「你今日晏晝係咪話維港啲船收咗錢？」臨放工畀個高層嗌咗入房，見佢黑口黑面已經知道唔慌好嘢，但係佢突然咁問的確令我不知所措，所以當時我冇正面回答，只係含糊地反問返呢位高層：「咩事呀？」咁我真係唔知你特登咁問係咩事吖嘛！
「小心啲講嘢呀！你話班船家係收咗政府錢先至喺維港拉晒國旗巡遊，總之隔牆有耳，你知而家又國安法又盛㗎啦！Office唔好講政治嘢唔該，你又係新人，畀心機做嘢就夠㗎喇，ok？咁我唔囉唆，冇咩就返出去啦，記得呀！以後唔好喺公司講呢啲。」
我一頭霧水，回帶先，噚日食晏我係有講過差唔多嘅說話，因為公司個會議室有電視，同事叫完飯盒會一齊入去食，期間個電視播新聞，內容係有啲漁船拉晒國旗區旗喺維港巡遊，慶賀七一回歸，咁我就講咗句：「嘩！一定收咗錢啦！邊有咁得閒同你拉晒旗遊一轉維港呀？真係咁愛國咩！」
應該大約係咁，但我自己都唔係好記得每一句嘅詳細，anyway，都係好普通嘅評論啫！犯不著要捉我入房訓斥（雖然個高層語氣唔係好惡），更何況我回憶返喺會議室一齊食晏嘅人，呢位高層並唔喺度㗎喎！換言之係有個人走去報寸……有冇咁得閒呀？
然後我同咗隔籬位個同事講呢單嘢，因為我未過試用期，成間公司裡面算係同佢最熟，而且佢噚日lunch冇喺間房一齊食，所以唔會係佢報寸，比較可信。
仲以為呢位同事得悉我畀高層照肺會好驚呆，點知佢講嘅嘢先至令我震驚。
「係呀，你喺度講嘢小心啲，呢度好政治正確㗎，其實唔止講政治，你講其他嘢都會畀人篤，我之前瀨過啦！佢有冇畀warning letter你？」
我：「Warning letter？冇喎！你之前瀨咩呀？」
「我之前同幾個同事出去食飯，哈！同你一樣，又係食lunch出事。嗰次我喺間茶記見到條女孭名牌袋，跟住一路食飯一路同自己同事講咗幾句，大約係話而家啲女睇牌子唔睇款，因為我記得嗰個袋好肉酸㗎！大大隻logo，慌死人唔知你用名牌嗰種呢！我就係講咗呢啲之嘛！」
我：「關咩事？咁點會瀨嘢呀？」
「第二日朝早，人事部個阿姐搵我，佢話有同事聽到我講啲侮辱女性嘅說話，CLS！然後畀咗封warning letter我，叫我下次唔好喎！我點樣侮辱女性呀？」
我：「人事部阿姐嗰次同你一齊食飯？」
「就係冇先恐怖，連埋我5個同事去食飯，冇人事部阿姐，冇高層，但最後人事部阿姐知我講咗啲咩，其實邊個報寸都呼之欲出，應該係Sales Team個Jacky，從此之後有佢嘅lunch我就唔會join！」
我：「但係噚日個會議室裡面冇Jacky喎！」
「呢度好多金手指㗎！你估得Jacky一個咩！之前有個同事仲好笑啦，講咗句覺得黑人通常個身好臭，轉個頭就畀老細捉入房鬧，肯定係好快有人向老細篤灰。」
嗱！我唔係話「而家啲女睇牌子唔睇款」同埋「黑人通常個身好臭」嘅言論係啱，只係一件事還一件事，日常喺office或者有其他同事在場嘅時候，講句嘢都會畀人篤背脊，而且當中嘅內容係同公司完全無關，呢種文化真係好恐怖，會令到所有人只係敢講好行貨或者讚美嘅說話。
咁究竟條界線要點樣拿捏呢？
隔籬位個同事估計我係新人，所以現階段只係會收到口頭警告，但我覺得自己都要好好考慮下係咪應該做到過試用期，先唔講咩政治正確，咁樣返工要日防夜防，心理壓力好大喎！
我更加諗唔明篤背脊嘅人個心諗乜，想高層、HR，仲有老細爆同事講錯嘢，其實有咩好處呢？有獎金？定係記你一個優點，將來容易啲升職加薪？畀你舉報嘅人都唔係傻，多多少少會估到係邊個做鬼頭仔，到時個個喺你面前只會講表面嘢，咁樣返工同做人又開心咩？