叱吒頒獎禮 2 西同事變晒親善大使

無論係立法會選舉、美國選總統、選視帝視后,抑或係全民造星,各候選人正路都會積極拉票,但老細今次搞呢個叱吒職場頒獎典禮就相反,Angel、Michael、Steve……總之最仆街嗰幾個同事係周圍叫人唔好投票,又或者嗌人「投半張白票」,即係選最受歡迎員工好喇,最討厭同事嗰部分就留空唔填喎!

嚴禁轉載聲明:本網站所存在的一切知識產權,屬於我們所有,或已合法地特許給我們在本網站上使用。由適用法例所授予的一切權利,茲在此予以保留。除我們給予特許外,閣下不得以任何形式及方式,創立衍生作品、下載、翻印、複製,或節錄我們的故事內容放在其他網站圖利。

呢班最討厭同事嘅熱門得獎者亦都如願以償,因為頭幾日係完全冇同事夠膽行入老細房擺張選票落去個箱,話就話匿名,話就話一人一張吸咗公司印嘅紙完全唔使填名淨係圈number,咁但係老細會見到邊個入嚟,如果連隨拎嚟睇,身份咪一樣曝光。

呢次叱吒職場頒獎典禮選舉只係得7日時間畀大家投票,眼見已經過咗3日,個箱仲係一張選票都冇,老細開始心急喇,周圍問同事點解仲唔投票,得到嘅反應係「未諗好」、「過多幾日先」、「等埋其他同事投咗先」,似乎各人都擔心投完會有事。

與此同時,各路閪人亦紛紛做嘢,唔係拉票,係踢票……

Sales Team嘅Thomas最大動作:「各位辛苦晒,呢度有啲西餅,貴嘢嚟㗎!Pantry仲有生果撻,你哋鍾意食就去攞啦!」

我就唔收貨囉,佢之前買Apple Watch畀老細個仔喎,其他同事淨係有得瀨撻?

同屬Sales Team嘅Yuki都好揼本,去咗無印良品買一大堆零食,棉花糖、餅、魷魚絲、茶包,總之應有盡有,Sales人果然係實際啲。

Steve就好似變咗另一個人咁,佢好日唔過嚟人事部,一嚟就講咗啲令我好想作嘔嘅說話:「點呀你?近排做嘢辛唔辛苦呀?請人真係唔容易呀呵?」

過主啦!一直以嚟咪就係有你呢啲腌尖腥悶嘅department head,請人先至會咁麻煩囉!

出晒名猥瑣嘅Michael都唔再只係關心女同事喇,見佢會走去同啲男同事傾下計,而平時西口西面嘅Angel嗰幾日都冇發癩,好似變咗親善大使咁,唔知以為選緊友誼小姐,說到底都係唔想當選最討厭同事。

老細見到投票情況並唔踴躍,又同我商量對策:「係咪個賽制太單調呢?冇人入我房投票喎!唔通想睇定啲,等到最後一日先投,我係咪要再出封email強制叫大家交選票呢?唔係喇,不如再加啲我最喜愛的組合,或者我最討厭組合,另外又增設生力軍金銀銅喇,你覺得好唔好?」

我:「點樣組合呀?唔通公司有MIRROR、RubberBand,C AllStar同埋DEAR JANE呀?」

老細:「唔係咁嘅意思,好似Thomas同Yuki咁,佢兩個都係Sales Team㗎嘛,咁咪係一個組合囉!」

我:「唔好搞咁多嘢啦,愈搞愈複雜……」

老細:「咁生力軍要加喇啩,但凡入咗公司唔夠一年嘅同事都算係生力軍,又係分金銀銅,呢個直接啲,金獎加$1500蚊人工,銀獎加$1200,銅獎加$1000,如果嗰位生力軍係未過試用期嘅,即刻畀佢提早過埋,好唔好?正唔正?嘩!諗起都過癮!」

我:「坦白講,你叫得佢做生力軍,其他team嘅同事都唔熟呢位新人啦,點投呀?」

老細:「又有道理喎!不過而家反應真係唔熱烈喎,定係加個類似金針獎,好似終身成就獎嗰種呢,畀做得耐嘅員工。」

我:「金咩針呀又?金針雲耳蒸雞咩!都話唔使搞咁多嘢,你直接將個票箱擺嚟人事部呢邊就得㗎喇!大家應該係驚畀你點相啫!」

老細:「點會呀?咪講咗唔會秋後算帳囉!」

我:「你講就信咩!點知你會唔會趁同事投完就即刻拎出嚟睇呀!你擺個票箱過嚟啦,仲有4日時間咋!」

結果票箱擺過嚟人事部之後,第二日已經有12個人交咗,原因係……

Jessica:「呢度有12張,撈亂晒㗎喇,我哋兩組人集合埋一齊交,全部用晒同一隻色嘅原子筆圈個number,照計唔會知道邊個投邊個啩!」

我:「幾醒喎你哋,用人海戰術投票,不過其他人投邊個我就唔知,你就一定投Michael啦!」

Jessica聽完我咁講都笑咗出嚟,鬼咩,咪話之前Michael假公濟私想追Jessica,仲一度迫佢出trip製造異國獨處機會,今次Jessica冇理由唔投畀隻色狼呀?

