一個人做幾個人嘅嘢就聽得多，間公司由10個人做1個人嘅嘢包你未見過……起碼我自己真係未遇過！咁真心講句，我都係既得利益者，冇咩好投訴，不過就真係好怪囉，呢篇投稿我都係office hour打，因為太得閒喇，你叫我而家寫本小說出嚟都冇問題。
一切由見工開始講起，當日我嚟呢間公司interview，receptionist側邊個梳化唔計我仲坐咗3個人，有個女仔坐我隔籬一齊填form，見到佢apply個position係同我一樣，咁諗住呢幾個人都係我見工嘅競爭對手啦！吖！唔係呀，最終係全部請晒，當日嚟interview班人全部做晒同事。
透露多少少，間公司中資，香港office都百幾人，多人到呢……我而家過咗試用期，都仲可以有啲同事好生面口，要記晒全部人啲名應該係冇可能㗎喇，經理都幾廿個，唔知邊個打邊個，初初入嚟做梗係唔敢問太多啦，只係一直觀察覺得好多嘢都唔對路，以我個位斜對面個男仔為例，夠膽死冇電腦冇keyboard，張枱係吉嘅。
咩年代呀，返office工張枱冇電腦？喂係呀！個男仔返工頭幾日係齋坐周圍望，而家佢好咗喇，識得帶啲小說返嚟office睇，又真係冇人理佢㗎喎！有時都好想問下佢究竟係做乜，不過大家唔熟之餘，呢個男仔係講普通話，雖然我都講到，但隔咗重紗囉！正常我都係同返香港人傾計。
冇嘢做嘅又唔止呢個男仔，只係佢連電腦都冇就誇張啲啫！其實我都冇嘢做㗎！部門20個人，工作就得少少，講真佢請1至2個人已經夠做，而家20個人點搞？咪打散啲工作囉！早兩日我朝早9點返到，咪咪摩摩一輪再喺個位食早餐，食到10點去廁所再hea下，11點終於有job喇－－－影印一份文件，然後就冇嘢做喇！
我見其他同事又係咁，爭在每個人做嗰part嘢係咩時段㗎啫，我試過問同事有冇嘢幫手，得到嘅答案係：「吓！我都冇嘢做喎，你有冇嘢畀我幫下你吖？」
返咗咁耐工，我未試過有一日係要覆多過兩個email，問你死未？
雖然office面績唔細，但係有成百幾個員工，而且亦keep住有新人加入，有時我會覺得公司係唔夠空間用，例如pantry，再大都好，十個八個一齊斟水沖啡飲嘢嘅場面成日出現，真係擠擁到呢！其實呢間公司都有人離職嘅，不過少囉，追唔上請人嘅速度，而且招聘從未間斷，同有冇人走係無關，我敢講即使冇人resign，呢度都係會一直請人。
你一定會好奇怪，點解有人滿之患，又點解大家都冇嘢做，但係又不斷畀新人加入呢？
呢個問題我問過喇，冇官方答案，只有「民間答案」，佢哋話洗錢喎！雖然我身為小職員永遠唔會知道真相，亦都進入唔到公司「核心範圍」，不過你有對眼觀察，而智力又正常，其實係唔難睇得出。
公司平均隔一至兩星期就有啲「老闆」上嚟，通常係講好北方嘅普通話，聽到負責接待佢哋嘅高層真係乜總物總咁樣稱呼對方，你知上面唔興叫人做陳生張生黃生㗎嘛，永遠係陳總張總黃總。
據聞呢班乜總物總全部係公司嘅大水喉，而其實明眼人都知我哋呢度根本冇錢賺，咁都仲掟錢落嚟投資……唔係洗錢真係諗唔到係咩原因。
另外，公司都申請好多資助同埋政府擔保嘅貸款，我相信請咁多人就係為咗搭雞棚，滿足某啲門檻，從而獲得其他好處，我哋個大老細都係國內人，你當佢開善堂咩！
同事間仲流傳公司有獨門賺錢技巧，就係「搞人落嚟」，呢度有好多人係廣東話都唔識，冇嘢做，耐唔耐先返office一次，完全唔知做緊乜，聽講公司就係幫佢哋申請工作簽證嚟香港，住夠唔知幾多年同埋符合一啲資格之後，呢班人就有權攞到香港身份證。
表面嗰浸係公司每個月出糧畀呢班人，底嗰浸係公司背後收取人工幾倍嘅回報，別人眼中嘅冗員，其實個個都係會生金蛋嘅雞，話唔定張枱冇電腦嗰個男仔就係陳總個仔！
咁當然，我都係冗員，呢度都有唔少香港人，我哋似乎係要幫公司達到某啲條件而請返嚟嘅「工具人」。
所以我一直有種心態係某日會被用完即棄，唔知幾時，但預見到發生嘅時候一定好突然，有晒心理準備㗎喇！所以我有keep住睇求職網，講開呢樣嘢都幾funny，喺呢間公司有唔少同事會返工睇求職網，因為office hour太清閒冇嘢做吖嘛，如果你見到佢搵緊工，呢個同事就一定係操流利廣東話嘅香港人，冇搵工鳩hea嗰班就唔使開聲都知道係國內人。
我份糧而家唔算好高，亦唔係好低，同市價差唔多，所以搵工冇迫切性，不過轉工亦唔可惜，hea有hea好，當然亦有壞處，邊做邊搵囉，你估香港而家經濟好好咩，如果裸辭我都驚要坐幾個月㗎！話咁快2024年已經過咗3分2，年尾失業仲大鑊！
呢度雖然冇乜嘢做，但佢哋好重視你要準時坐喺度，相信最大原因係成日有「投資者」上嚟，公司要有返咁上下疊馬先至見得人，所以我都唔可以下下走咗去，收得你人工識做啦！咪睇下求職網或者做下自己嘢囉，總之你9至6乖乖地坐喺度，唔係棟高隻腳打機或者喺office BBQ就冇人理你（事實上都冇人識你，太多人喇），做住先啦！10個人做1個人嘅嘢係幾爽㗎，我當自己係返工做臨記囉！
【最高1万円放題🎉】老闆出錢 池袋扭蛋夾公仔
