上星期做咗個interview，我個人覺得真係好經典，因為除咗我之外，仲有兩位部門主管一齊sit in一齊見，去到尾聲嗰陣，我作為HR就循例問呢句：「你有冇問題想問？」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
求職者：「有呀！請問仲會唔會安排second in㗎？如果有？最快幾時收到通知？隔得耐唔耐？」
我：「因為Catherine同Stephen分別係你呢個position嘅Manager同AM（我指住一齊sit in嗰兩個部門主管），所以如果係ok，應該就唔會再有second in，下個step係有決定㗎喇！」
我都解釋得好清楚啦係咪？
求職者：「好，明白。」完了吧，如無意外，偏偏就係呢個時候有意外。
其中一個部門主管Catherine：「請人嘅流程你可以一陣問HR，或者關於我哋部門同埋呢個position嘅問題，你仲有冇嘢唔明？」
求職者：「有呀！想問下工作資源分配係點，仲會唔會提供training？你哋而家用緊嗰套system係咩version？」
我覺得啲問題係問得唔錯，不過呢位求職者係問到好深入，深入到不經不覺已經半個鐘，佢仲一題接一題咁問，結果問到：「上網見到資料呢，公司仲有個大中華office，嗰邊做嘅嘢會唔會重疊㗎？未來啲plan……」
Catherine：「唔好意思，我仲有個會要開，我畀Stephen同埋HR繼續答你，我出出去先。」Catherine醒呀，頭先個interview係半個鐘，而家個求職者問返我哋問題又用咗半個鐘，咁就一個鐘喇，然後Catherine自己走先……
如是者，淨返Stephen同我繼續解答呢位求職者嘅問題，一個不斷問，一個狼狽地回答，咁又45分鐘喇！正當我想打個圓場結束呢次interview，Stephen忽然搶閘講：「唔好意思，我醒起有個email唔記得覆，你有咩想知就問HR啦，我出去覆個email先。」
Stephen直頭搶埋我本身想講嘅對白，結果呢位求職者就開始向我連珠炮發。
求職者：「係呢，你會點樣形容呢間公司嘅文化？我想了解多啲。」
我內心對白：「有鬼文化咩我哋！夠鐘收工，準時出糧咪得囉！」
求職者：「呢個position其實有冇發展或者晉升機會？」
我內心對白：「本來有，我而家唔敢講，驚Catherine同Stephen畀你嚇親……」
未完，呢位求職者啲問題就好似滔滔江水，源源不絕。
求職者：「其實你作為HR，期望啲應徵者具備咩條件呢？有冇話點樣會加分？」
我內心對白：「最緊要唔好太長氣啦，長氣一定減分。」
求職者：「可唔可以講下公司最近面對過咩挑戰？同埋你作為員工覺得公司呢十年八年有咩成就？」
我內心對白：「真係似對方in我，唔係我in緊人……喂喂喂！好似over咗喎！」
唔知點解我覺得呢位求職者係背晒網上嗰啲見工教學，即係當interview畀人問「你有冇問題想問？」應該問啲咩問題令自己加分，我認為佢有少少「讀死書」，胡亂咁問一大堆問題，其實咁樣會弄巧反拙㗎！
我明白大家都對HR嘅印象唔好，不過我仍然想畀啲意見，「你有冇問題想問？」呢一part，我估你出去見工10次，最少有8至9次會畀對方HR咁樣問，冇錯你係應該把握機會，用有經過思考嘅問題去顯示自己嘅積極性，並且令到HR或者負責in你嘅人覺得：「咦，呢個求職者好積極同埋好正面喎！」
如果你嘅問題太多，太不著邊際太空泛，甚至係為問而問，咁樣反而會減分，好似嗰啲「作為員工覺得公司呢十年八年有咩成就？」真係應該咁樣問咩？有成就又點，冇成就又點？（備註一下，佢見嘅position唔係senior亦唔係管理層）
呢位求職者有一條問題係好ok，佢問：「呢個position有冇發展或者晉升機會？」雖然我上面話自己內心對白係本來有，而家唔知有冇（我冇講出口），但只係因為佢「盤問」咗我超過兩粒鐘，足足係我in佢嘅時間4倍，其實問HR「有冇發展或者晉升機會」係合情合理嘅。
咁咩問題係唔合情理或者唔恰當呢？呢位口水多過茶嘅求職者即席示範咗一次，因為Catherine見我兩粒鐘仲未出返嚟，又差唔多到1:00食晏，Catherine終於走返入房營救我。
Catherine：「喂，夠鐘食lunch，老細book咗枱，唔好遲。」
雖然知道老細並冇book枱，但我內心感謝Catherine，連隨接咗句：「哦，好，啱啱in完，而家行。」
我真係以為自己已經畀個求職者「反盤問」完，原來仲未！
求職者：「呀！我仲想問下，呢度附近有邊間餐廳同酒樓好食呀？如果第日喺度返工，多唔多選擇？」
Catherine代我答：「如果之後請咗你，你慢慢發掘有咩好餐廳都唔遲。」
嗱！頭先講唔好胡亂問問題，正正就係講呢種例子喇！
求職者：「咁又係，你哋介唔介意我一齊去呀？」
……
我冇屈佢，佢真係咁問，然後我話老細介意，終於結束咗呢個歷時兩粒鐘嘅interview，第一次in人係覺得咁攰。（完）