就上個月，有個女同事叫Kiwi，佢做做下嘢踎咗喺地下，初時以為係跌咗筆定唔知乜，點知隔咗陣就聽到Kiwi慘叫：「喂！唔得！可唔可以幫幫我？」因為唔知咩事，有一刻以為佢鬼上身，Kiwi連隨瞓埋落地，周圍嘅同事開始驚喇，大家行近嘗試扶起佢，問下係咪有咩唔舒服？
「好痛～～好辛苦……好痛呀！」Kiwi似乎冇辦法好好表達，只係摸住肚嘅位置係咁嗌痛，擾攘咗一大輪，其他同事又去斟水又去搵藥，結果我阿姐見勢色唔對，指示我打電話call白車，我咁大個女都係第一次call白車，嗰下真係有少少緊張同手忙腳亂。
救護員隔咗唔係好耐就到達，因為Kiwi個情況一直冇好轉，係咁喺office個地下典嚟典去，所以最終大陣仗到出動埋擔架床直接送院，我阿姐走去問救護員會唔會有事？對方話應該冇乜嘢，可能只係急性腸胃炎之類，跟手就帶走咗Kiwi喇！
後來阿姐先醒起佢咁樣入院應該要身份證之類，所以叫我幫手拎去醫院，只係左搵右搵，我見唔到Kiwi有手袋或者銀包，連手提電話都冇，不過我哋都做唔到啲咩喇，因為Kiwi係lunch返嚟冇耐就出事，而我哋4點幾有個client上嚟開會，坦白講當時都忙到甩轆。
臨放工大家商量好唔好去醫院探Kiwi，阿姐突然收到Kiwi WhatsApp報平安，原來佢頭先係胃抽筋，由於袋住電話同銀包，難怪同事搵嘅時候冇發現啦！
聽到阿姐直接錄voice msg同Kiwi講：「你唔好打字覆msg我喇，休息下啦！聽日抖多日啦！」
嗰日係星期四，如果抖多日即係星期一先返工，都好嘅，如果你喺現場見到Kiwi係咁碌嚟碌去都會好擔心，佢當時又唔係好講到咩事，好在call咗白車咋！
不過星期一Kiwi都係冇返，原來佢星期日WhatsApp咗阿姐話休息多一日，因為個胃仲係陰啲陰啲痛，星期二終於見到Kiwi喇，差唔多全公司同事都走嚟慰問佢，其實早兩日連同一層樓隔籬個office都有人問，又救護員又擔架床，人哋都擔心係咪發生咗咩事。
Kiwi返工之後講嘢無神無氣，不過期間佢仲堅持開OT，連阿姐都讚Kiwi勤力同埋professional！以為我投稿就係講個同事點樣病同點樣康復？唔係呀！未入到戲肉㗎！
上星期我想拎假同男朋友去東京旅行，但阿姐唔批，其實又唔可以話reject嘅，總之阿姐唔批我嗰段時期拎假，叫我一係早啲出發，一係遲啲出發，無奈我男友公司亦都唔容易請假，夾唔到之下就去唔成東京喇。
Kiwi睇住我搵機票滿心期待，跟住拎唔到假好失落，佢偷偷地同我講：「你唔好咁蠢問佢吖嘛！」初時我以為Kiwi口中嘅「佢」係指我男朋友，原來佢講緊阿姐。
Kiwi繼續：「你返咗咁耐，唔覺每次拎假如果疊住星期六日，阿姐就一定唔批㗎咩？佢好奇怪㗎，唔鍾意我哋自製長假。」
我：「諗返轉頭又好似係喎！你上年話去歐洲唔夠AL，想搭住個唔知咩假期一齊放，阿姐唔批，之前另一個同事想請星期五快閃曼谷三日兩夜，阿姐都係冇批，點解呢？」
Kiwi：「點知佢點解呀？心理變態啩！你應該學我咁詐病，不過太遲喇，因為你同佢講咗請假想請幾時，佢而家唔批，你去到嗰日之前先至話病，肯定唔信你，下次啦！用返我嗰招就得㗎喇！」
我：「你有用過呢招咩？」
Kiwi：「咩呀？上個月我咪入醫院囉，你幫我call白車喎，失憶呀？」
唔乸係呀！扮㗎？喺office個地下碌嚟碌去喎！Call晒白車喎！後尾諗返啲細節位都覺得奇怪，Kiwi平時一定孭手袋，嗰日竟然冇，而且銀包電話全部跟身……
我：「你啲戲可以攞奧斯卡！係咪上到白車即刻冇事？救護員同醫生冇踢爆你咁好彩？」
Kiwi：「教精埋你，扮唔舒服唔好講咩發燒、撞親、確診，因為呢啲一check就check到，你話胃痛、腸痛、肚屙呢啲全部冇你符，照都唔會照得出，你話痛，你話要拎假紙，醫生都係要做畀你。」
咁究竟Kiwi上次為乜扮病呢？原來又係去旅行，扮病call白車前已經一早book晒酒店機票，有料！講真佢啲演技好過好多藝人，唔入行拍戲嘥晒！
Kiwi仲千叮萬囑我唔好爆響口，咁我又唔會，只係佢「傳授」呢招未必幫到手，因為我啲戲好屎，而且下下驚動全公司真係玩得太大喇，反正同男友個東京之旅已經泡湯，下次再請假先諗啦！