有啲公司唔係真心請人，希望我嘅經歷亦都可以為大家帶來警惕。大約兩個月前，我去咗一間公司interview，對方三個人一齊in我，期間我已經覺得佢哋好唔專業，仲好古怪，因為呢3條友問完嘢會互相打眼色，好快我已經感覺到唔對路。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
問完幾條廢問題之後，佢哋就猛咁問我喺而家間公司跟緊咩客，當時我都仲諗住好正常，不過呢3條友係唔止問，仲用筆同紙記低，其中一個更加咁樣問：「哦，呢個brand都係你client呀？佢哋上年喺你公司用咗幾多錢呀？啲單密唔密？」
我都唔係第一日出社會做嘢，嗰陣雖然未諗到佢哋係套料，但我本住唔應該透露目前公司商業秘密嘅心態，所以就求其噏咗啲數字出嚟，緊接落嚟呢3條友仲大膽到問我：「咁呢個brand你係contact邊位呀？邊個同你對口？」
嘩！你哋白痴啫，唔好當我都係白痴吖！套料可唔可以有啲技巧同心思呀？Ok，見呢3條友好似上堂咁抄筆記，咁我就陪佢哋玩下！
我：「對口呀？Edwin囉！通常啲單都係佢批落嚟。」
呢3條友kai到當住我面又打眼色，喂你哋醒少少啦！雖然個brand name係真，但個contact person name同埋條數我係吹㗎咋！
佢哋意猶未盡繼續問我仲有跟開咩客？一季幾多單？contact開邊個？好啦好啦，見佢哋柒到咁嘅地步，我又特登請咗半日假嚟interview，就玩殘你哋！
我：「我仲有跟開XXXX呢個客，Edith好人吖嘛，你同佢啱傾就好易話為。」
其中一條in我嘅kai子仲要問：「E……點串呀？」
我：「Edith，E-d-i-t-h！」
英文又唔識，問嘢又冇技巧，套料又套到咁揚，點搞呀？
之後我繼續鳩噏咗幾個客名出嚟，其實呢啲brand全部唔係我公司嘅客，contact person都係不斷老作，畀心機抄吖！
開始作到唔識作，呢3條友仲未問完，唉！我都唔知開啲咩brand嘅名喇，又要避開而家自己真係做緊嘅客，忽然諗起我老細其實有兩間公司，相同地址註冊，但兩間公司係唔同名，咁我就用老細另一間公司名鳩噏246啦！
另一位Kai子問：「呢間未聽過喎！」
我：「呢間未聽過好正常呀，啱啱先進駐香港，有冇potential唔敢講，但係張單就真係好大，上個月我同事先做咗張7位數！」
嗰3條kai子又一次兩眼發光：「7位數？呢間contact邊個呀？」
CLS，真係好狼胎！但由於我已經作咗好多brand同埋contact name，一時間都諗唔到個名出嚟，求其噏咗個已離職嘅同事名就算：「Martin，呢間個contact point係Martin！」只見3條kai子如獲至寶咁抄低資料。
諗住玩完就走啦，點知未完，呢3條kai子夠膽死叫我寫個marketing plan，要詳細寫點做？budget點擺？Step係點？呢下我真係著咗火，因為明知你公司約我見工係為咗套料，而家想連marketing plan都幫你做埋，不如我幫你去傾埋生意，餵埋你食好冇？
我：「寫晒成個plan？你請咗我先囉！」
其中一條kai仔：「但係你要做咗，我哋睇過ok，咁先可以決定請唔請喎！」
我：「總之你唔係請，我就唔會無償幫你寫marketing plan，就係咁簡單！」
有個kai子即刻打圓場：「唔緊要唔緊要，或者我哋研究下先，因為仲有幾個求職者會見，如果有機會second in甚至出offer，到時先做都ok，有消息會盡快通知你。」
不知所謂！我覺得佢哋唔係free rider，直頭係賊！
本身我都以為呢件事就咁完，誰不知幾個星期前，receptionist話有個電話直接打嚟公司總機搵Martin，即係嗰位已經離職嘅舊同事，由於唔知對方係邊個，又唔知係咪有嘢要follow，receptionist就問可唔可以駁畀我？
你哋估下係邊個打嚟？係我兩個月前見工嗰間公司呀！
「喂，請問係咪Martin？我哋係XXX group limited打嚟㗎！因為聽到行家講你哋進駐咗香港，有冇機會大家見個面了解下？」
我唔肯定打嚟嗰個人係咪3個kai子其中一個，因為已經認唔出，或者佢哋當日套完料交咗畀其他Sales跟都唔出奇，但係XXX group limited就係我去見工嗰間，同埋基本上係好少人搵Martin，咁我已經完全知道發生緊咩事。
我：「哦，XXX group limited呀？你點知我叫Martin呀？邊個行家畀料你？」
「我哋google search公司名，然後搵到你公司總機，方唔方便傾下呢？我哋上你公司都得㗎！」
我：「我問你邊個行家畀料你呀，九唔搭八！」
「……請問你係咪忙緊？或者我晏啲再打嚟吖！」
我：「DLLM啦！你呃人上去見工，套人哋啲料，仲想偷偷地contact人哋啲客？你公司有冇咁仆街呀！」
條友嚇到cut咗線，之後亦都冇再打嚟搵Martin，雖然我知道社會險惡，但真係冇諗到有公司會出埋呢種旁門左道去扮請人套料。
其實佢哋只要醒少少，應該會google到我見工份CV填嘅公司名，同我亂作有Martin呢個人嘅公司名係同一個地址，不過我相信佢哋並冇細心睇我嘅履歷，因為由始至終都唔係真請人，目的純粹係「偷嘢」，想食免費午餐！
諗諗下都幾爽，當日我畀啲假客名同埋假contact point嗰3條契弟，佢哋應該係咁打電話去「撬客」，慢慢打啦！(完）
延伸閱讀 《偷公司銷毀品轉賣 員工堅稱並無犯法》
https://hkofficedaily.com/?p=20581