畀人叫離開，而且原因竟然係因為有潔癖，咁我諗返唔撳電梯掣同埋唔肯拉門嘅事，串連埋終於知佢點解會咁喇！
其實有潔癖而過唔到試用期……我真係未聽過，不過聽隔籬部門講，大家並唔係討厭佢有潔癖，而係平日好多行為都令人側目。據講呢位女同事每日都會用滴露抹張枱3至5次，本來咁樣係個人衛生問題，但你知滴露嘅氣味都強烈㗎嘛，仲要一日抹咁多次。
佢仲有自備消毒噴霧，無厘頭開開下工會向住自己個位同埋附近狂噴，有同事話擺喺枱面杯咖啡「中晒」，無可奈何之下要去買杯蓋，另外自己嘅頭髮呀、衫呀、枱面嘅文件呀，全部都係keep住濕濕咁，就係因為個女同事向住個天噴好多消毒噴霧。
有人拎file畀佢，佢一粒聲都唔出，慢條斯理拎張紙巾包住自己隻手接份文件，換轉係你會有咩感受？呢位女同事有時仲會態度麻麻咁同人講：「放低！放低！」跟住再搵紙巾隔住拎起，係兩隻手指夾起好似驚中毒咁，其實都幾誇張，或者出發點係潔癖所致，但語氣同行為就令人好唔舒服。
之前Admin仲喺pantry發現佢斟水之前，用張消毒濕紙巾直接抹水機個出水口，唔係機身，係出水口，Admin叫佢唔好咁，因為有酒精成份，會搞到其他同事每次斟水都混合咗酒精，坦白講你自己有潔癖冇問題，但所作所為已經影響咗身邊嘅人，某程度上係好自私嘅表現。
呢位同事又試過去printer影印，自己唔揭開個蓋，叫嗰啲坐printer附近嘅人幫佢揭開，怕污糟喎！咁梗係畀人投訴啦！printer附近嗰個部門嘅Manager仲嬲到開晒聲：「你隻手跛㗎？我啲下屬有嘢做㗎！換紙又叫佢哋，揭個影印機蓋又叫佢哋，你係公主呀？」
我嘅遭遇亦有人經歷過，某日reception姐姐行開咗，呢位女同事就企定定喺office外面，reception姐姐返嚟見到以為佢冇帶staff card啦！已經撳埋掣畀佢入㗎喇，但佢依然原地不動，reception姐姐連番示意都冇反應，唔知咩事咪行出去拉門畀佢囉，然後呢位女同事箭步標入office，原來係唔想自己拉門，唔想接觸個門柄！
最後佢部門主管忍無可忍，趁未過試用期直接同佢講唔適合，即日可以離開，而最好笑係咩呢，當個主管叫佢入會議室派大信封嘅時候，呢位女同事用消毒濕紙巾抹完張電腦椅先坐低，據講都抹咗成分幾鐘，跟住未完，佢喺衫袋拎個口罩出嚟戴住，再用紙巾遮住個口罩講嘢，即係好似古代啲女人拎住條絲巾講嘢咁樣。
主管問佢係咪覺得公司好污糟，呢位女同事冇正面回應，但對於被解僱又冇特別反應，臨走嘅時候仲叫主管幫佢拉門，又叫主管幫佢撳電梯掣……
我聽完之後問個主管：「咁你有冇幫佢拉門同埋撳電梯呀？」
「有呀，我怕咗佢，想佢快啲走，費事佢企定定喺公司門口唔郁，我唔介意你有潔癖，但潔癖到咁樣就唔適合喺度做，影響埋人哋。」
我：「其實你請佢嘅時候，interview唔係已經睇得出咩？咁你又請？」
「佢interview正常㗎！起碼冇用成分鐘抹電腦椅，都冇戴口罩，唔知搞咩返咗工之後會咁樣。」
我講笑話呢位主管可能係今日口臭，不過對於嗰位女同事……我都唔知點講，其實有潔癖的確唔係罪，但電梯掣唔撳，office度門唔肯自己推，呢啲行為就真係令好多人反感。
【🇯🇵澀谷試伏】東京居酒屋 臭襪味餃子🥟2.5星平均分 日本涉谷橫丁
