「Happy New Year! 你同老細講咗新年快樂未？」1月1號，我send WhatsApp畀舊同事Helen，最主要係提佢同老細講Happy New Year，因為我唔想呢個小妹妹過唔到試用期，點知佢真係未講，我再補充多句：「咁你嗱嗱臨send msg畀佢啦，而家11點幾，仲有一個鐘就2號喇！」
我唔係擦鞋精，亦唔係要「導」舊同事做擦鞋一族，只係我親眼見過有人忘記同老細講Happy New Year，最終過唔到試用期，仲有個同事冇同老細講生日快樂，結果人工加得$300，而頂我個位嘅Helen其實乖巧聰明，真心希望呢位小妹妹可以平安過渡，所以我先提醒佢。
呢位舊老細係一個怪人，亦都好小器，跟咗佢3年，見過嘅怪異行為多不勝數，細嘢唔講喇，講啲經典嘢，兩個月前我last day，佢同我食farewell飯，行經銅鑼灣某商場遇見一位香港娛樂圈阿姐級明星，老細一支箭衝上去嗌人：「我好鍾意睇你做戲㗎！我係你fans嚟㗎！」
因為老細真係太大動作，我識佢都嚇親，更何況嗰位阿姐級明星。未完，老細連隨拎出電話同對方Selfie，留意返，佢係冇問人同唔同意，夾硬挨埋個明星側邊迫人影相。
當時阿姐級明星咁講：「今日冇化妝，唔影相喇。」
老細：「唔怕啦！好難得撞到你㗎！我想post畀朋友睇呀！」
你係咪聾㗎？首先，人哋都拒絕咗你，識唔識得尊重？其次係，呢位阿姐級明星咪講咗冇化妝唔想影相囉！你仲攝埋去Selfie兼講明要post畀朋友睇？
嗰位明星即時黑面，冇回應就行開，結果我老細嬲咗，佢後來一路食飯一路同我講，覺得呢位阿姐級明星平時扮親民，原來真人性格咁差、唔珍惜fans、扮大牌、態度惡劣、人品唔好……
我覺得個問題唔喺人哋度喎！咁當然，老細係唔會反思自己嘅行為好冒犯同埋失禮。
老細：「臭寸到呢！你見唔見佢全程黑面呀？以後唔再支持佢，唔會再睇佢啲節目！」
大佬呀！人哋呢個級數，少你一個fans唔少啦！更何況你唔睇人嘅節目，對呢位阿姐級明星而言係毫無損失，你做咩啫？
老細有時又會好「豪爽」，但行為就好怪，某次佢同我哋三個秘書食晏飲茶，臨走嘅時候忽然走去拎起隔籬枱張單，我哋三個秘書當場呆咗，心諗你做咩呀？然後我聽到老細同隔籬枱講：「呢餐我請吖！頭先聽到你哋話啲特點好貴，我請你哋食。」跟住佢懶型轉身就走去埋單……
睇清楚啲，哦，隔籬枱係兩個靚靚女女嘅OL，不過人哋唔領情呢！同埋你突然走去拎走人哋張單真係好失禮，仲要偷聽隔籬枱講嘢，成個變態佬咁，兩個女仔飲餐茶會幾貴呀？咁細嘅數目你走嚟扮慷慨，唔係覺得自己好Man呀？
結果嗰張枱其中一個女仔要追出去拎返張單，尷尬到呢！
我可以好肯定咁答你，如果隔籬枱係兩條麻甩佬，又或者係兩個唔靚嘅女人，老細就算偷聽到人哋話特點好貴，都絕對唔會無啦啦搶人張單去埋，真係好核突囉！就同撞見個阿姐級明星一樣，佢總係大庭廣眾之下做埋啲失禮嘢！
因為我個position係秘書，上年又係年尾嘅時候，有個新嚟嘅秘書同事冇同老細講Happy New Year，然後放完假返工老細向我投訴佢，話呢位秘書對公司冇歸屬感，唔夠尊重佢……係咪九唔搭八呢？係呀，真係冇得解釋㗎！只可以證明老細份人好小心眼，而且連冇send msg畀佢講新年快樂都介意一大餐。
頭先講咗啦，當時呢位秘書係新嚟，仲未過試用期，去到差唔多兩個半月嘅時候，老細就話覺得佢唔多適合，提前講聲就叫人執包袱走，雖然把口係話工作表現不符，但我都跟咗老細一段日子，好明顯係因為冇講Happy New Year而耿耿於懷，嗰次除夕之後老細已經對呢個女同事唔多友善，點會有老細拘泥呢種小節㗎！可能個員工放假唔想send msg打擾你啫！
鑑於身份同職責，我哋部門三個秘書都知道老細少少個人資料，包括生日日期，因為平時要幫佢填啲form，有一年我就係啱啱填完，行入房畀文件佢嘅時候禮貌講聲Happy Birthday，絕對唔係擦鞋，就算對方係其他部門嘅同事，我知道或者醒起都會講聲，原來我因此而避過一劫。
就係嗰一年，我哋其中一個秘書冇同老細講Happy Birthday，後來review人工嘅時候，老細私底下問我呢位女秘書同事嘅表現，我每一句都係讚美，但老細顯然心裡面已經有答案，因為佢兜口兜面同我講：「咁都叫好？佢知我幾時生日，都冇同我講生日快樂喎，又冇親口講，又冇msg我講。」
當時我冇而家咁了解呢位舊老細，唔知佢會介意呢啲嘢，所以唔識點回應，結果我同另外一個秘書每人加咗hkd 1500人工，忘記送上祝福嗰位秘書就只係加咗$300……
兩個月前我搵到新工所以resign，臨走佢哋請咗個小妹妹replace我，就係一開頭提到嗰位Helen，我覺得佢好純好乖，就算呢個老細麻麻，我都希望Helen可以吸收下經驗先再出去做其他工，無謂步之前嗰位秘書嘅後塵，過唔到試用期整花張CV，所以1月1號晚我醒起舊老細咁小心眼，即刻whatsApp Helen，提佢同老細講Happy New Year！年尾年頭，失業就唔好啦！（完）
日本忘年會請同事食蕎麥麵
https://www.instagram.com/reel/C1ls49vLu46/?igsh=aHJyNXB4Ymt3NThl