凌晨4:00，我印象好深刻，一連串msg聲唔係將我嘈醒，而係整醒咗我老婆，係佢拍醒我同埋要我將個電話較返靜音，朦朦朧朧之間睇下邊個三更半夜咁大整蠱，估唔到呢堆msg係一張又一張嘅床照，男女主角仲要係我同事，即刻醒晒啦！
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我：「嘩！咩料？」
老婆：「咩人咁煩呀！你唔識較靜音㗎咩！你就嘈唔醒啫，我瞓唔到呀！」老婆一路鬧又一路移埋嚟睇，初時佢係咁反應：「你啲咩朋友呀？夜媽媽send鹹相，痴線，變態㗎你哋？」
我：「唔係朋友呀，公司兩個group都分別send咗同一批相出嚟，仲有片，男嘅係一位AM（Assistant Manager），女嘅就係隔籬組一個普通職員，震撼過出面啲鹹相鹹片好多，畢竟兩個人都係我識得嘅同事，但係點解會咁嘅，我大佬自己send出嚟？係咪搞完嘢想send返畀女同事，唔覺意send咗去公司group呀？」
與此同時，同事們各自嘅私人WhatsApp都開始交流同埋討論喇，凌晨4點幾大家講到5點都未完，咁精神點瞓呀？
除咗閃卡同埋片，仲有一段文字：
「我，XXX（人哋中文全名我無謂打出嚟），同Myra係炮友關係，我哋都已婚，一個有婦之夫，一個有夫之婦，認住我哋，分享畀大家睇！」
見到呢句其實已經明晒，一係個AM畀Myra老公用把刀指住，一係就AM畀佢老婆用把刀指住，本質冇分別。
而最奇怪嘅係，啲相同埋片由AM個WhatsApp send出去啲group之後，直至我5點幾再瞓返嘅時候都未「刪除訊息」，因為錯手又好咩都好啦，如果你即刻刪除仲可能有一線生機，例如唔係個個都set咗WhatsApp group收到嘅相會自動下載，嗰位女同事亦都冇任何回應。
好多同事喺凌晨4點至5點嗰段時間已經save低晒啲閃卡，相信全公司大部分人都有，唯一慶幸呢兩個group都冇老細喺裡面，不過……分別已經唔大啦！老細最終一定會知道件事，大把人爭住通風報信食花生。
第二日返工，個AM同埋Myra都不知所蹤，然後下晝就傳出個女仔辭職唔做嘅消息。
其實AM同個Myra有嘢就明眼人都知，因為佢兩個都唔同部門，但就成日出雙入對，會一齊返工，一齊食lunch，仲有人喺後樓梯見過佢兩個攬住，只係公司呢啲地方發生咁嘅事，none of my business就無謂理人啦！唔通化身社工去勸佢哋唔好搞婚外情咩，同埋之前都係傳嚟傳去，又冇實質證據，而家有晒床照同自拍片，有晒答案啦！
個AM本身冇晒消息，然後有同事話擔心佢係咪有咩不測，不過公司知情人士就爆咗出嚟，成件事係個AM嘅老婆半夜偷睇佢手提電話，搵晒啲罪證再send出去公司group一鑊熟，聽講係AM向佢上司承認，跟住HR又知，老細個秘書又知，其實公司邊有秘密吖，特別係衰嘢，傳播速度永遠係最快。
消息仲話，AM其實冇諗過resign，但老細就落order叫佢自己遞信，好來好去無謂搞到件事咁尷尬。
雖然上述唔少資訊都係聽返嚟，唔係第一身知道，例如AM老婆摷到閃卡半夜投放震撼彈，仲有AM係畀老細迫走，不過通通都唔重要喇，因為佢同Myra嘅婚外情已經係千真萬確，得啲相都仲可以撐係移花接木，有幾條愛情動作片唔通人哋玩deepfake咩？時間同金錢成本都好高㗎，佢兩個又唔係明星，仲要由AM個WhatsApp send出嚟。
聞說唔少男同事見證呢單嘢之後都有陰影，即刻檢查下自己部電話有冇唔見得光嘅嘢，仲有醒瞓咗好多……
有女同事就好同情Myra，始終呢啲不雅照同埋影片都唔馨香，仲要全公司睇晒，驚佢如果睇唔開會做傻事，但亦有女同事覺得係抵死，既然勾人老公在先，就有心理準備件事會失控，有機會承受惡果。
By the way, 個AM嘅老婆都幾兇狠。（完）
【日本職場】從華強北到東京打工 遭拖糧再被老闆粗口問候｜冇得轉工 唔忍就要返中國：「3年內只有一個月準時出糧，全年3日大假」
https://youtu.be/fr3OxV-1RCs