Jessica:「一定投Michael,我揀佢做最受歡迎員工吖嘛!」

我:「實信你啦!總之放心,一定匿名,票係我點,老細都唔可以拎嚟睇,呀,不過…如果…假設…你係方便嘅,咪叫其他未投嘅同事,圈我做最受歡迎員工囉,我部iPhone都好舊喇,想換最新!」

嗱!投票就梗係要拉票啦!我想贏獎品㗎!

永遠都係有人打完頭陣,跟住就陸續有嚟,而且其他同事亦有樣學樣,用人海戰術投票,總之搵個代表收集10張8張一次過放落票箱,咁就穩陣啦!

由於「票站」搬咗嚟人事部,投票氣氛又變得熾熱,所以我亦順理成章被人搞……講得誇張咗,係畀嗰幾個最討厭同事熱門候選人煩啫,你又唔好話喎,佢哋真係有自知之明㗎喎!

Steve:「喂喂喂,點咗票未呀?你點定老細點呀?邊個領先呀?」

趕走咗Steve,又要應付Sales Team嘅Yuki:「我哋唔會係最討厭同事第一二位呀?男子組邊個最討厭呀?女子組呢?想問下如果最受歡迎有一票,最討厭又有一票,會互減定係照加上去㗎,我同Thomas互投對方做最受歡迎喎,應該有幫助呀?」

我:「都唔知你講乜,咩互減定照加上去啫?總之唔會互相抵銷啦!未點票㗎!當日即場揭曉,而家冇人可以睇票箱啲票,所以我都唔知個走勢㗎,公司得幾廿人之嘛,使唔使一早點票呀,到時幾分鐘就數完啦!」

其實我係講大話,由於老細心急想知個結果,而且同事們唔係直接寫名,每個人名都係跟一個number,例如Michael係14號,Angel係26號,我都驚亂,所以每日放工都會mark一mark數,邊個領先緊我係好清楚。

而家眼前有一個難題,就係最受歡迎同事嘅票率分佈比較散,本身呢個獎就夾硬開出嚟陪襯,點知就最煩,有3至4個同事係同一票數,隨時出現男金雙冠軍同女金雙冠軍,反而最討厭同事就好一面倒……

老細知道之後好緊張,我意思係佢好緊張個荷包。

老細:「咁唔掂喎,男又雙冠軍,女又雙冠軍,我咪要買4部iPhone?趁仲有少少時間,出個email改賽制喇,最受歡迎同埋最討厭都唔再分男女,總之撈埋一齊就咁分金、銀、銅,如果出現同得票,咁就由我做最終決定!」

真係麻Q煩!枉佢之前仲話加咩生力軍獎同埋金針雲耳蒸雞獎,而家選最受歡迎同埋最討厭都夠晒狼狽。

賽制朝令夕改之後,有啲同事就顯得好失望,因為最受歡迎嗰部分諗住有一男一女可以贏iPhone㗎嘛,點知而家得返一部,不過最大漣漪都仲係最討厭同事嗰邊,今次到Thomas嚟煩我喇。

Thomas:「既然改咗賽制,可唔可以填過?諗諗下你哋不記名㗎嘛,我投自己做最受歡迎都得啦,我填咗Yuki呀!」

我:「全人類交晒喇,都話不記名,點知邊張係你啫!冇得改呀!」

老細始終第一次搞呢啲選舉,有漏洞都好正常嘅,但係最乞人憎嗰班冇理由有份角逐最受歡迎員工獎,如果有人剔佢哋個名,基本上你都知係佢哋自己投自己啦!比盡你咪得一票囉!影響唔到大局。

說時遲那時快,終於嚟到宣判……終於嚟到頒獎當日喇,我真係諗唔到會有人發爛渣呀!有冇睇過網上一條舊片,係個女人發晒癲話「我要食魚翅」?條片十幾年前㗎喇,試下去search 「A woman missed her shark fin soup in Hong Kong 我要食魚翅呀」,你就會明白我講緊乜。

頒獎當日,有個同事以「我要食魚翅」條片嗰種情緒同口吻拒絕領獎,氣氛異常尷尬,最後要老細連番安撫先可以繼續進行,你估下係邊個令到場面咁大衝擊?(未完待續)

講開最討厭同事,我又諗起2021年呢段投稿:
阿姐:「我夠有月經啦,又唔見我好似你咁痛?」
https://hkofficedaily.com/?p=16832

error: