如果你啱啱去到一個新環境，梗係會鍾意比較nice同埋肯講嘢嘅同事啦！所以我剛入嚟呢間公司嘅時候係對阿Mill呢個女仔印象幾好，佢的確好肯教我嘢，又會同我食lunch傾計，問我做得慣唔慣，甚至會將公司裡面其他人嘅性格話我知，阿Mill真係好健談。
不過我又同時發現咗一樣嘢，就係其他同事對阿Mill都幾冷淡，又唔可以話其他人憎佢，只係唔多會同佢傾計，唔多會睬佢咁囉！所以我都好奇怪點解啲同事唔join埋我哋兩個一齊食晏，而家我過咗試用期，終於明白箇中嘅原因喇！
有一日我忙到hihi，阿Mill走嚟同我呻佢同奶奶嘅婆媳關係……
「我奶奶勁賤囉！平時唔做嘢㗎，等到我老公差唔多返嚟就開始執呢樣執嗰樣，原來仲私底下話我唔做家務，喂！我而家嫁畀你個仔啫，又唔係要搶你個仔，使唔使搞埋咁多小動作呀！」
因為我新嚟吖嘛，加上一開始阿Mill喺公司都幾照顧我，咁我忙極都當然會應佢啦！
我：「相見好同住難，不過你肯同奶奶一齊住都好好㗎喇！」
唔應猶自可，一應佢就大檸樂，阿Mill連當初點樣認識佢老公、拍拖去過邊度旅行、結婚時奶奶送嘅龍鳳鈪點樣寒酸，仲有呢三五七年嘅婆媳糾紛都講晒出嚟，其實我做緊嘅公事係要計數㗎！又要應佢又要做嘢，真係好混亂同埋好驚出錯。
我知道大家一定會話：你忙緊咪照直同佢講囉！
你估我冇咩？講完之後阿Mill會話唔好意思，唔阻住我做嘢，但係相隔半個鐘或者45分鐘，阿Mill又會再行埋嚟向我盡訴心中情，就好似失憶一樣，唔記得我之前同佢講要專心計數做report……
唔止咁樣，阿Mill仲會喺夜晚、星期六日、假期，係咁WhatsApp同埋打畀我，有時直頭係打video call，喂！做咩事呀？咁佢打嚟又講咩呢？咪又不外乎係仔女點樣唔聽話、老公同佢鬧交、返工點樣唔開心、做人點樣懷才不遇……唔係呀，你講還講吖！打字咪得囉，唔使下下又voice msg又打嚟又視像啩！
聽得多都開始覺得阿Mill成日無病呻吟，而且好長氣，你同佢無論講嘢定係打字都好難中斷，變相要花費好多時間，心很攰。久而久之我都會搵藉口唔同佢去食晏，其他同事發覺咗仲走嚟笑我：「點呀？開始驚咗阿Mill嗱！係咪好煩呢？」
其他同事並冇排斥佢，只係怕咗佢，因為個個都知道阿Mill好煩好長氣，所以避得就避。
我覺得做人唔應該忘本，當初入嚟呢間公司嘅時候，阿Mill真係教咗我好多嘢，喺我同其他人未熟嗰陣又會同我食lunch，我做唔出粗聲粗氣去叫佢唔好煩，唯有間中應酬下佢一兩句，咁唔通你兜口兜面同阿Mill講：「我對你啲私人嘢真係冇興趣呀！」講真佢冇惡意，又冇害我，純粹口水多過茶同埋唔識做啫，無需要去到反面或者講啲傷人嘅說話吖！
好記得有一次我請喪假，因為有親人出殯，朝早阿Mill send個msg嚟叫我節哀順變，嗱！其實佢幾好㗎，有啲位都幾窩心，點知下晝佢又連爆幾十個msg嚟同我鬧老細、鬧Manager、鬧另一位同事，真係覆佢又浪費時間，睇完唔覆又冇禮貌，再晏啲仲好笑，阿Mill又打video call嚟，唔好咁喪好冇呀？我褶緊衣紙呀，係咪要開鏡頭然後個背景係靈堂呀！
我冇接佢個video call，打返字同阿Mill講：「喺靈堂喎，你咩事？」其實我當時都少少躁。
阿Mill：「Sorry sorry，同先同老細嘈完兩句，嬲得滯唔記得你今日喺殯儀館。」
佢大約傍晚話唔記得我喺殯儀館，繼而say sorry咋，去到夜晚10點幾，佢又打咗5, 6個msg嚟向我呻奶奶啲嘢喇！
如果大家唔係同事，我可能會選擇block咗佢，不過我同阿Mill始終朝見口晚見面，喺公司每星期要對5日，想問下多啲人意見，有咩方法唔使傷害彼此嘅關係，而又唔使成日畀阿Mill疲勞轟炸？其實有冇人都遇過呢種同事或者朋友？即係對方係煩係多口水，但個格又唔係衰又冇害你，點樣可以拉開少少距離，保持良好關係又唔使好似做社工咁聽佢日呻夜呻呢？