我做咗7年HR，乜嘢離職原因都見過晒，不過今次呢個真係第一次見～～～Feline Allergy，正確係咪咁樣講我唔知，因為我唔係專業，但照譯就係「貓科動物敏感」，求職者send嚟份CV冇提嘅，係上嚟填form先寫咗呢個reason of leaving上去，咁我當然順住個勢問清楚啦：「Er……呢個係咩事？」
呢位求職者同我講：「哦，係咁嘅，因為前老細好鍾意貓，佢有時會帶隻貓返公司，同時都容許有養貓嘅同事帶返嚟office一齊做嘢，後來我先知自己對貓毛過敏，真係做唔到落去喇，所以就辭職，本身都諗緊好唔好求其寫個原因，諗諗下既然係真事咪照寫囉！」
我：「但你當時見工唔知有貓？」
「見工當日真係唔知，起碼行入去office嗰陣見唔到，其實佢哋唔係日日都帶貓返嚟㗎，一個星期大約兩三日左右啦！同埋啲貓有時見到陌生人會匿埋，所以我真係第一日返工先知office有貓。」
我：「對寵物友善嘅公司，應該幾好玩幾有人情味㗎喎！雖然我冇養，不過朋友屋企有，次次去親佢度都會同隻貓玩。」
「我同你差唔多，自己冇養，但從來唔抗拒，只係身邊冇人養貓，我都唔知原來個反應可以咁大。」
聽呢位求職者講，佢公司最高峰嗰日有5至6隻貓，有啲跳嚟跳去，有啲就匿埋一二邊，不過所有同事都唔介意，任由貓貓趴喺大髀，甚至一路做嘢一路同貓影相打卡，睇得出公司上下都好包容，佢話曾經試過有貓撞瀉咗同事杯咖啡，倒到成枱都係，不過個同事完全唔介意，仲一路抹枱一路笑。
我：「咁你前老細請人嘅時候都應該要問下嘅，雖然我鍾意貓，但有啲人真係會驚都唔出奇。」
「我唔係驚，我係敏感，最初兩隻手紅晒，其實冇諗過係貓引致，仲以為係自己食錯嘢，不過又唔係吖，紅晒嗰排都冇食特別嘢。」
我：「咁你點肯定係貓毛敏感呢？」
「因為後來愈嚟愈嚴重，隻手紅完之後到隻眼有事，已經瘋狂流鼻水，咁以為係唔舒服普通病啦！直至有一次幾個同事都帶貓返嚟公司，嗰日我就連個嘴都腫埋，然後有啲呼吸困難，結果我請咗半日假去睇醫生。」
原來醫生都有同呢位求職者講，佢過敏嘅原因未必直接關貓毛事，有機會係貓身上嘅灰塵或者塵螨所導致，所以過敏源唔一定係貓毛，「幕後黑手」隨時係塵螨都唔出奇。
我：「真係冇辦法咩？本身你鍾唔鍾意份工？」
「鍾意，同埋都唔係冇辦法，例如可以同貓貓沖涼之類，但隻貓唔係我㗎嘛！唔通因為我敏感就落order叫同事幫自己啲貓沖涼咩，何況我雖然寫貓毛敏感，不過隨時好似醫生咁講，過敏源係貓身上嘅塵或者塵螨，冇可能要全公司就我一個啫！」
我：「咁又係，八卦一問，你當時用呢個原因辭職，前老細有冇嘗試留你呀？」
「佢最初未聽我解釋之前，有問過我係咪人工唔滿意？仲講明可以傾，大假都可以加多兩日，又問我有冇其他offer？叫我做生不如做熟，因為要再請人同埋再train新人好攰，其實我感動嘅，聽得出佢真係想我留低，然後我話係對貓毛敏感，老細就好撇脫咁講：哦！咁冇計喇，你走啦！」
🤣🤣🤣個老細咩都有得傾，人工肯加，大假肯加，但就接受唔到個員工無法同貓共存，睇得出佢前老細真係一個愛貓之人。
其實如果公司有貓貓狗狗，我覺得招聘時都係list埋出嚟好啲，始終唔係人人可以接受，雖然講到明或者會嚇走一啲唔鍾意動物嘅人，但同樣可以吸引到志同道合嘅人嚟見工，某程度上係好事，anyway，用Feline Allergy做辭職原因真係第一次聽，又開咗眼界。
