星期一心情例牌差，放完兩日假冇心機做嘢，又積埋咁多email，呢個時候老細仲要走嚟煩我：「Wendy你上次係咪話有間獵頭公司好熟？嗌佢哋搵定個Assistant Manager吖，最理想係下個月返工，你自己唔好出招聘廣告喎！」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我：「Assistant Manager？Eric唔做咩？遞咗信畀你？」
老細：「未遞信，不過頭先Eric又走嚟同我投訴佢阿姐，仲話想申請調去我哋新加坡個office，痴線！新加坡office邊有位呀？成日聽到Eric投訴真係好煩，睇個勢佢好快唔做，咁不如我郁手先，早啲搵個人返嚟代。」
我：「不過Eric幾做得嘢㗎喎！反而係佢阿姐Angel……」
老細：「Angel做咩？講嚟聽下！」
我：「Angel就不嬲難頂嘅，你唔覺佢條team流失率最高咩？Eric頂到咁耐已經好犀利，我平時聽到Angel成日pua班下屬，講啲說話勁難聽，唔好話佢啲下屬啦，我呢個做HR都畀佢pua過！」
老細：「咩係pua？」
我：「咪即係施壓囉，成日講啲嘢打擊員工自信，無論你做咩都會話你，咁啲人就會慢慢否定自己嘅價值，佢上次先話我請人好慢，揀CV又唔準，話我呢啲HR去到第二間公司唔會有人請，講嘢勁衰格！」
老細：「Angel喎！佢點會咁呀！次次搵Angel傾嘢都好有耐性，我仲話佢唔使下下咁有禮貌，搞到我都唔好意思。」
我：「喂，你係老細吖嘛，對住你又點同對住佢班下屬呀？我對住你都客氣啲啦！平時我同啲同事講粗口添，對住你嗰陣我梗係會收斂啦！」
老細：「冇可能，我就覺得係Eric嘅問題多啲，嘩！你聽唔到咋，頭先佢用詞幾強硬呀！好似想叫我炒咗Angel咁，不斷抹黑，就算Angel對佢唔好，應該都係Eric迫成佢咁。」
我：「咁我又想問下你，你認為Michael份人點吖？好唔好？」
老細：「Michael梗係好啦，做嘢又有交帶，佢根本就係好好先生。」
我：「你知唔知Michael喺office都出晒名犯眾憎，最hea就係佢，全部嘢交晒畀下面班人做，然後佢自己拎嚟領功，之前仲假公濟私想追Jessica，出trip想淨係同Jessica去，又問Admin可唔可以淨係book一間房，呢條友仆街嚟㗎！」
老細：「你啲風好似調轉嚟收喎！首先同Jessica出trip單嘢我未聽過，Michael話佢想帶阿Ray去杜拜吖嘛，仲話兩個人可以book一間房，因為想幫公司慳錢。」
我：「你叫佢收皮啦！係Jessica堅持唔去，最後話護照過期拎唔切先甩到身，跟住阿Ray以為有得頂上，好興奮咁話終於有機會出trip，結果Michael唔想同個男下屬去，改咗叫個客開online meeting，總之一句講晒，因為你係老細，人人對住你嘅嘴臉都係特別唔同啫！」
老細：「你真係當我流㗎喎，睇人我最叻，咁你講吖，呢個office裡面仲有邊個同事喺大家心目中係差？」
我：「嗱！你叫我講㗎咋，Sales Team兩個manager都唔係好人，Thomas同Yuki，以為自己幫公司簽到單就高高在上，兜口兜面路過都唔打招呼㗎，扮見你唔到，使唔使咁呀？明星都冇佢哋咁寸！」
老細：「咪噏得就噏啦你！Thomas暖男嚟㗎！我之前提過個仔想買Apple Watch，佢第二日竟然買咗隻返嚟，話當係升學禮物送畀我個仔，Yuki仲sweet，買嗰啲咩經痛暖水袋都買多個畀我老婆。」
又Apple Watch又暖水袋，擦鞋都好大手筆喎，對住我哋其他同事就不可一世，Sales果然係Sales！所以老細仍然唔相信我講嘅嘢。
我：「Ok，咁Steve你應該有聽聞喇啩！當茶水阿姐好似工人咁喝、寸同事個飯盒又臭又冇餸、話同事啲衫好cheap似足10蚊大陸貨，仲有，Steve形容咩都要加個狗字，佢講樓下保安會同我哋講保安狗，講起Sales會嗌Sales狗，連CS佢都會嗌人做CS狗。」
老細：「點會咁叫人呀？唔驚畀人打？」
我：「唔係當面，佢係背後講人時會加個狗字，我估呢條閪佬平時都會同人講我係HR狗。」
老細：「你又話對住我嗰陣唔會講粗口嘅？」
我：「唔係呀，閪佬係全公司同事之後幫佢起嘅名，即係綽號呀，大家講起佢嘅時候唔想講全名，咪用閪佬囉！好似美斯咁，你講球王就諗起美斯，唔需要講全名。」
