自己喺求職網send CV，feedback的確唔多，難得有一間約我見工，即刻請假第二日去interview，點知嗰間嘢冇一個人係正常。首先佢約9點，其實我覺得有少少早，而且你返到公司都要搞呢搞路準備下，點解唔約鬆啲例如9點半或者10點呢？是但啦，可能佢哋返8:30放17:30啩，又或者HR為咗interview特登早返呢！
約9點見，我早5分鐘上到去，由我踏入佢哋office嗰一刻已經好驚嚇，因為無端端有把女人聲喝柒我，注意返，真係喝柒我：「左腳入嚟先！左腳！我叫你左腳入嚟先呀！」女人把聲又惡又唔耐煩，我成個人呆咗企喺門口，心諗發生咩事？
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
然後個女人又再喝我：「你行返出去！」
當時係8:55，精神狀態都未算好好，加埋事出突然，我下意識照做，然後個女人再一次指示：「行返入嚟吖！左腳入嚟先！唔好用右腳，左腳先呀，抬起腳行啦！」
無端端畀人用咁嘅態度呼喝，我定下神來就開始忟憎，但實在唔知咩事，一度以為係咪有小強定點樣，行咗入嚟之後，嗰位年約50歲嘅女人就問：「你咩事㗎？」
我：「咩事？你哋約我上嚟見工囉！」
女人：「哦，見工，你裝香先吖！」乜柒呀？裝咩香呀？
個女人指住側邊一個神枱，行前幾步抽咗幾支香出嚟，佢真係打算叫我裝香……
我：「我信耶穌㗎喎，我基督教。」
女人：「吓！咁你唔使裝喇，我帶你入會議室啦！」
其實我唔係基督教，但唔會上去你公司無啦啦裝香囉！更加唔會畀你當扯線公仔咁樣舞嚟舞去。
當時仲未過9點，不過女人帶我行入office嘅時候，我見到佢哋成個office都坐滿人，唔似啱啱返工，個個都好似已經開咗工一段時間咁。
入到房，女人出返去，又有另一個比較後生嘅女人入嚟，佢自稱係HR，擺低咗部iPad喺枱，連隨講咗句：「而家set up你同老細interview……」其實重點係呢個女人把口好臭，唔係講嘢mean嗰種，係真係口臭，我忍唔住個身向後移咗一下，究竟佢今朝有冇刷牙？定係成班人開OT未返過屋企所以未刷牙？
好辛苦閉氣捱過，部iPad亦都見到個老細喇，口臭女人出返去。
雖然呢度好怪，第一印象又唔好，不過我請咗半日假嚟interview，都要做埋落去啦，否則呢半日假咪請得好唔抵？
見工過程都係嗰啲啦，只係in咗大約20分鐘之後，驚喜嚟喇……
老細：「Ok，你啲經驗好fit呀，我就係要呢啲！你等我一陣。」鏡頭裡面個老細突然離開，連個視像都停埋，淨低我一個人戇居局坐喺房，咁即係點呀？等個口臭女人返入嚟？定係我走得？
正當我不知所措嗰陣，會議室房門打開，眼前出現頭先同我視像interview個老細，點撚樣呀？你喺同一個office裡面，頭先唔面對面見，視像完覺得啱先至現真身呀？我諗唔明喎！
老細：「我哋繼續吖！」繼咩續啫？你唔一早入房見？
我：「你……點解……我以為你唔喺公司。」
老細：「哦，平時無謂嗰啲我就唔見真人喇，呢個世界咁多病菌，小心啲好，但係你好適合我哋公司，點都要過嚟見一見你，頭先我喺隔籬房之嘛！」
我已經完全畀唔到反應，就算而家投稿，都寫唔到個感受，因為太怪雞喇！而且邏輯好有問題，個求職者啱就等於冇病菌？唔啱就有病菌？咩道理？同埋你喺隔籬房又要玩視像？
老細：「呢個位請咗10年，終於搵到你！」佢忽然好激動。
我：「10年？」
老細：「係呀！呢個位我in咗無數咁多人，呢10年冇in過300都有200人，硬係差咁啲，唯獨係你最fit，你最快可以幾時返工？」
大佬呀，你一個位可以搵人in人搞足10年，先唔理你係咪精神失常，呢份工點睇都惡做啦！佢真係覺得我會take呢個offer……
我：「因為我未辭職，要返去同公司夾下先。」門面推搪嘢啦，呢間公司咁奇怪，我驚即場拒絕會有危險，婉轉啲好。
老細：「啱！所以我話搵咗10年終於搵到你，證明我冇睇錯人，就係鍾意你呢份責任心，好嚟好去吖嘛，你同公司傾下幾時走得，或者你有冇問題想問我？」
其實我冇，但都作狀問下啦：「請問你呢度返幾點放幾點？」條問題係咪好廢？當時我淨係諗到呢啲。
老細：「呢度返9放6，有時都要OT嘅，你最好有心理準備。」
哦，是但啦，反正我都唔會做，不過咪住先……返9？我8:55上到嚟，成個office坐滿人，而且個個嘅樣都好似開咗工成粒鐘咁，你同我講呢度返9點？
屌！費事同佢癲，嗱嗱聲走人，出到門口又見到頭先喝柒我個女人，思疑佢就係receptionist，忍唔住問咗佢一句：「點呀？出去使唔使左腳先呀？」
仲以為佢會feel到我串佢，點知個女人好認真答：「右腳先！你入嚟就左腳先，出去就右腳先！」
Sorry，我唔敢玩嘢，真係右腳踏出去先，全公司冇個正常，我驚搞事會出唔到呢棟大廈，雖然唔太清楚呢間公司啲人嘅底蘊，不過唔重要喇，因為絕對唔會嚟做。
忽然覺得我本身份工好好，起碼老細正常，班同事似返個人，我都係畀心機做嘢先。