「冇可能㗎！我唔制呀！我唔要攞獎！點解會係我呀？我都唔明白，呢個office咁多人，點解係我先？」當全公司同事雲集，宣布最討厭同事銅獎得主嘅時候，有7票嘅Angel接受唔到事實，唔肯行出去「攞獎」，佢激動到走晒音。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
唔係講笑，亦都唔係誇張，Angel當時好似「我要食魚翅呀」條片個女主角，差在未瞓喺地下碌，如果你就咁聽或者會覺得個頒獎禮好殘忍，甚至係另類批鬥令人難堪，正常嘅，咁係因為你冇喺我哋公司做過，冇同Angel交過手，冇under過佢。
我夠膽講，Angel平時對同事對下屬嘅行為係極差，最終只係得7票，個人認為係少，最大原因應該係office裡面有其他人比佢更值得攞金獎同銀獎。
宣布Angel得銅獎再見證佢唔肯出嚟攞獎，我喺旁邊睇到唔少同事竊笑，其中一位女同事2年前生小朋友要放產假，差啲就畀Angel搵咗個藉口辭退，仲有個男同事某次畀Angel噴到一面屁，原因竟然係佢撳住電梯門想等埋Angel……係咪匪夷所思？等我解釋下。
呢位男同事當日搭電梯落樓食lunch，見到Angel行緊出嚟，咁咪好心撳住開門掣等埋囉，點知Angel態度極傲慢咁向住佢講：「使鬼你hold住咩？落去啦！」我嗰陣都係電梯入面，親眼睇住㗎！
至於點解Angel要咁樣對人，呢樣就解釋唔到喇，未必有前因後果，事關Angel係一個情緒大起大落嘅人，例如個客令佢唔開心，佢就會發洩喺下屬身上，即係好似嗰啲工作上受咗氣嘅老豆，返屋企無啦啦鬧唔關事嘅老婆仔女咁樣，總之Angel份人就係喜怒無常。
佢攞最討厭同事銅獎，我見好多人都好開心，唯獨之前提過嘅Eric好失落，即係曾經反映過唔想同Angel共事，希望調去新加坡office嗰位assistant manager呢！Eric離遠向我做咗個口型：「銅？」Eric失落，係因為Angel竟然唔係金獎。
老細呢個時候出面緩和氣氛：「Angel，冇問題㗎，銅獎買幾打西餅慰勞班手足就得㗎喇，同埋我都想講下，拎咗最討厭同事獎嘅人唔好氣餒，遊戲嚟㗎啫，公司唔會因為你拎呢個獎而炒你，just for fun, ok？唔使咁介意嘅！」
我都用主持身份講兩句：「其實呢個獎都係我哋圍內同事選出，亦只有圍內同事知道，或者最討厭獎呢個名唔好聽，不過都係一個訊號等自己檢討下，每個人都有自己嘅優點同缺點，了解多啲始終係好事，之後請食飯又好，請下午茶又好，咪趁機會同大家修補下關係囉！」
Angel情緒冷靜返嘅時候，終於肯出去接受獎座喇，差啲唔記得講，我哋真係去咗嗰啲賣體育用品同穿羽毛球拍線嘅舖頭入咗幾個獎盃，人哋通常係用嚟頒學界獎項，估唔到我哋就買嚟頒最受歡迎同埋最討厭同事獎，笑死！
輪到最討厭銀獎得主，Michael！佢獲得8票，以一票險勝Angel奪銀，其實佢主要係衰咸濕同猴擒，畀佢煩過嘅女同事我數得出有邊幾個，如無意外，呢8票都係女同事投畀佢。
其他人應該對Michael冇咁大敵意，不過經歷完Angel一度唔肯攞獎嘅尷尬場面之後，Michael相對就瀟灑好多，佢衝前接過銀獎，講咗句：「多謝！希望下年唔使再拎呢個獎。」跟住就行開咗，呢下又唔錯喎，完美示範咩係錯就要認，打就企定。
好喇，輪到金獎，眾望所歸，閪佬Steve獨攬31票，大佬你雙位數呀！慚唔慚愧呀？
Steve嗰種討厭係同其他人有啲分別，呢條閪佬長期睇唔起人，之前講過啦，佢形容咩都要加個狗字，Sales狗、CS狗、會計狗，公司曾經有個印度女同事，但因為畀Steve投訴佢個身有浸咖哩味，個印度女同事覺得好唔開心所以辭職。
叫得閪佬，經典事跡又點會咁少，佢曾經叫一個中過肺炎嘅同事唔好再返工，話佢體內嘅毒素唔會散，唔好返公司播毒，而呢條閪佬後來自己中招，就猛咁話係茶水阿姐傳染佢，話人哋住公屋好多菌喎！
