想講一件好尷尬嘅事，啱啱呢個星期日同家中兩老出屯市飲茶，拎完飛等緊嘅時候，我見到老細同一個女人，仲有一個後生仔都企喺附近，如無意外應該係佢老婆同個仔，因為對望咗一眼，互相發現大家，基於禮貌又咁近距離，點都要行埋去打招呼同傾兩句：「Hello張生，等位飲茶呀？」
其實一直都知我老細住屯門，但就冇遇過，呢次係第一次，我老豆老母八卦走埋嚟問呢位係邊個？介紹完係老細，老豆就嚟料喇：「哦，張生，久仰大名，你又係住屯門㗎？好有緣喎！我哋住山景邨，你住邊頭呀？」咩久仰呀？我平時都冇提老細，真係稱得上係久仰大名咩？住邊又關你咩事？
老細都有少少hea佢，點會想同員工個老豆透露咁多私人嘢吖：「我住V City嗰頭。」
老豆：「V City好吖！瓏門呀？好貴㗎喎！對住條河嗰邊聽講有少少臭，好唔好住呀？」
老細：「還好啦！」與此同時，老細個老婆同個仔係冇理我哋，佢兩個都係自顧自撳電話。
老豆：「多謝你請我個女，記得喺公司射住佢喎！」
射乜嘢呀？咩年代呀？用字好肉酸呀！我已經拉一拉老豆衫袖，笑住話咪講呢啲嘢啦！點知老豆仲烚熟狗頭要同我老細握手，唔使咁樣㗎喎！以為就咁完啦，跟手我老母就接力。
老母：「張生個仔一表人才喎！一定好似爸爸咁叻，今年幾大呀？」
老細個仔繼續撳電話，結果老細代答：「佢15歲喇。」
老母：「嘩，15歲就咁高呀？仲有得高喎！將來一定高大威猛，我個女冇你個仔咁叻呀，佢咩都唔識㗎，你唔好介意，所以我哋成日都同個女講，人工多少唔緊要㗎，學到嘢先至最有用，張生你幫我哋教下佢吖，學下啲做人處事咁樣，佢跟住你做嘢真係好幸運。」
咁唔掂喎！我求其講句唔好阻住人就拉走兩老，笠高帽唔係唔得，但唔好噏得就噏，你點知佢個仔叻呀？人工多少又點會唔緊要？你點知老細做人處事係點呢？打工係雙向，公司出糧畀我，我都有做嘢，有需要擺到自己咁低？
最初我老母唔肯行開㗎，佢問老細張飛幾多號，見到個number後過我哋，又係3個人，係咁話要換飛，想畀老細佢哋入先，明白咁樣做嘅出發點係想幫我喺老細面前加分，但真係太矮化喇，無形中製造咗強烈嘅階級觀念，唔知你哋明唔明白呢種感受？
老細拒絕換飛，我同兩老亦先行入座，慶幸後來老細張枱同我哋隔咗一段距離。
以為大家唔係坐得近就可以安安樂樂飲茶啦，點知我老豆話去廁所，原來走咗去老細張枱，我見老豆咁耐未返已經有啲奇怪㗎喇，望一望果然見到佢企喺老細前面，一百個唔情願都冇辦法，即刻衝過去拉返老豆過嚟。
行到去仲騎哩，我老豆同老細喺度搶緊張單……
老豆：「唔使客氣㗎！大家街坊街里，又咁有緣，你個個月出糧畀我個女，點都要多謝你，呢餐唔好同我爭啦！」
老細：「真係唔使喇，我哋都未食完，仲有好多嘢未叫，未埋單住。」
老豆：「唔怕㗎，我埋咗呢轉先囉！」
我喺側邊極力勸阻，話老細遲過我哋入座，有排未食完，你咁樣即係迫人哋埋單走，咁咪仲唔好意思！擾攘完一輪，老豆終於知難而退，強調下，老細個老婆同個仔都係繼續撳電話，我唔知呢個係佢哋一家嘅相處方式，定係唔想睬我老豆先至搵其他焦點。
我覺得好瘀，好失禮呀！離開酒樓嗰陣同兩老解釋，叫佢哋唔好咁樣做，大家都尷尬，又講到我好差，咩射住咩人工唔緊要，呢啲恭維說話真係too much喇！
然後老豆仲要發脾氣：「你呢啲咪唔識做人囉！佢話唔使埋單係客氣，你頭先做咩撳住我？一百幾十你老豆畀唔起咩？」
我做嘢，公司出糧，係一個公平嘅交易，冇話邊個欠邊個，但係兩老講極唔明，我都唔想嘈喇，之後去返山景附近啲屋邨酒樓飲茶就算，好驚再出現呢種場合。