有時喺度諗，如果冇我夾喺下屬同老細中間做傳聲筒角色，年中應該好多同事辭咗職。
我部門有對拖友，佢兩個拍咗四年，office人人都知，早排終於結婚派帖修成正果，咁佢哋要拎婚假，我就循例簽個名，再拎張假紙畀老細批啦，入到房老細同我講：「兩個一齊請？我批一個㗎咋！」
當時心諗，會唔會老細唔知佢兩個係一pair呀？
我：「Stanley同Eunice結婚，佢哋唔係分別同其他人結婚……」雖然口都窒埋，但呢個解釋應該清楚啦！
然後老細一路批假紙一路講：「叫佢哋下次唔好咁樣放喇！點夠人做嘢呀？」
下次？？？
老細唔係奉旨要知邊啲同事搞辦公室戀情，但點講都好，就算有兩個同事分別請婚假你都要批㗎啦！老細唔係第一次㗎喇，曾經有個叫Tony嘅下屬因為老婆生仔而請假，老細批假時問我：「老婆生仔關佢咩事呀？」
言下之意……老細你覺得個仔唔係Tony親生骨肉？好在老細補多句：「佢老婆入產房之嘛，又唔係Tony入產房，啲預產期唔一定準㗎，提早請假做咩啫，一陣早咗或者遲咗又請多日呀？」
哦！原來老細係咁嘅意思，不過都係仆街㗎喇！
唔止我呢邊，上年隔籬部門有個女同事辭職，理由係老公被調去外國分公司，而且唔係短時間，咁女同事嫁夫隨夫咪搬埋去生活囉，老細留佢嘅時候話：「咁離婚咪得囉！」
個女同事冇嬲（表面上），反而拎出嚟同我哋講笑，當然最後都成功辭職啦，佢當老細講笑咋，其實老細真係仆街唔係幽默㗎！