「咦！乜你哋……一齊㗎？幾時嘅事？」同女朋友喺美麗華行行下街，迎面撞到同事阿Hill（化名），其實我哋3個人都係同事，本身我同女友一直想低調，始終辦公室戀情多是非，不過呢次被撞破我反而覺得好開心，甚至係好興奮，一切就要由四個月前開始講起。
我哋公司有兩個office，一邊喺銅鑼灣，一邊喺觀塘，阿Hill四個月前先由CWB轉過嚟，而佢一嚟到就已經睇中Jennifer，即係我女友。印象中阿Hill當時打完招呼做完自我介紹之後，第二句同我講嘅嘢就係：「喂！條女幾正喎！係咪叫Jennifer？知唔知佢有冇仔？」
我當時唔係刻意隱瞞，答佢唔知純粹係因為一早同女友建立咗默契，就係呢段感情唔會刻意公開，費事公司班人多口，令到工作產生尷尬。
阿Hill係非常欣賞我女友Jennifer，讚佢靚、讚佢做得嘢、讚佢著衫好睇、讚佢好身材，有一次同我講：「Jennifer隻腳超長，著黑絲正呀！淨係對腳都可以玩成晚。」
真心想聽下大家意思，如果有人喺唔知情之下話你女友對腳好正同埋可以玩成晚，作為男友係應該嬲定係開心呢？
我冇過大反應係因為office裡面試過有人公開戀情，結果真係搞到好煩，老細仲要唔畀佢兩個喺相同日子拎假，就算畀佢哋放都好多說話要聽，所以我同Jennifer由一拍拖就有共識，既然拍咗拖超過半年都守得住呢個祕密，而家冇理由因為一個阿Hill而自爆吖！
「你同Jennifer熟唔熟㗎？唔好同佢講我有老婆喎！其實都冇晒感情㗎喇，傾緊離婚，好在冇小朋友咋，有細路仔就麻煩好多。」
哦！原來阿Hill係已婚，所以呢，我真係好怕喺公司分享自己嘅私事，冇需要吖！
你以為阿Hill一直處於向我打聽嘅階段？咁就錯喇，其實佢同一時間都追緊Jennifer，追都無所謂喇，男未婚女未嫁，我唔係控制狂，冇理由咁專制唔畀其他男性接近自己女友，不過阿Hill溝女嘅手段就真係好唔要得，佢係不斷詆毀其他人，托起自己嘅形象去上位。
Jennifer：「阿Hill話你做嘢好唔掂喎！覆客又慢，英文grammar又錯晒，同埋佢話你做嘢好騰雞。」女友夜晚同我傾電話嗰陣，覆述返阿Hill講我嘅壞話。
我：「一定係咁啦！佢英文最勁，佢最老定，總之最叻係佢啦！」
Jennifer：「咁佢又唔止話你一個，阿Hill話Gilbert見識好少，又話Terence成個乸型咁，應該係鍾意男人，最搞笑係佢話Terence成日拍佢手臂，覺得畀男人抽水好嘔心。」
我：「Terence乸型？哈哈，如果佢知道阿Hill咁講好嬲！」
Jennifer：「呢個都未算嬲，阿Hill話Manager啲衫全部都係cheap嘢好寒酸，個口同個身都有浸老人除，如果Manager知道有人咁講佢肯定爆炸。」
我：「講到尾，阿Hill都係要踩低晒office所有男性生物啫，佢有冇同你講過其他女同事壞話？」
Jennifer：「咁又真係好似冇喎！」
我：「佢同我講鍾意你著黑絲，話你對腳可以玩成晚。」
Jennifer：「條友變態㗎？」
我：「不過阿Hill叫我唔好同你講，佢其實係結咗婚，而家準備搞離婚，可能想娶你。」
Jennifer：「食屎啦叫佢！你有冇見到阿Hill啲鼻毛，日日都飛晒出嚟，佢講人之前有冇諗過自己個樣㗎？」
真！阿Hill日日都飛晒啲鼻毛出嚟，差在係飛左邊定係右邊，有時兩邊鼻哥窿都有鼻毛飛出嚟，咁當然啦！阿Hill呢種人依然會覺得自己係全office最型嘅男人。
如是者，我同女友日日都交換阿Hill嘅情報，而阿Hill呢條友仔都好搞笑，對住我同其他男同事好nice，原來背後踩到我哋變地底泥，有時又會同我分享想約Jennifer去邊，甚至講下自己嚟緊嘅溝女策略，佢完全唔知我同Jennifer私底下有交流。
「咦！乜你哋……一齊㗎？幾時嘅事？」當日喺美麗華，我同女友手拖手撞見阿Hill，我到而家都記得佢個驚訝樣，個表情好複雜，當中夾雜住心虛同惶恐。
既然撞到係天意，我當時亦好大方回答阿Hill：「哦，一齊咗好耐喇，趕住睇戲，走先。」
自此之後，阿Hill冇再向Jennifer講我或者任何男同事嘅壞話，亦都冇再喺我面前講Jennifer點靚點正，阿Hill喺公司變得好沉默，真係溝女唔知掟……
上星期阿Hill又調返去CWB office，聽返Manager講，係阿Hill自己提出，咁咪幾好囉！
不過我唔似阿Hill，男人老狗唔鍾意搬弄是非，所以我冇向Manager透露阿Hill話佢啲衫好cheap好寒酸，留一線，好相見啦！