「8點！8點！執嘢走喇，喂，等埋我哋呀！」同事Martin催促大家離開，其他人本來好專心做緊嘢，但係聽到時間已經嚟到8點，個個唔係熄機熄Mon就係孭袋，有女同事仲慌忙咁搽唇膏，作為仲未過試用期嘅新人，我有一秒以為公司係進行緊乜嘢火警逃生演習。
當時我有張單仲差少少就整完，好想開口問可唔可以做多陣，畢竟我冇公司鎖匙，新人又唔敢太扮嘢獨自留低，所以唯有跟大隊「撤離」，而我腦海中亦傻傻出現一種諗法：「呢度幾好喎，冇OT文化，返10放7，晚晚做到8點已經係極限，你唔走都有人趕你走。」
做耐咗之後，我先知道自己嘅諗法係一廂情願，因為好多同事雖然冇留喺office加班，不過仍然會拎公司嘢返屋企做。
我：「係呢，我可唔可以留低做埋先呀？仲差好少咋，應該8:30走得。」呢句說話係我做到第3個半月，已經過晒試用期嘅時候講，唔知有冇人好似我咁，屋企係冇電腦，所以我唔enjoy拎公司嘢返去做，我更加唔會為咗份工而特登花錢添置電腦，返到屋企我只想休息，或者用手提電話煲劇打機。
「唔好喇，個個都走，做唔切就聽朝返嚟再搞啦，行喇行喇，其他人等緊我哋。」坐我隔籬位嘅資深同事Martin依然唔主張我留低，正確嚟講，佢唔希望任何人超過8點鐘離開。
後來我將屋企冇任何Desktop，Laptop ，亦都冇任何iPad或電腦產品嘅事同Martin講，因為我留意到其實同事走嘅時候都冇鎖門，基本上用密碼開就得，咁應該冇問題啦，你唔使畀條鎖匙新人，係咪weekend前或者長假期前先要鎖？平時就咁閂門就ok？
Martin：「傻啦！唔係忌你係新人先唔畀你最後走，呢度有污糟嘢，唔想你嚇親啫，你上一手同事都係因為咁而辭職。」
我：「污糟嘢？你指鬼鬼怪怪嗰啲？上一手同事辭職係為咗呢啲事？會唔會太誇張呀？見工嗰陣HR冇講嘅？」
Martin：「邊會有HR同你講上一手同事因為撞鬼而辭職㗎！講完都驚你唔肯嚟做啦！」
其實我唔驚鬼怪嘢，因為阿爸教落一個好有用嘅方法，就係講粗口，俗語話人怕鬼三分，鬼怕人七分，其實係真嘅，關鍵係你要惡過佢，呢一招我細細個去宿營就試過，當時全校去咗個唔知咩展能渡假村，相隔廿幾年印象好模糊，只係記得成班同學喺一間大房各自瞓碌架床，你知小朋友㗎啦，熄咗燈都唔願瞓，繼續玩繼續傾計，突然聽到幾下巨響，有人喺碌架床類似跳上跳落，砰砰嘭嘭，初時大家嚇親，但因為熄咗燈咩都睇唔到，仲以為邊個同學仔惡作劇。
初初嘅時候冇人意識到係鬼，只係擔心太嘈會招致老師走嚟興師問罪，幾個人連番叫唔好再跳嚟跳去，但床板聲持續，仲愈嚟愈大聲。
記得係班長去開燈，好惡咁問邊個咁嘈，係咪要搞到阿Sir（我哋叫老師做阿Sir）入嚟查房先安樂，點知一開燈就靜晒，我哋班小朋友仲講笑，又互相埋怨邊個咁嘈，班長見冇人搞事就熄返燈，但係一熄又砰砰嘭嘭，一開又靜，一熄又連環巨響，有幾個同學開始驚，因為feel到啲床板聲係好粗暴，根本冇人會咁樣玩嘢，除非唔怕阿Sir鬧，然後其中一個同學仔仲大叫：「有人扯我張被呀！」
