前排公司門口成日有個女仔徘徊，朝早又見佢，晏晝又見佢，連續幾日都係咁，真係好詭異！有女同事都覺得奇怪，因為我哋唔係門市，好人好姐點會喺商業大廈十幾樓徘徊呢，於是個女同事就走去問佢咩事啦，但個女仔冇答，直接無視我個女同事。
過咗一個星期左右，公司咁啱有個gathering，我條team有個新嚟嘅男仔問阿姐：「可唔可以叫埋女朋友一齊去呀？」
其實阿姐答咗唔好，始終全部係公司嘅人，無情情有個外人join好奇怪，但新仔好誠懇地不斷請求，話女朋友只係想見下大家，坐一陣就走，最終阿姐心軟畀佢出席。
當晚收工出發去gathering，發現佢女朋友就係連日喺公司門口徘徊個女仔……搞乜鬼呀你哋！
Gathering嗰陣，佢女友全程冇理其他人，淨係keep住同佢條仔，即係我呢位新嚟嘅男同事細聲講大聲笑，雖然佢兩個都係二十出頭冇乜社會經驗啫，不過正常嘅人情世故都應該要識啩！
阿姐私下透露唔想畀新仔過試用期，點知佢慢一步，因為新仔主動遞辭職信。
唔使自己出手，阿姐梗係如釋重負啦！點知新仔同佢講：「女朋友話我班同事麻麻地，叫我唔好做，所以唔好意思呀！」
阿姐話當時聽完都唔知好嬲定好笑，隨口反問咗句：「你女友覺得我哋麻麻地，咁你自己冇主見㗎？」
新仔答：「唔係，女朋友冇話你麻麻地，佢淨係話其他同事麻麻地！」
阿姐：「即係你因為女朋友一句說話就放棄事業？」
新仔：「都唔係嘅，始終我同佢啱啱開始，我自己都想專注返拍拖先。」
阿姐話差啲吐血身亡，不過諗諗下，反正都唔會畀新仔過試用期，咁就無謂再浪費時間講落去。
估唔到真係有人戀愛大過天，可能新仔本身冇經濟負擔，生活冇嘢煩啩！唔知佢第日老咗望返轉頭，會唔會覺得曾經為拍拖而辭職好幼稚呢？