未做過一間可以畀員工有「增值服務」嘅公司，其實喺法例上有冇抵觸呢？事緣我入咗呢間公司一個月，因為要同自己部門一位同事經常夾嘢，但佢個位喺office另一邊，呢樣已經好奇怪，話明係自己部門同事，而我哋department明明有位，點解得佢一個坐到九丈遠呢？好似調咗去孤島咁呢？
咁我第一個反應係覺得嗰位同事可能得罪咗阿姐，又或者犯眾憎之類，所以就「發配邊疆」，不過做嘢夾落又完全唔覺呢位同事有問題，佢仲幾好人，做嘢又快又爽手，咁我就忍唔住問另一位同事喇：「點解Sidney坐到咁遠嘅？我哋department仲有兩個吉位㗎喎！」
同事第一句就同我講：「你入嚟嘅時候冇人話你知呢度有增值服務咩？」
我：「咩增值服務？」
同事：「你可以自己另外畀錢，揀一啲指定嘅位坐，Sidney畀咗$1,200轉位，你都得㗎！」
突然阿姐喺我哋身後出現，仲打斷我同同事嘅對話：「人哋（佢指我）啱啱先入嚟做咋，一陣以為公司係『謀人寺』，返工都要貼錢。」
同事：「其實真係『謀人寺』喎！揀位要另外收錢，我諗全香港得我哋老細諗得出呢條橋。」
阿姐：「咁老細冇迫你畀錢呀，你同我都冇加錢要增值服務啦！邊有Sidney咁富貴呀！仲有喎，佢個加錢位有waiting list，你而家肯畀錢都要排半年呀！」
阿姐同同事嘅對話令我腦洞大開，實在忍唔住要再問清楚啲。
原來老細開放咗office裡面一個比較偏向角落嘅area，幾乎係同所有部門分離，自成一角咁，嗰度有6張枱，可以容納6個人，但就完全唔隸屬於任何部門，老細開價$1,200／一個月，標明一下，要畀現金，唔可以喺份糧度扣，估計係唔想觸犯任何勞工法例，唔想有麻煩，總之你肯畀$1,200，嗰個月就可以坐喺呢個自成一角嘅清靜地。
聽講最初好多人都同我一樣，覺得老細痴線，邊有人會貼錢返工㗎？點知有人帶頭先科水$1,200「調遷」，跟住就陸續有人自掏腰包調位，而家6個位坐滿晒不特止，仲要輪候，有waiting list，你話癲唔癲？
因為出現咗輪候名單，老細後來又改規則，每人最多只可以租3個月，完咗要重新再排waiting list，據聞而家再排都起碼要等半年先有得坐，似唔似去租嗰啲有蓋停車場？所以我遲啲應該會再見到Sidney坐返出嚟，同事話佢人工有3萬幾，畀$1,200／一個月轉位濕濕碎喎！
然後我又有另一個問題喇，你得6個位，老細賺盡咪又係得$7,200！哈，原來係我太天真太傻喇！公司嘅增值服務係唔止一樣咁少㗎！
Office裡面有4張電競椅，$150／一個月，我聽完之後以為冇人會租咁笨柒啦！因為電競椅可以自己買，有平有貴，一個月一個月咁畀$150，不如買一張私伙擺公司……sorry呀！呢4張電競椅全部租出晒喇！
同事話公司嗰個電競椅都係靚嘢喎，而且自己買仲要顧及將來唔做要擺返走嘅問題，不如乾手淨腳就咁同公司租，唔知點解，當時我嘅感覺就好似搭飛機top up要嗰啲加闊座位，估唔到呢一套都可以擺喺office賺錢，老細有料！
除咗以上兩種座位嘅增值服務，公司仲有一個增值服務係好受歡迎，就係加錢任用咖啡機同茶機，我聽到嘅第一個反應係：「嘩！咁離譜嘅！工作環境提供呢啲咖啡茶包係好基本㗎喎！你竟然要員工另外畀錢？咁不如連mouse, keyboard都另外加錢啦！真係去勞工處告你㗎！」
點知阿姐同我講：「你唔畀錢都可以任飲公司啲3合1咖啡奶茶，同埋任飲啲茶包㗎！」
我：「咁……點解要另外畀錢增值？」
阿姐：「因為公司另外有部Nespresso 一粒粒Capsule嗰隻咖啡機，仲有部TEA CHÂTEAU又係沖一粒粒Capsule嗰隻沖茶機，如果你每個月畀$100，就可以無限任用，唔畀都一樣有咖啡同茶飲㗎！你估公司真係咁唔人道咩！不過我都有畀呢$100，咖啡機啲Capsule出面買都圍返$6至$7一個，好多時我一日飲兩杯，唔使半個月都回本，總之你唔一定要join嘅，pantry有其他選擇，一樣係所有員工可以飲。」
據了解，office有超過3分1人係另外畀$100一個月，「升級」去用部Capsule咖啡機同埋Capsule沖茶機，老細呢度又執幾千銀，佩服佩服。
不過老細呢啲增值服務又唔係樣樣都work，原來佢仲有lunch食多30分鐘，即係total 1.5小時lunch time增值服務，同埋可以揀公司一個快啲嘅Wifi增值服務，但呢兩項就冇人join，因為有同事增值過，發現lunch食耐咗根本冇人理，另外大家通常係用自己電話個network上網，總之計過度過呢兩項就唔抵畀，笑死！
另外，公司嘅座位增值服務都唔係人人可以join，關鍵唔係職位，而係你個department head放唔放你，例如隔籬department就有同事想申請1,200／一個月轉去「守水塘」，但部門主管話嗰位同事不嬲好懶好hea，怕佢無皇管所以唔批。
最搞笑係個老細曾經諗過一項新嘅增值服務，可惜未推出就畀各部門主管聯手ban晒，嗰項服務係加$1500／一個月可以自由揀位，坐department head後面都得，咁痴線都諗得出，難怪會被各個department head一致否決啦！
我暫時就考慮緊加$100用佢啲Capsule機，轉去「守水塘」就無謂喇，始終自己新嚟，加上個waiting list要等半年，半年後我都唔知仲喺唔喺度做，我同啲friend講公司有以上增值服務，佢哋都覺得不可思議，貼錢返工簡直係刷新思維，請問大家如果有得揀，會唔會用呢啲值增服務？（完）