閪佬Steve嘅名句仲包括話一個男同事件衫好cheap，問人係咪著bossini，仲表示自己條底褲都貴過人哋全身，實不相瞞，我嗰票最討厭同事都係投畀佢。
呢條閪佬攞金獎都囂張過人，佢話：「我冇所謂呀！不招人妒是庸才，我係咁討厭㗎喇！」
Steve嘅言論嚇到老細都呆一呆，話咗啦，啲人全部係你嘅員工，平時對你嘅態度一定好，Steve 31票，Michael 8票，Angel 7票，你而家清楚晒啦！Sales嗰對孖寶Thomas同Yuki走得甩，最大原因係取消咗男女子組，同埋啲票畀Steve𠝹晒，不過算啦，公道自在人心，閪唔閪都自在人心嘅。
跟住就輪到最受歡迎同事獎，金、銀、銅依次為Renee、Vanessa、Bonnie，佢哋啲票數相當接近，而其實佢哋嘅性格同作風仲接近。
Renee、Vanessa、Bonnie三個人嘅共通點除咗係女仔之外，仲有一樣嘢好似，就係佢哋嗰種「哦，係，係係，你啱！」佢哋從來唔會同人爭論，寧願等你踩屎返嚟再同佢呻，亦唔會ban你啲嘢同埋話你唔得。
舉個例，如果當日老細係同Renee、Vanessa、Bonnie其中一個爭論Angel、Michael同Steve係好人，佢哋係一定會附和，唔會好似我咁樣講出實情。
可能你會問：「吓，咩都話好，咩都唔同你拗，咁都當選最受歡迎同事？搞錯呀？」
呢個世界有好多人肯講真話，但係呢個世界冇乜人肯聽真心話。
有啲人同你講嘢並唔係想問你意見，而係純粹想你聽，想你支持，想你畀佢呻，真朋友或者會想你分析利弊，不過大部分人只會想接收一啲啱聽嘅說話。
當然，最受歡迎同事金銀銅獎得主平時都係好nice，你未必會同佢哋深交，但絕對唔會憎佢哋，世界仔世界女去到邊都受歡迎㗎啦，特別係職場。
其實……喺最受歡迎同事同埋最討厭同事選舉裡面，我分別都有1票，唔知係邊個咁畀面投我做最受歡迎，亦唔知係邊個咁憎我投咗張最討厭，可能係Renee、Vanessa、Bonnie其中一個，亦可能係閪佬Steve、Angel、Thomas、Yuki，或者Michael。
想所有人都鍾意自己係好難，無論你做得幾好，點樣不問世事，睇你唔順眼嘅人一樣會憎你，呢個世界得一樣嘢係人人都鍾意，就係錢。
至於最討厭同事方面，道理都係一樣，只不過7票，8票，31票，好明顯就唔係偶然，一兩個人無緣無故憎你可能冇特別原因，但一大堆人同時間討厭你……咁真係要諗諗。
完咗之後，老細又走嚟搵我傾計：「你睇下頭先氣氛幾好！平時gathering都冇咁熱烈呀！呢個叱吒頒獎禮我決定一年一度舉行，下年增設最佳組合獎，即係最佳部門，我會加碼，為咗鼓勵teamwork，邊個department贏咗我就請佢哋去新加坡，包機票同酒店，順便去嗰邊office走轉，有限數啫，新加坡又唔係歐洲。」
我：「想問下最討厭同事獎仲係咪繼續搞？Angel頭先發晒癲喎！」
老細：「梗係搞啦！真情流露呀呢啲，頭先成個頒獎禮嘅高潮就係呢度，一定繼續！」
我：「咁如果最討厭同事冧莊呢？」
老細：「冇嘢㗎！討唔討厭係同事之間，作為老細都係睇佢做唔做到嘢，唔通我炒Steve咩！呢啲玩下㗎啫，記得將啲嘢mark返record，第日可以重溫吖嘛！仲有喎，如果Angel下年唔入三甲，咪即係代表佢進步咗，同事冇咁唔鍾意佢囉，推動力嚟㗎！」
Angel同Michael仲係咪最討厭同事就唔敢講，不過Steve就肯定冧莊，我估佢喺度做幾耐就冧幾耐，嗰啲咩三料視帝、三冠王、五連霸等等嘅字眼就聽過，如果Steve繼續喺呢間公司，而呢個叱吒職場頒獎禮又繼續搞，相信十連霸壟斷都不是夢。（完）
《叱吒職場頒獎典禮》第一二集連結喺晒度
👉🏻 1）老細搞最討厭同事選舉 保證匿名唔會秋後算帳
https://hkofficedaily.com/?p=23863
👉🏻 2）西同事變晒親善大使 老細仲要加生力軍金銀銅
https://hkofficedaily.com/?p=23878