返新工第一日已經遇到衰同事，對方係部門嘅AM（Assistant Manager），呢個女人對我嘅態度好差，朝早講早晨唔應，Manager向大家介紹我嗰陣，佢仲要玩電話望都唔望，我新人嚟咋，有咩得罪你呀？
下晝呢位女AM分咗啲工作畀我做，但又唔教，隔咗陣就當眾鬧我，大致係話呢啲嘢唔使教都應該識，個個咁忙冇時間同我「補習」……
呢個時候突然有一位男同事殺出嚟鬧個AM，勁大聲嗰隻：「咩都係人哋錯，你就唔會錯！」
全office靜晒，個AM塊面又紅晒，粒聲唔出行返埋自己個位，嘩！個男同事Man到呢！
雖然呢位男同事個樣同身型都好似呂方，但嗰一刻佢係我嘅hero，呂方仲喺我旁邊講咗句：「唔使理呢啲人，撐你！」
可惜我係男仔，否則肯定成地濕晒，我唔敢應佢呀，始終自己新嚟吖嘛！我只知呂方係同事，不過唔知佢叫咩名，又唔知佢係咩department，遲下有機會再多謝佢啦！
第二日返到公司，我以為個女AM會因為畀呂方喝斥而收斂，點知冇，對我嘅態度仲衰過第一日，我好期待呂方再出手救我，但佢冇出現，之後女AM都係咁上下，好在其他人係正常同友善咋！
過多幾日開始同啲人熟，我膽粗粗問另一位同事，究竟當日出「口」相助嗰位仁兄係乜水？點解唔見佢返工？
同事：「私怨咋！條友唔係幫你，佢不嬲同AM有牙齒印，臨走借題發揮啫！」
我：「咁複雜？不過佢係邊個department啫？呢幾日唔見嘅？」
同事：「咪話佢臨走借題發揮囉，佢鬧AM嗰日係last day，冇做㗎喇！」
我：「冇做？」
同事：「其實佢害死你㗎，你唔覺AM對你仲差咗咩？」
仆街吖！真喎！AM對我態度冇好過，你last day做咩扮幫我出頭呀！又話撐我？點撐呀？你似害9我喎！
後記係，八到請我呢個position嘅時候，AM有引薦自己嘅friend嚟做，但Manager最終揀咗我，懷疑係咁所以AM睇我唔順眼，不過我更在意呂方，喂你都走啦，做咩擺我上枱呀？我仲要喺度做㗎！