我瞓嘅位隔得比較遠，睇唔到有咩人扯佢張被，當時諗起阿爸喺我去宿營前講過一句：「嗰啲展能渡假村開喺荒山野嶺，好多污糟嘢㗎，你唔好搞搞震知唔知？有咩事就講唔該借借，見到啲山墳唔好亂講嘢，有咩事就講粗口鬧走佢，不過最好就唔好講粗口啦！」
印象中我嗰陣只係讀緊小學，阿媽聽到阿爸叫我講粗口驅鬼，率先講粗口鬧阿爸：「你痴乜L嘢線呀！教個仔講粗口！」
阿爸：「我幾L時有教佢講呀？我叫佢有需要先講，你嘈乜L嘢啫！」
唔好意思，老粗家庭係咁上下，我阿爸阿媽係做菜市場，平時喺菜欄都成日聽佢哋講粗口，佢哋成日叫我唔好學，但同時又成日講，喺菜市場又講，返屋企又講，兩老偶爾鬧交嗰陣講得仲犀利。
講返展能渡假村，聽到同學話有人扯佢張被，房裡面嘅氣氛愈嚟愈緊張，我好大聲爆咗句粗口：「DLLM！玩完未呀？X你呀！」跟住成間房就徹底靜晒，無論班長開燈定係熄燈，都冇再出現跳彈或撞擊床板嘅聲，同學亦冇再話有人拉被，而呢個時候，房間忽然打開！
打開房門嘅係阿Sir，佢比起頭先我講粗口仲大聲：「邊個講粗口？頭先係邊個講粗口？」
後續係點已經唔記得，總之我認咗，宿營返嚟之後，阿Sir要見我家長，結果阿媽係咁鬧我，阿爸就讚我叻仔識得用粗口驅鬼，而阿Sir就唔相信展能渡假村有鬼，只係一味覺得我係壞學生，最慘係成班同學都唔相信粗口可以「嚇鬼」，佢哋覺得我當晚係用粗口鬧班長……真係好心冇好報，鬼就係我趕走，見家長就由我承受。
粗口驅鬼嘅實驗唔止一次，但呢度唔詳談喇，因為我目的唔係講鬼故，講返公司先，當我已經做滿半年，有次個女同事做錯嘢，呢次真係唔OT唔得，終於可以第一次超過8點留喺office做嘢。
其實office究竟有咩鬼呢？資深同事Martin冇講，其他同事亦都好避忌，算啦唔緊要，反正我真係唔驚。
當晚其他同事一夠8點就雞飛狗走，淨低嗰位瀨晒嘢，唔OT真係搞唔掂嘅女同事，而我就留低陪佢，因為我都好多嘢做，第一晚係完全冇事，好平靜，問題係女同事隻鑊比較大，佢起碼要開兩三晚OT，然後第二晚都冇事，直至第三晚佢已經唔再驚。
我：「你餓唔餓？我落街買個麥記，要唔要買埋你？你一個人驚唔驚？」
女同事：「唔驚呀，幫我買個魚柳包餐吖，薯條轉沙律得唔得，想加錢要檸檬茶。」如是者我就落街買老麥，等緊餐嘅時候收到呢位女同事打嚟求救。
女同事：「你買完未呀？我好驚呀！我想走！你喺邊？」
我意識到佢應該見到傳說中公司嘅污糟嘢。
我：「定啲嚟，我而家跑返嚟，等我。」其實我冇跑，嗰陣仲等緊老麥出餐，拎完就行快兩步，期間女同事send咗幾次WhatsApp問我返到未，我一概答佢「轉埋彎到」。
返上office，燈火通明，乜事都冇，搞咩呢？
女同事：「頭先會議室有人嘭門，啲燈斷斷續續閃咗幾下，我好似見到嗰邊有嘢，半透明，走喇，唔做喇！」
我舉高佢個魚柳包餐問：「吓！買咗唔食呀？咁你要走點解唔一早走？我好肚餓呀！」
