假裝上班公司 加錢仲有特別服務

早排新聞話大陸有「假裝上班公司」,收30蚊一日,提供office畀啲失業人士「扮工」,好似話包埋lunch,雖然唔知真定假,但其實同類型嘅service我早兩年已經試過,地點係香港灣仔某商廈,1000蚊一個月,唔包lunch,不過有Wifi同無限飲品,加錢仲有「特別服務」!

講返個典故先,當時我失業,好努力搵工㗎喇,咁你知呢啲唔係自己控制,冇feedback有乜辦法喎!阿爸阿媽又唔體諒,總之見你留喺屋企就覺得你唔搵嘢做,send一份CV出去就等於有一次interview機會咩?我都想日日有工見呀!結果要去Starbucks買杯啡由朝坐到晚,因為失業留喺屋企實在太大壓力喇!

嗰陣有個朋友嘅朋友同人夾份開公司創業,點知租晒office先至反面,其中一方退出唔做,但office租約已簽,聽講係一年生約一年死約,你唔租都要賠,所以朋友個朋友就無奈要繼續用個幾百呎嘅辦公室,佢哋有做生意嘅,只係資金少咗,規模同人手亦相應減半,變相吉咗半個office出嚟。

我講笑咁問可唔可以上去「扮工」,朋友個朋友得悉之後話可以,不過為咗幫補租金支出,要象徵式收返啲「租」,因為個office已經有晒枱枱凳凳,又有Wifi,我覺得合理嘅,租WeWork嗰啲share office都唔平啦,朋友幫我講到1000蚊一個月,咁一個星期平均返5日,每日圍返都係50蚊,我諗都冇諗就即刻應承。

明碼實價最好,無謂欠人情債啦!朋友話唯一嘅唔好處係月租,假設我用咗10日就搵到工,1000蚊係唔會退返畀我,傻啦!如果我真係搵到新工,呢啲錢已經冇咩好計較,你又唔使我簽約,何況未租呢個「空間」之前我已經失緊業,你估搵工真係咁易咩!怕佢哋租約期滿我都仲失緊業咋!

講開又幾好笑,唔知係咪介紹咗我去租嘅緣故,呢位「朋友個朋友」及後亦以同樣手法租畀其他人,全部都係經熟人介紹,冇出廣告公開招租,據我理解劃一收人1000蚊,算有良心啦,有位坐,有Wifi,仲可以任飲佢哋pantry啲咖啡同埋茶包,雪櫃仲有檸檬茶、菊花茶、汽水,只係我好少拎嚟飲,其實有個地方落腳,心態上都好好多,唔使日日好似流浪狗咁樣周圍去。

呢度微波爐都有兩個,我見有人真係拎埋飯盒「扮工」,相信可以慳唔少,最重要係個氣氛唔錯,朋友個朋友間公司啲員工都幾nice,可能大家年齡差唔多啩,好多時lunch time會圍埋一齊食飯傾計,搞到有一刻我都以為自己真係返緊工,呃埋自己咁滯!

前前後後我租咗4個半月先搵到新工,但係靜靜雞話你知,成件事我係賺咗㗎!因為朋友個朋友期間需要請人剪兩條Demo影片,我以前有freelance幫人做剪接,唔算好專業,所以收業餘價,不過剪咗兩條60秒短片嘅費用仲多過我交4個月嘅租金,同埋佢哋好易話為,每條片只係細執咗兩三轉,埋單計數我仲有賺。

後來有個同我一樣租呢度扮返工嘅女仔,忽然提出個好踩界嘅問題:「想請問下呢……呢個要求有啲冒昧,如果唔得就算啦!其實我搵工已經搵咗大半年,之前interview係咁畀人話空窗期太耐,有冇可能搵你哋公司出張reference letter?我出$2000有冇得諗?問下啫,唔得就由佢。」

唔知大家覺唔覺成件事有犯法嘅成份呢?又或者算唔算係虛假文書?但個女仔咁樣提出,的確係衝擊咗我嘅思維,更加估唔到嘅係我朋友個朋友竟然答應:「$2000?Ok!殺你!嗱!唔包reference check,我唔識答,一陣口窒窒盞累咗你。」

個女仔再confirm多句:「真係?Reference letter想要埋公司heading信紙喎,會有公司印㗎呵?」

有幾個人都加$2000要咗呢項「特別服務」,我就……其實有諗過嘅,而且某程度上我都幫過呢間公司做design,但心態上始終驚犯法,搵工啫,有咩事變咗惹官非就唔好啦!好在後來我份新工冇質疑空窗期嘅問題,總算唔使用呢啲招數。

無論認唔認同朋友個朋友幫人出reference letter,我仍然好感謝佢哋提供咗呢個空間畀我,當時唔使留喺屋企面對父母催促搵工嘅壓力,又有個地方同人保持接觸,對我後來搵工有好大幫助,希望佢哋啲生意會愈做愈大,唔使再逐個位租畀人幫補開支啦!

YouTube video
error: