同個friend食完飯，我話想買糖水返屋企畀老豆，個friend覺得我好孝順，其實唔係，全因為我老豆失咗業半年，搵工處處撞板，最近心情真係好低落，作為仔女見到梗係擔心啦，又幫唔到啲乜，咪買碗糖水返去氹下老人家囉！
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
我老豆63，之前份工都唔知點定義，叫就叫總經理，但係乜都要做，乜都要理，因為佢之前做細公司，就咁跟咗個老細大半世人，你知上一代好多都係咁㗎啦！然後個老細話要去澳洲享仔福，成間公司就咁close咗唔做，結果我老豆就失業喇。
最初老豆都唔識得放下身段，雖然係細公司，不過都叫做係經理，後來佢知道自己年紀大，搵工唔再揀擇，跟住先發現個問題唔係自己嫌唔嫌棄人，而係人哋都唔想用你。
Friend：「Uncle有冇搵類似物管同保安呢啲呀？應該好易請。」
我：「佢放下身段之後咪就走去考保安牌囉，個牌易攞呀，但原來搵工又冇想像中咁易，因為而家好多後生仔女入行，仲有啲新移民同你爭，新移民還新移民，點都後生過我老豆，同一份糧，人哋寧願請後生啲，人之常情嚟嘅。」
Friend：「所以Uncle連保安都見唔成？」
我：「長工就冇，但有人請佢做替更，好唔穩定，有時一個星期返幾日，有時一個星期得一日，而且好臨時臨急，視乎有冇人請假，總之就返得好疏落，所以我老豆覺得自己好冇用，年齡上係差唔多退休，但經濟上又好似未退得安樂。」
Friend：「你問下Uncle有冇興趣去我公司做receptionist吖，我公司有兩個office，港島區嗰個啱啱走咗個receptionist，可以幫佢問下。」
我：「咪玩啦！Receptionist一般請女，仲要係後生靚女，我老豆？阿伯嚟㗎喎！」
Friend：「我公司啲CS同之前嘅Receptionist都係請有咁上下年紀嘅人，你問下Uncle有冇興趣先啦！」
後來我返到屋企轉述畀老豆聽，佢嘅反應同我最初聽到時一樣，點會有公司嘅receptionist請阿叔阿嬸呀？Anyway，有工作機會都要試咗先，如是者，老豆真係去咗我個friend公司見工。
見工唔係我個friend負責，因為我個friend喺九龍區office，基本上大家係見唔到，不過佢間公司喺個別position真係好歡迎高齡人士，特別係客戶服務部，佢哋覺得好似我老豆呢種上咗年紀嘅人，部分係好怕悶，驚冇嘢做，寧願有份工可以接觸下人，同多啲人傾計，耐性亦可能比後生仔女好。
聽返我個friend講，佢哋客戶服務部嘅離職率係全公司最低，近3年竟然完全冇人走，而receptionist嗰個位，之前係請咗個65歲嘅女人，早排因為健康問題辭職，所以我老豆先至有得in有得做。
講返個結果先，我老豆見工真係搞掂咗，人工當然唔可以同佢以前比啦，不過我老豆勁開心，有收入，有寄託，仲要勉勉強強都叫做office工。
我老豆不嬲好識做，佢話驚公司啲同事嫌佢煩，平時除咗工作之外，絕對唔會周圍搵人打牙骹，特別係後生嗰班，無謂畀人覺得自己係乞人憎同煩厭嘅老人家，點知班同事反而好鍾意撩佢講嘢。
另外，因為間公司嘅CS department有好多同佢差唔多年紀嘅人，客戶服務部最後生嘅同事都55歲，所以佢同人哋好啱key，返工個幾星期已經有固定飯腳，睇嚟我老豆做得幾開心。
而家我老豆晚晚喺屋企都分享返工喜悅，噚晚佢就讚公司班後生仔好叻。
「其實後生仔女轉數真係快好多，活力又好好，要用腦嘅工作搵佢哋啱晒，反而我哋呢班有咁上下年紀嘅人，有時做嘢冇咁急，最適合啲需要慢慢傾嘅人，我都想遲啲轉去做CS呀！聽講好多客都好躁，我最鍾意同呢啲人講道理，可惜吖！佢哋個部門齊晒人。」
我都覺得老豆適合做CS多過receptionist，佢平時好煩好鍾意講道理，對住啲好煩嘅客就啱晒，大家鬥消磨，同埋我始終想像唔到一個阿伯點樣做receptionist，佢哋老細唔介意就得啦！
講真人人都會老，去到中年或者五六十歲先失業，搵工的確唔容易，轉行更加如隔山，所以我覺得個friend間公司真係好好，起碼唔會嫌棄年紀大嘅人，希望我老豆做得開開心心，更加希望香港可以多啲呢種公司。(完）