我57，年紀唔細，今日本身想辭職，因為公司嚟咗個新主管，唔夾，做得無癮不如好來好去，辛苦大半世，抖下都唔係好過份啫！
有時啲嘢真係好巧合，我個仔食晏嘅時候打嚟問我借500蚊，原來佢兩個月前被裁，一直唔敢同屋企人講，日日坐連鎖餐廳睇求職網。
如意算盤係搵到份新工就扮冇事，無奈呢段日子連工都冇得見，而家終於頂唔順要講出嚟。
其實我有少少嬲，畀人裁唔係問題，搵工冇回音佢都唔想，我最嬲係25歲仔連500蚊都冇？你究竟點理財？
不過諗深一層，個仔要嘅係諒解同支持，唔係追究同責怪，可能係我哋兩公婆唔覺唔覺畀咗啲壓力佢，所以佢先至選擇失業期間喺街流連。個仔開口問我借500蚊之前，應該思前想後諗咗好耐，冇晒辦法先至向我坦白。
我過咗2,000蚊畀個仔，然後默默咁收埋自己封辭職信。