
Alfred係我同部門嘅同事,除咗接啲客打嚟嘅電話之外,其餘時間基本上唔會聽到佢講嘢,就算有時成班同事傾計講笑,Alfred都唔會參與,食lunch更加唔join我哋,有次非常巧合,大家去咗公司附近一間餐廳食晏,坐低先見到Alfred原來喺不遠處自己一個食緊。
當時我係新人唔知咁多,好自然問咗大家一句:「咦!Alfred喎!要唔要叫佢坐埋嚟?」另一位同事即刻截住我:「千祈唔好,佢好怪㗎,鍾意一個人食,以前日日嗌佢食lunch都唔去,後來都費事嗌喇,怪人一個,坐埋嚟都唔知有咩同佢講。」
雖然佢哋用「怪人」去形容Alfred,但我其實並唔同意,首先一個人咁離群,又仍然喺公司有立足之地,某程度上已經證明咗有料,再加上喺工作方面我都有同Alfred夾過,佢說話的確唔多,不過永遠冇甩漏,而且好有交帶好細心,我都唔知點解釋,總之同佢拍住跟嘢,你嘅壓力自然好細,會覺得好放心。
後來有一次,因為班同事各自約咗人,我唯有自己一個去食飯,呢次喺office樓下間茶記,我又撞到Alfred,本身好識做唔去搭枱,因為清楚佢性格,但你知香港茶記lunch time幾多人㗎啦,侍應見我單拖,就「指揮」我去坐又係單拖嘅Alfred對面,嗱,我真係冇心打擾佢㗎!侍應叫我坐埋去咋!
雖然熟知Alfred為人沉默,不過我都好有禮貌同佢打招呼,跟手就講啲廢話:「咁啱嘅!」
想強調一樣嘢,Alfred雖然孤僻,但唔代表佢串或者高傲,其實Alfred好友善,就例如嗰次撞到佢咁,一樣會笑,一樣會say hi,只係佢個格唔會夾硬同你吹水搵嘢講,平時做嘢就係咁,需要開口講嘢嘅時候佢唔會吝嗇同擺款,只係除咗公事就唔會同你講多半句無謂嘢同廢話咁解,私事更加免談,Alfred唔會講,亦唔會問你。
我哋兩個各有各食,本身冇傾計,因為舊公司同事係咁打電話問我呢樣嗰樣,食食下又要停,答兩句又要食,我自己都手忙腳亂。
因為Alfred早過我到,又好專心咁食,所以我碟飯未食到3分1,Alfred已經食晒,佢仲同我講:「我上去先,你慢慢食。」
我:「好呀,我應該爬多兩啖就上去,睇怕都食唔切,舊公司係咁打嚟問嘢。」純粹打個圓場,雖然知道Alfred鍾意一個人食飯,但我全程係咁講電話,同事坐對面都講唔到兩句嘢,多多少少總有啲唔好意思。
估唔到Alfred會同我講:「你啱啱過試用期,即係離開咗舊公司至少3個月,其實冇義務覆舊公司啲人,我見你連file擺邊都要形容畀對面聽,咁樣佢哋只會keep住搵你問嘢,要斷捨離,你食飯先啦,遲少少上去冇所謂,冇人會話你。」
冇誇張,就算平日工作,Alfred都只會講重點,佢真係第一次同我講咁長嘅句子,聽得出裡面包含咗兩份關心,第一份係教我唔使再對舊公司咁上心,要學識斷捨離,第二份就係叫我慢慢食完先上去,唔使趕。當一個咁寡言嘅人忽然同講句咁長嘅嘢,你係好難唔感動。
我:「你啱,呢3個月其實佢哋都keep住搵我,好似沒完沒了咁,真係要試下唔覆,sorry呀,一直掛住講電話,頭先打完招呼都冇機會同你講嘢。」
Alfred:「唔緊要,我食飯都慣咗一個人靜靜地,社恐,冇辦法,你慢慢食,我上去先。」果然係好難同Alfred傾多幾句。
冇錯,Alfred唔係咩怪人,佢親自講自己有社恐,我覺得呢個詞語先至最貼切。一個人有社恐並唔係咩壞事,最緊要清楚自己性格,選擇適合自己嘅生活方式,男神梁朝偉一樣有社恐,亦一樣承認自己有社恐,你覺得佢悶嘅同時,其實佢係enjoy緊獨處。
我嚟呢間公司嘅日子淺,同Alfred只係做咗一年同事,早兩個月佢遞信辭職,我冇問係搵到工定係有其他打算,只係知道last day嗰一日,Alfred自己quit咗公司個WhatsApp group,我會形容佢係靜悄悄地離開,堅係不帶走一點雲彩,當然亦冇留低蘇州屎。
好衰唔衰,有個客係Alfred跟開,另一位同事跟唔掂,佢焗住要搵返Alfred問嘢,但Alfred一早quit group,同事唯有私人WhatsApp佢,冇覆,直接打電話畀佢,唔聽,再之後就發展到幾個同事輪流幫手打電話同send msg,超過一星期依然冇回音,有人仲發現:「咦,佢係咪block咗我,單剔點解?」
跟住班同事就開始鬼殺咁嘈,係咁話Alfred平時已經好怪,唔同佢哋傾計,又唔會一齊食飯。其實呢啲唔係怪,只係社恐啫,同樣地,喺患有「社交恐懼癌」嘅人眼中,你班友日日講是講非,就連去廁所都要聯群結黨,咪一樣咁怪。
「佢識唔識人情世故㗎!」大家苦無辦法搵Alfred,其中一位同事嬲到咆哮。
「咪係,走咗又唔聽電話,有事搵你咁點呀?使唔使咁宅呀?唔係聽個電話都驚呀?」
我明白點解Alfred會唔聽電話唔覆msg,因為佢講過:「冇義務覆舊公司啲人。」離職之後可以做到100%斷捨離,我反而十分佩服Alfred,唔容易㗎,將來學到佢5成都唔錯。(完)