呢段投稿應該會好多人鬧，不過我唔介意大家畀意見，因為都想聽下你哋點睇。話說我有個員工叫Leon，其實做嘢方面佢係ok嘅，只係企喺老細角度，佢處理嘅方式同埋面口會令我唔舒服，有時甚至覺得佢係做啲嘢想我內疚。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
有一次我叫Leon搞份report畀我，少少急嘅，星期一講，我想星期三有，但都有交代多句：「如果趕唔切就算，星期五都可以嘅，只係個客星期四朝早機，有得揀梗係想拎住份嘢同佢當面傾，佢走咗就要email再等，你睇自己時間安排啦！」
可能你會話我扮嘢，星期三想要咪講星期三囉，咁樣講即係畀緊壓力員工，唔通Leon夠膽話做唔切，星期三唔交咩？
但其實我都係講出自己諗法，因為我知呢份report係需要時間整合，我嘅出發點並冇咁複雜，亦唔係語言偽術。
咁你估下Leon幾時交份report畀我？答案係星期二，正確嚟講係星期二朝早9:00畀咗我。
我：「點解咁快嘅？你做通宵呀？」
Leon：「唔係，做到今朝7點啫！」
咩唔係啫，做到7點咪即係通宵囉！而Leon嘅語氣又唔係同你對著幹，佢只係冇表情，我寫字唔好，唔知點形容。
我：「既然做好，不如你今日休息下啦，返去瞓下。」
Leon：「唔啦，仲有其他嘢做，我出去做嘢先。」
我唔係虛情假意，真心驚佢唔夠精神，咁樣做法會死人㗎！
近似嘅事情其實發生過好多次，有一次都好誇張，嗰排公司好多project，不過Leon其實早喺兩個月前已經攞咗大假同女朋友去旅行，大家開會嗰陣真係冇畀說話Leon聽，同事們好正常咁呻咗幾句好忙，然後Leon隔日竟然走嚟同我銷假。
我：「痴線㗎！梗係唔好啦，人人都要放假。」
Leon：「咪下次先再放囉！」
我：「你好似買咗機票喎！早排仲見你訂酒店。」
Leon：「取消囉，冇乜所謂，泰國啫，好平，啲嘢加埋都係幾千蚊。」
我：「你唔好啦，雖然我未見過你女朋友，但我都唔想佢憎我哋公司呀！」
總之我勸過好多次，去到Leon本身要放假嗰日，大家又見到Leon出現喺office，有同事問佢點解唔去旅行，Leon就冇語氣冇表情咁同我哋講：「冇咩，唔去咪唔去囉！」
有同事問我係咪迫佢返，又問我Leon係咪唔開心，喂，我點知呀？佢個樣似嬲又唔係嬲，我都想知點解要銷假。
因為公司疫情後生意好咗，我同Leon講：「請返個人幫你吖，而家工作量太大喇！」
Leon冇表情仲要唔望我，但就講咗句：「唔使啦！」
最終我冇理到，照請人，結果Leon又係唔開心，佢嗰種唔開心並非大吵大鬧，而係唔出聲同黑面，工作嘅嘢做足畀你，不過硬係令你覺得好似欠咗佢咁。
後來Leon向我辭職，佢話新請返嚟嗰個人已經做到佢啲嘢，覺得自己唔使留低喎……
難聽啲講句，如果你係女我都可能氹你兩句，我又係麻甩佬，你又係麻甩佬，唔使咁矯情呀？
我冇特別挽留佢，就算我出聲，Leon都一定唔會留低，大家合作咗幾年，好了解佢性格，就好似當時叫佢慢慢做份report，佢唔聽不特止，仲通宵做起第二日畀我，仲有取消同女朋友去旅行件事。
可能喺嗰啲電視劇情節裡面，Leon呢種性格已經上晒位，但現實生活唔係拍戲呀，做到嘢係一件事，相處細節舒唔舒服又係另一件事，兩樣都好重要。
新同事當然冇咁快pick up到Leon嘅工作啦，絕對唔會再有「我想星期三要，結果星期二做起」嘅情況，相反地，呢位新同事係星期五都搞唔掂，要再delay到下星期一先交。
新同事係咁樣同我講：「Sorry呀老細，我仲未搞掂，不如你畀多兩日時間我吖！」
我完全冇嬲，甚至可以話成個人輕鬆咗，效率嘅嘢可以大家互相遷就同埋調節，起碼而家感覺舒服咗先，我唔使成日要覺得內疚，真係好想將呢個經歷分享出嚟，畀打工仔理解下其實老細個心係點諗，做到嘢係重要，但感覺舒服都好重要㗎！(完)
同事被炒後聲稱失憶再返工：「不如話畀外星人捉咗」
https://hkofficedaily.com/?p=15598