女同事：「半透明……我驚行出門口有事，最衰係你，買咩嘢食……」個女同事一直指住我後面話有半透明物體，其實佢已經拎咗手袋，只係自己唔敢衝出office，好似驚有鬼會捉佢返嚟。
我見唔到任何半透明物體，但呢個時候office啲燈真係閃咗幾下，幾個位嘅枱頭電話一齊響，女同事即時鳩叫，坦白講我都feel到身後有啲嘢，講唔出個感覺，總之係有嘢喺附近行，而我肉眼又睇唔到，只係有啲毛管戙。
我：「DLLM！玩L完未呀？陷家鏟你有種就出嚟！On99！做鬼做得你咁L廢，食L屎啦！」
燈冇再閃，電話停晒，嗰種毛管戙嘅感覺都消失咗，女同事畀我突如其來大聲爆粗嘅舉動嚇親。
我連隨解釋：「唔係屌你，我屌鬼啫。」
雖然一切回復平靜，女同事仍然堅持要走，我就堅持要食埋個巨無霸餐先，佢又唔敢自己行出去走廊搭電梯，無奈地只能孭住個手袋食魚柳包，係都要同我一齊離開辦公室。
女同事：「點解你唔驚嘅，好似你大聲鬧完就冇事咁。」
我：「關鍵係講粗口，仲要夠大聲，萬試萬靈，阿爸教㗎！我聽日約咗人唔得閒陪你OT，你趁而家練習定先吖！」
女同事：「吓！唔好啦，講粗口咁粗魯，我講唔出呀，聽日我都係拎啲嘢返屋企做。」
我：「咁是但你啦！」
女同事將我用粗口驅鬼嘅事跡同其他人講，連老細都走嚟問我，呢次真係響晒朵，結果我將細細個展能渡假村單嘢重複又重複咁講咗幾次，不過依然冇人敢留低OT，原來呢棟大廈出晒名猛鬼，老細話呢度以前亂葬崗喎！
其實我發覺香港好多鬼故嘅開頭都係呢句：「好耐之前呢，呢度係亂葬崗嚟㗎！」聽到厭晒。
後來呢位女同事出差，佢去咗福建，有一晚佢半夜打WhatsApp畀我：「間酒店有嘢，唔知呢啲係咪叫畀鬼責，頭先郁唔到，成身麻痺晒，而家落咗酒店大堂坐。」
我望一望屋企個鐘，凌晨兩點幾，佢打算坐到天光？
我：「咁你打畀我做咩？我唔係捉鬼㗎！」
女同事：「我想話你嗰招唔work，我頭先講晒粗口，完全冇用，一合埋眼就畀嘢責，仲有冇其他方法呀？」
我：「你要大大聲講先得㗎，粗口只係助語詞，要加埋氣勢。」
女同事好唔耐煩：「我已經好大聲喇，咁大個女未試過咁大聲講粗口㗎，你呃人嘅，又話呢招實得！」
我：「嘩，你畀鬼責搵我出氣呀？我明喇！你講咩粗口？講嚟聽下。」
女同事：「我咪講DLLM囉！係咪唔夠長呀？我冇咁多粗口詞彙喎！已經連續講好多次，係咁DLLM！」
我：「小姐呀，你喺福建，講廣東話佢哋唔識聽㗎！福建係撈頭，鬼都係撈鬼，你講國語啦！最好係閩南話。」
女同事：「閩南話DLLM係咩呀？」
我：「好似係bu你阿麼，係咁上下，你試試啦！媽B呀！幹你娘呀！咩都試下啦，福建撞鬼走去講廣東話，short short地！」講完我就收咗佢線，因為好眼瞓，不過bu你阿麼係咪趕得走撈頭……sorry，應該係撈鬼，最後都冇結論，因為個女同事太驚，最終唔敢上房，喺大堂瞓完一晚就返香港。
其實粗口驅鬼應該係work，但我從未試過喺香港區以外試過，好在都唔使試，如果大家有機會喺不同地方撞鬼，試下因應唔同國家語言用呢一招，我都想做個統計。(完）