「Vivian，我想你返嚟做，人工一定多過之前，唔使試用期㗎喇，對你有信心！覆返我吖！」
以上voice message係由前任女上司send畀我，反覆聽咗幾次，有冇留意到第一句係「我想你返嚟做」，主語係佢自己，成段錄音冇問我意願。
我同呢位前任女上司冇交惡，自己性格並唔鍾意同人爭吵結怨，因為衝動過後會有一大堆手尾跟，或者係呢個原因，所以佢先至會叫我返去做，而其實前任女上司半年前已經嗌過我回巢，但我畀佢嘅答案都係一樣：「唔喇，要湊小朋友，暫時冇呢個打算。」
當年我搞結婚，前任女上司咁樣問過：「公司呢段時間打仗喎！你可唔可以遲啲先結呀？」
我冇因為工作而推遲婚期，婚禮當日將部電話畀姊妹保管，夜晚拎返見到有十幾個missed call，仲有好幾個WhatsApp msg講公事。
嗰陣冇走係因為有project跟緊，留低係為咗自己嘅 reputation，唔想辜負client對我嘅信任。
婚後冇幾耐，呢位前任女上司又同我講：「嗱！你嚟緊唔好生仔呀！話就話咩前四後六咋，我真係放唔到畀你㗎！」
雖然佢單身，但我唔明點解大家都係女人，而且只係上司同下屬嘅關係，佢竟然好意思叫我遲啲結婚同埋唔好生仔。
完咗個project之後，我亦選擇辭職離開，從其他舊同事口中得知，前任女上司後來請過幾個人代我，一係做唔掂，一係做唔長，所以佢最近搵我返去並唔意外，意外嘅只係佢認為我仲想返去。