老細：「總之你講嗰啲我就全部都唔覺，調轉問返你吖，你覺得Eric點吖？Vanessa呢？仲有Bonnie、Renee、Jack，我就認為呢幾個最乞人憎，完全未見過佢哋有笑容，行親過去淨係見到佢哋黑口黑面。」
我：「你講呢幾個同事係最好㗎喎，日日OT又經常幫同事執手尾，唔通仲笑住做咩！佢哋係最做得嘢，又最抵得諗嘅同事，你可以話佢哋唔識做人，但唔可以話佢哋乞人憎囉！」
老細：「咁樣拗落去冇意思，一係咁，你知唔知坊間有個金酸莓獎，係專頒畀啲爛片，我哋公司都搞個最討厭同事選舉，一人一票，揀出每個人心目中最討厭嘅同事，到時咪公正囉，唔係我哋兩個口同鼻拗。」
我：「你個動機同埋個名咁負面……」
老細：「哦，你驚負面，簡單啦！我哋美其名搞個最受歡迎員工選舉，同時間選埋最討厭同事，咁樣包裝得喇啩！」
我：「聽落好興奮，老細你認真㗎？」
老細：「梗係認真啦！但有個條款，就係唔揀得老細，因為我係主辦方吖嘛，無論選我做最受歡迎定係最討厭都唔公正啦，係咪先？」
我：「你係咪驚自己成為最討厭第一名咋……不過咁，數最討厭就應該排隊都未輪到你當選嘅！」
老細：「即係你都贊成啦！拍板！呢個投票活動就叫叱吒頒獎典禮，你覺得使唔使好似商台咁分男女子組呀？定係夾埋一齊選？」
我：「點樣選係一回事，但唔係抄人個名啦！」
老細：「咩抄啫？人哋商台嗰個係叱吒樂壇頒獎典禮，咁我哋一係叫叱吒職場頒獎典禮囉！獎品我都諗埋，如果當選最受歡迎同事金、銀、銅獎，依次序送最新iPhone、iPad，同埋Apple Watch，我就睇下你口中嘅好同事Eric、Vanessa、Bonnie、Renee，仲有Jack係咪順利當選。」
我：「弱弱一問，如果當選最討厭同事金、銀、銅獎呢？又送iPhone呀？」
老細：「最討厭就梗係要罰啦，金獎就請大家lunch飲茶，銀獎就下午茶，銅獎就買幾打西餅慰勞同事啦！」
可能我自知唔係最受歡迎，亦唔會成為最討厭，所以嗰種隔山觀虎鬥，又有份投票兼食花生嘅心情，真係既刺激又興奮！
我：「都係唔work，講真吖，隨時得罪人，班細嘅點會敢投票呀？你估唔驚秋後算帳呀？」
老細：「匿名咪得囉！咁樣身份夠晒保密啦！」
我：「匿名？你講呀？你出個email叫同事投票，IT已經知道晒邊個投邊個啦？定係寫紙仔？好似香港去票站投議員咁呀？」
老細：「我哋先幫所有同事安排一個number，例如Angel係13號，邊個同事係邊個number就用email發放畀大家，然後每人派一個信封，信封裡面有張紙，吸埋公司個長印，呢個印得我、Admin同埋會計有㗎啫，同事淨係圈，不記名，我哋唔需要知邊個投畀邊個，然後個票箱擺我間房，咁得喇啩！」
最初以為老細是但噏，點知佢嚟真，轉個頭已經出咗封email公告天下，跟住再打內線叫我兩日內編好各同事嘅number，完成之後就正式畀表格全公司嘅人填，仲強調個選舉唔可以加埋佢，老細話自己係評審有利益衝突喎！妖！
而最搞笑係我連同事嘅number代號都未編，Sales Team嗰兩位manager Thomas同Yuki已經聞風而至。
Thomas：「喂，老細搞咩呀？咩叱吒職場頒獎典禮呀？咩嚟㗎？佢話詳情可以搵你查詢喎！」
Yuki：「點樣最討厭同事選舉呀？仲要男女分別有金銀銅？呢間office男多女少㗎喎！咁咪好唔公平囉，女仔好易會選中喎！」
CLS！男多女少都好啦，女同事少極都有廿幾個，而家分金銀銅即係得3個人會「攞獎」，Yuki究竟有幾驚自己當選呀！
我：「你哋定啲嚟先！點解淨係focus喺個最討厭同事選舉上面呢？我哋主要係想選出最受歡迎同事啫，嗱！你話女同事少，攞獎機會高吖嘛，咁即係你都可能攞最受歡迎女同事獎啦！隨時係金獎添！」
都未解決眼前兩個西人，第三個西人又殺到，佢就係綽號閪佬嘅Steve，只見佢怒氣沖沖咁行埋嚟，招呼都唔打就話：「搞啲咁㗎嘢呀？咩叱吒咩職場，咩嚟㗎？我部iPhone已經係最新啦，唔好加我個名落去得唔得呀？」
閪佬唔會以為自己係最受歡迎同事嘅熱門得獎者呀？（未完待續）
叱吒樂壇……呀唔係，叱吒職場頒獎典禮嘅故事明天待續，但如果呢間公司有個秘密網畀同事暢所欲言，老細睇人會唔會清楚啲呢？以下呢篇延伸閱讀舊文章，你有冇印象？
同事有個秘密網 爆料是非乜都講
https://hkofficedaily.com/?p=20513