我有個做倉嘅同事，三十零歲，咁多年嚟佢都好憎嗰啲盲人地板，即係街上面黃色一粒粒凸起，或者黃色長條型凸起嗰種地板，因為佢覺得呢啲專為失明人士而設嘅地磚凹凹凸凸，好影響佢平時推住車仔上落貨。
佢真係見一次鬧一次，最常聽到係佢咁講：「香港有冇咁L多盲人呀？使唔使為一個半個盲西搞到咁多正常人唔方便呀？」佢仲話會寫信去政府部門投訴，要求拆走啲失明人士凹凸地板，唔知佢有冇咁做喇。
早排呢位同事請長假，原來係視網膜脫落，聽講要做個手術，最嚴重可能會睇唔到嘢，我冇問得好詳細，但好似同糖尿上眼有關，我無法求證，亦唔清楚呢方面嘅醫學常識，不過有一樣嘢好肯定，就係佢視網膜脫落要請假係真嘅，因為阿頭啱啱問我有冇朋友介紹，想搵人做臨時工頂一頂。
坦白講，我同呢位同事無仇無怨，唔係想恥笑或者踩多腳，只係成日聽到句說話係「做人要積口德」，以前冇乜感覺，而家就覺得好邪。