成班同事去餐廳食晏，其中一個叫咗杯cappuccino，侍應拎嚟嘅時候附上一支飲筒，然後個同事就話唔使，侍應表示cappuccino上面有cream，再確認需唔需要呢支飲筒搞勻，個同事都係話唔需要，原因係佢自備咗餐具，包括搞勻飲品嘅匙羹。
與此同時，另一位出名多口嘅男同事Mario就加把嘴同個侍應講：「唔使㗎喇，佢係海龜L嚟㗎！」侍應諗咗幾秒，好快就get到，但係場面就有啲尷尬囉！Mario仲要發表偉論：「其實我真係唔明，海龜個鼻插住支飲筒關我咩事？我丟落去㗎？我做足本份丟落垃圾筒啦！」
畀佢寸嘅嗰位同事就顯得有啲委屈：「環保啫！唔係咁都有錯呀？」
Mario：「環咩保啫！你同你條女搞嘢係咪唔用套先？其實人類生存就已經唔環保啦！你哋啲海龜L集體隊冧自己咪最環保囉，又冇guts，成日搞啲飲筒餐具，打唔到大佬就打啲嘍囉！」
Feel唔feel到Mario嗰種憤世嫉俗同埋對環保人士嘅怨氣呀？不過當住侍應面話個同事係海龜L又真係好唔畀面嘅。
不過Mario幫同事改花名都唔係第一次㗎喇，仲影響埋我添，因為我哋有個40歲左右嘅女同事有少少哨牙，加上曲髮同埋紮辮，Mario幫人改咗個花名叫「細哨」（編按：香港好多球迷會稱呼巴西球星朗拿甸奴做細哨），佢話男仔個樣似朗拿甸奴已經好濕滯，而家仲要係個女人似朗拿甸奴，成日喺背後笑人。
由於Mario每次提起呢個女同事都唔會講英文名，永遠都係細哨細哨咁叫，日日係咁聽之下，結果有次我同老細講嘢都講錯名：「呢份嘢搞掂㗎喇，一陣我會畀細哨……」講完我已經知仆街，即刻更正返同事個英文名，老細就望一望我，然後笑一笑，不幸中之大幸嘅係，我從來冇喺嗰位女同事面前講錯。
通常大家見到人哋嘅髮型係地中海，唔熟嘅就會地中海地中海咁叫人，我亦聽過有人會叫施丹，不過Mario就稱呼我哋公司一位地中海男同事為「太陽蛋」，佢話：「你唔覺得好似㗎咩？佢地中海得嚟又好多白頭髮，中間吉咗就係肉色，包圍住咪太陽蛋咁囉！一陣食飯叫常餐嗌太陽蛋先，見親佢個頭殼頂都好肚餓。」
Mario用人哋身體缺陷改花名都唔係第一次，隔籬team有個女同事身型係比較大件頭，你知有啲人係天生骨架問題，人哋都唔想㗎嘛！但係Mario就開口埋口嗌人做坦克車，咁當然都係背後叫啦，可能佢同嗰位女同事唔熟，所以冇好似海龜L咁樣直接叫人。
佢又會叫一個眼睛比較細嘅同事做「矇豬西」，個西係粗口音，呢樣我都出口話過Mario幾次。
我：「好心你唔好亂幫人改名，仲要加個粗口啦！阿Ben係男人，都冇西，你叫人做矇豬西做咩啫！」
「矇豬L唔啱音吖嘛，你唔覺得矇豬西順口好多咩？」
唔係呢個問題呀，係你長期亂咁幫人改花名好冇禮貌，通常呢啲咁小朋友嘅事只會發生喺學生時代，出咗嚟做嘢之後已經係大人啦！同埋你笑人哋嘅缺陷同短處做咩呢？你估人哋想眼細㗎咩！
數到最過份嘅花名應該係「肉便所」，有冇人唔知道肉便所嘅意思呢？有個難聽啲嘅講法係「公廁」，即係人人都入得……
呢個名係源於公司有個女仔先後同咗幾個男同事拍拖，而且遍及幾個部門，包括2個Sales Team、IT部、物流部、倉務部，另外仲有一個高層，咁講真係誇張咗啲，始終呢個女仔喺度做咗兩年都唔夠，話咁快就換咗6, 7條仔，但係講到尾都係人哋嘅事，冇影響到自己咪得囉，所以Mario叫人做「肉便所」真係幾侮辱性，如果個女仔聽到一定好難受，話晒一場同事，何必講嘢咁難聽呢！
大家身邊又有冇呢啲亂咁幫人起花名嘅朋友或者同事呢？硬係覺得遲早會出事，因為海龜L單嘢個同事已經嬲嬲地，好明顯係介意，最驚佢影響埋我，好似細哨個名咁，聽得太多自己都潛移默化唔小心嗌咗出嚟，不過把口生喺Mario度，我都控制唔到佢。
日本同事初登場
https://youtu.be/VEE5IIQn_gk
