「喂，我阿姐話你哋個新同事好冇家教喎！你得閒話下佢啦，雖然我覺得佢好搞笑，不過有時又真係幾冇禮貌嘅，連阿Tom呢啲好好先生都唔係好鍾意佢。」隔籬部門有個同事走嚟向我講以上說話，睇得出係善意嘅，仲一路講一路笑，但問題係我完係唔明佢講緊乜。
我：「新同事？你指Jacky？你阿姐點解話佢冇禮貌嘅？Jacky做過啲咩呀？」其實我個department得一個新嚟嘅男仔，佢係就係多口啲，不過應該唔致於會踩到人哋阿姐條尾，仲要被形容為冇家教啩！個指控好嚴重下喎！
「佢係咁食我哋部門啲嘢，仲要一路食一路彈，上次食鳳梨酥猛咁話嗰隻好cheap，喂呀，阿Tom去台灣旅行買返嚟㗎！今朝見到我哋冇擺嘢食出嚟仲要對住我哋話好小家。」
我：「咁惡？食人哋部門啲嘢仲要話cheap同小家？得，我了解下。」
衰仔吖，周圍焫火頭，捉佢傾下發生咩事，個結果真係笑爆嘴，我問Jacky：「你做咩話人啲手信cheap呀？仲要話人小家？」
Jacky好驚訝咁問返我：「乜啲嘢食唔係公司提供畀同事㗎咩？」
大家牛頭唔搭馬嘴，講多兩講先知道Jacky一路誤會咗佢食嘅嘢係屬於「公司員工福利」，即係好似pantry啲咖啡同茶包咁呀！
Jacky不斷去拎嘢食嗰個department係喺正pantry正前方，但其實都隔咗一條兩個人身位嘅小走廊，而人哋就將自己部門嘅食物擺咗喺一個去到肚腩咁上下高嘅文件櫃長枱，咁啲零食係點嚟㗎呢？人哋department有個遲到15分鐘以上，每1分鐘罰幾蚊嘅制度，而「罰款」就會用嚟買零食，另外，如果佢哋有人去完旅行，亦慣咗將啲手信擺喺呢度，一句講晒，呢個文件櫃長枱嘅食物，只係屬於人哋部門，唔係屬於公司大棚福利，請你食係人情，唔請你食係道理。
而Jacky就由day 1入嚟做已經係咁拎人哋部門嘅嘢食……
我：「其實嗰個位同pantry都隔咗條走廊㗎喎，你唔覺得奇怪㗎咩？」
Jacky：「我以為係pantry冇位擺先至放出面，唉，呢次仆街喇，我仲要一路食一路鬧。」
我：「除咗話阿Tom喺台灣買返嚟嘅鳳梨酥好cheap，你仲有鬧咩呢？」
Jacky：「有次認得包餅係超市減價，我咪話專執啲就過期嘢想食死人咩！一直以為係公司請我哋食，所以先至執啲平嘢返嚟吖嘛！」
點止咁小料呀！原來Jacky仲鬧過零食太少，好孤寒，好似唔想請人食……見到盒金莎得返一粒，又鬧公司班人好似餓狗搶屎驚死執輸……見到白兔糖同埋瑞士糖，就問係咪去完喪禮畀完吉儀拎返嚟……
最痴線係佢一路食，一路同文件櫃隔籬個同事講，頂你個肺，啲糖咪就係個同事拎返嚟㗎囉！你做咩無啦啦話人畀完吉儀拎返公司呀！
Jacky話自己真係以為老細刻薄同孤寒先至咁講，仲話同文件櫃隔籬個同事講，係因為以為其他人都有同感，所以當傾計咁樣講笑同講意見。
人哋見你咁口臭，所以就冇再將啲零食擺出嚟，點知Jacky行過見冇嘢食，又走去同文件櫃個同事講：「嘩！咁小家㗎！而家連糖都冇得食！」
我知道件事好嚴重呀！試諗下，如果有個其他部門嘅人行埋嚟拎我哋圍內嘅嘢食，仲要一路食一路鬧好cheap、過期、太少、似喪禮食剩，最終見到冇零食再話你小家，換轉係我都會好嬲，不過聽完我又覺得好好笑。
其實只要Jacky每次批評之前，加多兩隻字就會有唔同效果，例如：「公司」咁小家㗎！又或者「公司」咁cheap㗎！
因為咁樣就清楚表達到你一直以為係公司請員工食，而唔係一路食免費嘢，一路批評人哋個部門。
同樣地，聽到Jacky咁樣批評，文件櫃隔籬位個同事都可以提醒佢，講清楚啲嘢食係自己圍內，Jacky早啲知道就未必會大出洋相。
咁當然啦，Jacky把口真係唔收嘅，即使係老細請，你作為員工仲要係新人，都唔應該講到咁白喺度鬧，公司唔係老奉提供免費零食㗎！
好在最後Jacky都亡羊補牢，自費買咗啲零食請返隔籬部門食，但我見人哋個阿姐仲係黑口黑面唔領情，唔緊要啦！做咗好過冇做，第日喺office嘅言行小心啲囉！