
想講單痴線嘢
記得我返而家呢份工嘅第一日,成個部門一齊去飲茶食welcome lunch,期間阿頭好鄭重向我介紹一個叫Kenny嘅男同事:「嗱!呢個係Kenny,唱歌把聲好似李克勤,佢做歌星一定紅!」
雖然九唔搭八,不過我都禮貌回答:「咁勁?好犀利喎!」
阿頭:「你唔信呀?即刻叫佢唱畀你聽,就唱隻《大會堂演奏廳》好唔好?」其實我冇話唔信…..
跟住阿頭起勢叫Kenny唱歌,呢位男同事初時扭扭擰擰話好尷尬,但最後都喺群眾壓力下唱咗幾句《大會堂演奏廳》,好尷尬呀!
以為件事咁簡單?梗係唔止!就今年個Annual Dinner之嘛,老細話曾經想搵歌星表演,可惜太貴最後唔成事,然後阿頭又喺眾目睽睽之下同老細講:「使咩搵歌星呀!搵Kenny啦!成個牛頭角克勤喺度!上台唱首《綿綿頭上飛花》先!」(首歌應該就咁叫《飛花》)
Kenny又係扭扭擰擰一大輪,雖然最後冇上台,不過Kenny都喺台下唱咗幾句。
以上講到尾都係對住自己人,另一次更加癲,有個客嚟我哋公司開會,唔知講開啲乜,個客話第二晚會陪老婆睇演唱會,我阿頭又嚟料:「李克勤啱唔啱?即刻叫佢私人唱畀你聽,Kenny唱歌好似克勤㗎!整返首《深深深》畀陳生聽,唱得好陳生即刻簽單!」
我見陳生(即係個客)呆一呆,Kenny面都紅晒,好唔情願咁唱咗幾句《深深深》
如是者,每次一有位入,阿頭就會同人介紹Kenny唱歌好似李克勤,而且每次都一定要Kenny唱幾句娛賓。以前我會覺得Kenny好慘,因為喺現場會見到佢好似被迫咁,但諗諗下佢都30幾歲人,如果要拒絕點會拒絕唔到呀?酒就話幫你擋啫,歌真係幫唔到你唱喎!
我而家大大話話都聽過Kenny唱7, 8次歌,總之一有客講起相關話題,又或者有新同事返工,阿頭必然會叫Kenny表演。
後來發現呢啲場面似曾相識,終於醒起似咩喇!好似細細個去拜年,老豆老母迫啲仔女唱歌跳舞或者彈琴畀親戚欣賞
「唱吖!唱吖!唱畀陳生聽吖!」果然每間公司都有癲人癲事。