「Hello 新同事，我叫Sophie，有冇時間呀？傾兩句吖！」接近收工嘅時候，身邊突然傳嚟一把好陌生，但語氣又親切得over嘅聲音，我昂高頭望一望，妳邊位呀？唔識你㗎喎！不過我嚟咗呢間公司只係兩個星期，唔排除佢係其他部門嘅同事，所以下意識覆咗句：「哦，好呀。」
眼見呢位自稱Sophie嘅女人手持幾份文件，我仲心諗咩事，唔通係Admin？但HR & Admin嗰邊得4個人，我應該見過吖，咁你意思係入房傾定係企喺度傾？正當我滿頭問號等緊指引嘅時候，有位男同事Daniel忽然行埋嚟講：「佢係我老婆呀，你哋去pantry傾吖，對你有益㗎！」
有益？同事個老婆？咁你老婆又係我同事？點解之前喺office唔覺見過呢個女人嘅？
我跟咗呢位Sophie去pantry，一坐低就見佢攤開晒啲小冊子，仲有一啲疑似係文件嘅紙張，究竟咩事呢？搞強積金？
Sophie：「新同事妳叫Catherine呀呵？Daniel有提起你呀，佢話你好靚女，又真係喎！今年幾多歲呀？25？」
既然係同事Daniel個老婆，我嗰陣戒心冇咁重，同埋我仲係覺得Sophie係公司嘅人，兩公婆都可以係同事㗎嘛，可能我太新，仲未識晒啲人啫！
我：「我28喇！」
Sophie：「嘩，睇唔出喎，妳個樣好小妹妹呀，唔講以為仲讀緊書。」
雖然Sophie把口係讚美，但我從一個舉動就知道佢好假，因為佢鋪喺枱面上嗰幾張A4紙，我除咗見到有啲回報率嘅列表之外，仲有幾張分別係寫住25歲、26歲、27歲、28歲、29歲、30歲，佢係print定好晒有備而來。
我：「係咪公司要揀MPF定係點？」唔想再估喇，直接問啦！
Sophie：「唔係，公司MPF嗰啲唔關我事㗎，我做咗保險都10年喇，你公司好多同事都係幫我買，你自己有冇保險先？」
我：「有！」唔係耍佢，我本身真係買咗保險。
Sophie：「你買邊間呀？我幫你睇睇個plan，如果唔同公司可以轉過嚟畀我跟。」
跟住嘅對話細節我已經唔記得太清楚，只係得悉呢位Sophie係我同事Daniel個老婆，而且係一位保險經紀，但佢並唔係喺度做，今次上嚟純粹sell我買保險，因為老公話咗畀佢知公司嚟咗一位新人，就係我。
印象中呢位Sophie大約5:45pm上嚟office，雖然我多次表示唔打算轉保險公司，亦唔考慮買多一份保險，但佢仍然sell到我6:45，足足一個鐘咁耐，其實都係玩緊疲勞轟炸。因為當時係放工時間，所以其他同事都有行入pantry洗杯丟垃圾等等，個別幾個有同呢位Sophie打招呼，但我feel到更多嘅同事望住我偷笑。
Sophie：「頭先向我say hi嗰個阿May咪係你哋會計同事囉，佢都係同我買㗎！」
話之邊個同你買吖，總之我唔買，你點sell都冇用，畀你疲勞轟炸成粒鐘，只係考慮到你係同事個老婆，如果係街外人我一早起身走咗。
後來聽返我部門另一位女同事講，Daniel個老婆Sophie的確成日上嚟我哋office sell基金sell保險，通常有新人入職就會見到佢，所以出沒時間係好飄忽，你永遠防範唔到，而且Daniel亦會幫Sophie「follow up」，不斷同你講佢老婆點樣盡心盡責跟客。
「之前我老婆有個客check到乳癌，30幾歲咋喎，好在佢有買保險咋，我老婆幾次都陪佢入院，搞晒claim錢嗰啲，個客一蚊都唔使自己出。」
「我老婆有個客嘅爸爸中風，佢爸爸係同另一間保險公司買危疾，人哋個保險經紀懶懶閒，結果我老婆義務都幫手。」
「有時話唔埋㗎，上次之嘛，我個friend跌斷腳，半年返唔到工，好在佢同我老婆買保險，有得claim，否則就手停口停。」
作為人哋老公，其實我好佩服Daniel，佢真係盡心盡力幫個老婆sell保險，以上都係佢之後同我分享嘅故事，隔日就轟炸我，有時忙起上嚟真係人都癲。
隔咗一個禮拜，Sophie又上嚟問我諗成點，又係失驚無神出現喺我眼前，當時係晏晝四點幾，有嘢趕住要覆，一路打email一路聽佢喺側邊講基金回報，又不斷分享佢啲客嘅claim錢案例，乜咁樣真係好咩？Office hour喎！做緊嘢喎！你影響緊我工作喎！
我最好奇係點解公司容許一個唔係職員嘅人入嚟咁樣sell嘢，得出嘅結論係，office真係有幾個人幫Sophie買咗，加上Daniel喺呢度做咗好耐，老細當佢係資深員工，好多嘢隻眼開隻眼閉。
我唔係要反保險，其實一份有用嘅保險真係可以救命，我只係唔鍾意呢種銷售手法，嗰樣嘢係好，你唔sell我都會買，但如果我唔需要，你搵鎖鏈鎖住我疲勞轟炸三日三夜都冇用。
作為新人，我當然冇資格叫公司唔畀Sophie踏入office，加上佢係同事老婆，唔通我走去投訴咩，不過公私要分明，真係唔應該借助工作嘅便利，咁樣迫人聽保險囉！(完)