同事辭咗職大鬧office，原因係佢間新公司突然cancel咗個offer，所以想收返封辭職信，問題係我哋已經in咗同埋請咗人，新人下星期就會返工。
呢位同事連日來拍枱拍凳發晒脾氣，仲對住我哋阿頭發爛渣：「你係咪咁呀？我做咗5年，即係識咗你5年，個新人都係interview見咗一面啫！一來你唔知佢做嘢係咪得，二來我跟咗你咁耐，你冇人情味㗎？」
其實阿頭已經沉住氣回應：「唔係人情味嘅問題，己所不欲勿施於人，你間新公司突然cancel offer，搞到你雞無鴨血，如果我哋又cancel個offer叫新人唔好返工，行為上咪同你間新公司一樣，都係咁不負責任囉！」
同事：「咁你同個新人本身冇交情，你唔使理佢㗎喎！我同你識㗎嘛！你唔諗下我有幾慘？」
呢幾日個同事就係咁樣吵吵鬧鬧，完全冇做嘢，仲嘗試拉攏我哋其他人一齊反阿頭，迫阿頭留用佢，所以真係好煩。
噚日呢位同事又將無賴指數升級，佢同阿頭講：「我唔理呀！總之我最低限度做到搵到新工為止，我唔留冇問題，做到搵到新工囉！」
阿頭個格真係太斯文，聽到佢咁講都係回應一句：「好嚟好去，唔好搞呢啲嘢啦！」
老細應該聽完阿頭講件事，臨放工前直接行出嚟問嗰位同事：「聽講你要留低直至搵到新工喎！」
個同事竟然好意思指住阿頭：「係呀！佢唔畀返個位我吖嘛，我咪唔求佢囉！總之搵到新工就走。」
老細不慍不火：「份糧就計到你last day㗎啫，之後公司唔會出糧畀你，唔通你搵半年，我又照出你份糧半年呀？」
老細講完隨即離開，然後呢位同事又繼續拍枱拍凳。
星期五佢就last day喇，好想知佢下星期一係咪會繼續返嚟公司，面係人哋畀，假係自己丟，唔好咁肉酸啦！