同事個女已經20幾歲，之前老闆講笑咁問：「你個女拍拖未呀？不如嚟我哋啲speed dating啦，免費，最多慢慢幫你揀個好女婿。」
我同事笑笑口回應：「使乜吖，佢晚晚煲電話粥煲到三更半夜，我驚佢周圍收兵添呀！」
最近佢同我講，阿女真係拍拖喇，不過係同個女仔一齊。
「你點知？」
同事：「見到佢哋喺樓下拖手先既。」
「好多女仔都會拖手㗎啦。」
同事：「我早兩日同佢講，老細叫佢去我哋公司玩speed dating，佢話已經有男朋友喇，仲問可唔可以帶返屋企食飯？」
「然後呢？」
同事：「我答可以，佢就即刻話係女仔嚟，可能覺得我會嚇親或者鬧佢啦！」
「咁你冇嚇親，係咪反而佢嚇親吖？」
同事：「係呀，佢衝入廚房正面望住我補多句，我話係女仔喎，你聽唔聽到？我咪大返佢囉，女仔又點呀？女仔識光合作用唔使食飯呀？佢好似難以置信咁。女大女世界啦，最緊要佢開心，正如佢阿媽之前執房執到豬咀，我哋兩公婆都冇話佢，咪每次出門口都叫佢小心啲囉，做衝衝子又好，鍾意女仔都好，其實唔係錯事，我佩服佢勇敢添，佢老豆我都冇咁勇呀！」
或者我同事唔係一個好勇嘅老豆，但佢絕對係一個好老豆，唔小心畀佢感動到，忍唔住想分享出嚟畀大家聽。