公司請咗個新同事叫阿Joe，大約30幾歲嘅男人，佢做錯嘢嘅頻率都真係幾高，例如入錯價錢、入錯item number、用錯form，甚至係覆email嘅時候打錯個客嘅名，以上幾乎係每日都發生，但最慘係我覺得佢盡咗力，又永遠都粗心大意，你話佢懶同hea咩，其實都唔係，我哋公司返9點，佢每朝都8:30就坐咗喺度。
有一次佢又打錯client個名，人哋明明叫Vanessa，佢封email個heading就打Dear Sarah，因為有cc埋我所以見到，封電郵裡面根本冇任何人叫Sarah，我真係唔知佢係點樣「虛構」出嚟，咁我見到都要同阿Joe講聲㗎嘛，冇責備語氣，我係咁樣同佢講：「Joe，個客好似叫Vanessa，唔係叫Sarah，下次睇清楚先send喎，你知啲客好難講，費事覺得我哋唔專業。」
阿Joe好大聲講咗句：「哎吔！對唔住！」然後就好大力咁樣摑自己，一巴、兩巴、三巴、四巴、五巴，連續自摑咗足足五巴，我梗係睇到呆咗啦！附近目睹嘅同事都呆晒，我直頭見到Manager喺後面O晒咀，然後我哋幾個同事你眼望我眼。阿Joe真係摑到自己塊面又紅又腫。
冇人出聲，我都要制止㗎啦：「阿Joe，唔好咁，好小事啫，下次小心啲就得㗎喇！」
阿Joe冇理我，反而再摑多自己一巴，然後喃喃自語：「又錯！做極都係錯！」
我即刻收收皮先，似乎講咩都會刺激到阿Joe摑自己，我都係唔出聲喇。
目擊事件嘅同事當然有私底下討論啦，大家仲猜測阿Joe係咪有咩唔開心，將情緒帶返嚟公司，總之自此之後，我哋都唔敢直接同阿Joe講佢有咩做錯。
其實講開心情唔好呢個point，初初真係唔覺，不過阿Joe做落之後，有時會聽到佢講電話嘅語氣好差，唔係對客，我哋相信係屋企人，幾乎每兩三日就會聽到佢用呢個pattern講電話：「唔食呀！唔使煮我飯，你煩唔煩啲呀！收線啦！」
邊個敢過問吖，只係講到食飯煮飯，應該九成係阿爸阿媽打嚟，唔係要提倡做孝順仔，但佢態度真係好惡，好似同仇人講嘢咁，家家有本難念的經，唔好理人私事喇。
想講講呢，撇除佢自摑同埋講電話好大聲好晦氣之外，平時阿Joe係冇乜嘢，會同同事傾計，間唔中亦一齊食lunch，咁大家就諗可能係返新工壓力大啦！直至有一次會計部妹妹走嚟同阿Joe講：「你claim錢個表好似填錯數喎，上面list嗰啲車錢同下面個total唔一樣，你再填過畀我吖！」
會計部妹妹嘅語氣都係好普通，冇攻擊性，但阿Joe又重演返之前自摑嗰一幕，一巴、兩巴、三巴，起勢摑自己，真係啪啪聲好大力，會計部妹妹直頭退後咗幾步。
今次唔止我哋睇到，仲有其他部門同事都睇到，所以好快就全公司都知，連老細都走去問我哋Manager，所以冇辦法唔正視喇！
Manager搵咗阿Joe入房傾計，希望關心下佢嘅情緒問題，聽返Manager講，阿Joe一直同佢講冇事，自摑係因為好憎自己咁蠢，Manager就安慰佢要放鬆啲，以為告一段落啦，點知佢兩個傾完出返房之後，阿Joe又一路行一路自摑，並且自己同自己講嘢：「死蠢！死蠢！又做錯嘢！」佢係鬧自己，唔係鬧其他人。
陸續有同事問我哋Manager點解當時請阿Joe，不過聽返Manager講，阿Joe見工嘅時候係好正常，有問有答，就好似平時無事無幹同我哋傾閒計嘅狀態一樣，完全睇唔出，亦都估唔到阿Joe會咁容易情緒爆發，同埋失控地當眾自摑，Manager承認自己走漏眼。
講工作表現，阿Joe做錯嘢嘅頻率有多冇少，但係同事都唔敢再指出喇，有時寧願將啲嘢攬上身自己做都唔想pass畀阿Joe，坦白講咁樣嘅合作關係絕對唔理想。
阿Joe之前兩次自摑都係因為同事更正佢嘅錯誤，以為唔刺激佢就冇事啦，點知阿Joe發展到會無啦啦喺個位自己摑自己……
「又錯！蠢！豬咁蠢！」
「冇記性！冇記性！點先可以記得！」
阿Joe係一路摑自己一路鬧自己。
畢竟大家都冇義務做社工，亦唔係專業心理輔導員，關心已經表達咗，唔計自摑嘅行為，阿Joe嘅工作表現的確唔達標，見就快會過試用期，Manager想提前終止阿Joe嘅合約，但唔敢，因為指正錯誤都咁大反應，你叫佢執包袱真係唔知會點。
眼見試用期屆滿嘅日子迫在眉睫，阿Joe竟然自己遞辭職信，容許我衰啲咁講句，呢次真係一天都光晒，起碼係阿Joe主動請辭，算係無痛分手啦！
根據勞工法例，試用期內如果工作超過第一個月，無論合約有冇訂明，通知期都唔可以少於7日，但Manager想盡快解決，提出畀多7日人工，容許阿Joe可以即走，但係阿Joe唔同意，再一次自摑幾巴：「唔得！唔得！」
咁嘅情況……唔通你夾硬迫阿Joe即走咩，所以就由得佢留多7日，期間又唔敢完全放棄佢，因為驚阿Joe諗唔開，所以就畀啲完全無關痛癢嘅資料佢拎去入，錯都唔緊要，終於等到阿Joe過埋last day，然後我哋發現咗一件好恐怖嘅事。
阿Joe個櫃桶有本單行簿，裡面有好多粗口，好似罰抄咁，有啲位仲見佢寫到頁紙穿咗，應該係好大力，揭多兩頁，仆街吖！有我個英文名，而英文名下面係一個好大嘅死字，嗱！我個英文名好普通，可能唔係講緊我呢！再揭多頁，我哋見到會計妹妹個英文名，又係下面寫咗個好大嘅死字，咁就應該唔係巧合喇！
睇到呢度，Manager仲口痕咁講：「咩料呀？死亡筆記呀？好在我從來冇直接講阿Joe有咩做錯啫！」
Manager開心得太早喇，原來佢個名喺本單行簿最後一頁，好似壓軸嘉賓咁，仲要比我同會計妹妹多幾隻字，因為Manager個名下面係寫住：一定要死！個死字就係寫到張紙穿咗！
雖然好驚，但都有啲「榜上無名」嘅同事喺度笑，我就笑唔出喇，Manager話自己好無辜，唔明點解佢係一定要死，不過算啦，人都走咗，我哋懷疑Manager提議阿Joe唔使等7日可以即走，呢個安排反而觸動咗阿Joe嘅神經，否則都諗唔到其他原因喇！
我唔知阿Joe經歷咗啲咩，希望佢可以好好調整自己嘅精神狀況、心態，仲有情緒，或者佢需要去搵個專業嘅醫生睇下。