幾個月前已經覺得好奇怪㗎喇，有個同事放工一齊走，因為我有嘢買，要行去觀塘廣場嗰邊，個同事忽然問咗我一句：「咦！你唔係住嘉田苑咩？巴士站喺創紀對出喎！」我答完佢唔係直接返屋企之後，先至醒起自己冇喺大家面前提過住嘉田苑，唔通曾經講過但係唔記得？
又有一次，佢哋成班講緊韓劇，有個同事咁樣問我：「喂，韓文係咪好似日文咁樣分N幾N幾㗎？你讀到幾多級？如果韓劇唔睇字幕你聽唔聽得明？」嗱！呢個就更加奇怪，我讀韓文已經係咸豐年前嘅事，肯定冇同任何人講過，點解呢位同事會知道呢？
直至上個星期我終於知道答案，因為部門要請人，Department Head叫晒我哋全部人入房，初時以為開會，點知唔係，佢喺file度拎咗7至8份resume出嚟傳閱，大家輪流睇，你睇完手上呢份，就同隔籬交換，原來佢叫我哋畀意見幫手揀人。
嗰一刻我都仲覺得幾好吖，自己部門請人，個個都可以有say，但過程又唔係我想像中咁樣。
同事A：「你睇條女張相，唔掂喎！公司已經多恐龍，再請件豬扒返嚟真係影響市容，我估張相P咗啦，P咗都咁樣衰？」
同事B：「你嗰份有相咪算好囉！我呢個冇相嘅，冇相唔請啦！」
同事C：「嘩嘩嘩！呢個犀利呀，住貝沙灣，屋企肯定好有錢，張曦雯都住貝沙灣㗎！」
同事D：「呢個痴線，以前係排球校隊都寫落resume，邊個想知呀？你打排球叻對份工有咩幫助先？寫出嚟都係想show off啫！使唔使讚佢好勁呀？」
同事E：「我呢個之前做過10份工都有，啲公司牌頭係間間都勁呀，不過間間都做好短時間，都唔知係咪畀人炒。」
同事F：「癲！1968年出世好心咪鬼send CV嚟啦，老到甩牙，佢真係做得我老母喎，會唔會多咗個媽媽喺公司㗎！」
我：「想問下呢……之前我send CV嚟見工，你哋係咪都會咁樣圍埋討論㗎？你哋全部睇過晒我份履歷？」
跟住班同事就齊聲答係，原來個個都有份睇，唔怪得我冇講都知道我住嘉田苑，唔怪得我冇提都知我讀過韓文，但係呢個房裡面冇人係HR，Department head收到HR揀完嘅履歷當然有權睇同埋有權約人啦，不過真係有需要同其他人分享咩？呢間房裡面有同事嘅職位仲低級過我，我冇諗過自己嘅基本個人資料、學歷背景、工作經驗，仲有興趣同埋專長等等嘅嘢要赤裸地呈現晒畀咁多人知。
然後仲有同事好得戚咁同我講：「你真係要多謝我呀，我當日有份提議in你㗎！咁樣先好呀，你請個人返嚟都要同我哋夾，我哋睇過唔順眼咪唔好見囉！」
Department head：「你班友仔！叫你哋睇啲工作經驗match唔match，一個二個就睇人有冇相，第日嗌啲candidate寫埋三圍數字好冇呀？」然後成班人又喺房哈哈大笑。
可能每個人嘅價值觀同尺度都唔同啦，大家有份揀新同事係開明同開心事？但係私隱問題呢？就當你入職咗一間公司，你都未必想成個部門嘅人睇晒你份履歷啦，仲要對你嘅居住地點同樣貌評頭品足。
最終佢哋傾完笑完都冇決定，非常無聊咁就散會，然後第二日Department head又收到HR畀佢嘅幾份新resume，又叫大家入房研究，仲話今次全部都係女，全部有相。
我個人比較反感呢種行為，所以藉詞話趕住出個email冇入房參與討論，我唔肯定HR係咪知道求職者嘅履歷會被攤開討論，重點係由唔關事嘅人參與比意見同埋開放睇晒啲資料。
或者有人會覺得Department head好貼地，識得同下屬打成一片，但佢似乎忽略咗私隱同埋操守問題喇！