有次出差廣州3日2夜，我、老細，仲有兩個女同事都有份去，好記得係住花園酒店，第一晚老細同班廠佬去飲酒，有個女同事因為本身喺廣州出世，所以佢做完嘢都去搵啲當地朋友聚舊，換言之當晚就淨返我同埋另一位女同事，我哋兩個亦順理成章去咗食飯周圍行。
呢位女同事（下稱V小姐）對於大陸嘅一切都感到不安，行街又話驚人搶嘢，去出面啲廁所又話驚畀人迷暈割器官，所以佢第一晚同我出去時已經貼到好近，有時仲捉住我手臂行，唔知以為係情侶，其實我同V小姐做同事都做咗幾年，關係正常到不得了，但經過完嗰晚之後就變晒。
起初V小姐食完飯係唔肯返酒店，佢話驚鬼喎！當時都夜晚十點幾，飯又食完，嘢又飲完，所以都要返去各自休息，好衰唔衰V小姐同房個女同事打嚟，話呢晚唔返嚟瞓，因為太耐冇見啲廣州friend要傾通宵。
嗰位女同事話第二朝先會返酒店join大家食早餐同埋去做嘢，結果V小姐聽完佢電話唔畀我走，一定要我留喺佢間房。開頭V小姐話驚，淨係叫我留到佢沖完涼，點知沖完出嚟大家喺度傾計，愈傾就愈夜，講下講下仲變咗分享心事。
爭啲唔記得交代，V小姐結咗婚，而我都係已婚，V小姐由講佢兩公婆之間嘅感情事變咗講性事，佢話自己婚後兩年已經同老公分房瞓，所以近呢幾年基本上半年先會搞嘢一次。
無獨有偶，雖然我同老婆並冇分房，但搞嘢嘅密度都差唔多，冇得解，可能真係結婚耐咗，冇以前咁多情趣嘢，然後V小姐話我老婆同佢老公應該要係一pair，因為佢哋都唔需要搞嘢，我笑一笑附和，跟住就好自然咁同V小姐kiss，當晚我哋冇飲酒，完全唔係咩酒後亂性，可能大家人在異鄉，心理上比起喺香港放鬆，加上我同V小姐太耐冇同自己嘅另一半做，俗啲講句，大家都餓咗好耐。
係衝動，但亦好冷靜，一來冇飲酒，二來kiss完之後，V小姐仲識得叫我沖完涼先可以做，其實沖完都未做㗎，我仲特登著返衫落樓買套，所以當晚絕對係有共識咁做。
大約清晨5點離開佢間房，因為V小姐唔肯定同房個女同事會唔會提早返，講起都好笑，初時V小姐又話驚鬼，搞完嘢5點個天都未光，V小姐又好似唔再驚鬼叫我走。我去返自己房之後，老細已經返咗嚟瞓到不醒人事，所以老細係唔知我幾點返，第二日亦都冇特別問。
重點係經過呢一次，我同V小姐嘅關係亦正式變成SP，返到香港成日會放工出街，有時會直接去時鐘酒店，有時亦會純粹就咁食餐飯。
呢種曖昧SP關係維持咗一段時間，坦白講我幾享受，互相明白對方已婚，大家唔使扮嘢做自己，各取所需。
不過近幾個月情況又搞到好複雜，唔知點解V小姐愈嚟愈多嘢介意，就連我喺office同其他女同事講嘢，V小姐都會即刻send WhatsApp嚟話呷醋，仲有，而家V小姐又會無啦啦夜晚msg我，喺度講埋啲：「你唔准掂你老婆呀！你係我㗎！」
V小姐以前唔會咁㗎！我覺得佢好似想由SP變做正印。
大約兩個星期前，V小姐失驚無神夜晚send張性感自拍嚟，佢話買咗情趣內衣要過兩日著畀我睇，其實我老婆當時坐隔籬睇緊電視，所以我真係嬲嬲地，第二日叫佢唔好再夜晚send msg嚟，跟住V小姐就好激動同我嘈交，直至我講咗呢番說話：「你係咪唔記得自己都有老公㗎？」
V小姐聽完之後終於靜返落嚟，我覺得雙方嘅關係變咗質，本身SP好地地，而家佢要求多多，唔係講緊金錢，佢從來冇要求我買嘢，就係咁樣先驚，佢畀我感覺好似想各自離婚，然後正式喺埋一齊。
我喺呢間公司做咗好多年，已經唔係「散仔」喇，V小姐亦一樣，大家冇可能因為呢種感情事就辭職唔見，始終我40，佢都36，真係唔後生，出面個市又唔多好，理論上冇咩事都會繼續留喺度做，但而家先話後悔（當初做SP）係冇意思，我相信V小姐喺過程中一樣係開心同滿足，唔明佢點解唔可以安於現狀，一齊做嘢，放工搞嘢，然後各不干涉彼此生活，咁唔係好好咩？
你哋鬧我唔緊要，我同V小姐都係解決生理需要啫，香港職場大把同事有呢種關係，我只係想聽下意見，究竟應該氹返V小姐，繼續過往嘅SP關係，定係借今次斬纜呢？因為我驚斬纜斬得唔好，大家變咗仇人啫！