我已經3字頭喇，咁大個女點會未見過工，interview question當然答過唔少，嗰啲咩「眼前有5個客，但你得4杯水可以點分」嘅問題都遇過兩次，不過最近呢次我真係搞唔掂，個問題低質到拖垮晒成個interview，我會用爛尾去形容今次嘅見工經歷。
個HR問咩？聽住喇喎，佢當時係咁問：「如果你同時間有另一個更好嘅Offer，仲會唔會揀我哋公司？」嗱，好老實講，佢想聽咩答案，你知我知，單眼佬都知，不過我猶疑咗一秒咁多，心諗你唔係要我咁假下話？我講完你想要嘅答案，肯定又要諗一大爛餐去兜㗎喎！
我：「唔會，如果呢一刻我有更好嘅offer都仲揀你哋，咁咪代表我智力有問題囉！」
係呀，我真係咁答，其實我有另一個answer㗎，就係「冇更好啦！見過幾間都唔請，你係咪畀offer吖？係就一定揀你。」當然啦，我冇講出口，費事佢覺得我冇公司請先至嚟見呢份工。
當時個HR已經黑面㗎喇，咁我有咩錯先？仲有喎，點知你呢個係咪IQ test定陰我呀？即係將來入咗嚟做，然後公司得一批貨，有個客出500萬買，另一個客出600萬買，咁我唔通500萬賣出去呀？梗係為自己同埋為公司爭取最好嘅offer啦！除非係智力有問題㗎啫！
呢份工其實係agency介紹我去in，headhunter知我咁樣答個HR之後，仲打電話嚟責備我：「你咁答咪錯晒囉！見工都係交戲啫！對方咁問係想測試你嘅忠誠度，同埋睇下你有冇遠見，你可以答對方搵工唔一定完全睇offer，仲要睇埋公司架構、行業前景、晉升機會，錢係重要，不過passion同樣重要……」
我連個headhunter都照寸：「嘩！你呢啲model answer上網google大把啦，我明白你想搞掂單deal賺佣金，但係做人使唔使咁假呀？你平時撬啲人轉工都會用更好offer做賣點啦！我係咪要埋沒良心去答問題，成全你間agency做生意先？」
個headhunter聽到我躁躁地，突然又態度軟化，可能之後仲有其他工想介紹我去見啦！佢話自己都好無辜，個HR事後詐型，問佢點解send啲咁寸嘅求職者嚟interview喎！
吓！講真話又唔合心意，呢啲叫寸？唔好成日話強國人玻璃心，其實好多local香港公司都係玻璃心，唔想畀人寸，你不如檢討下啲interview question啦！低質問題想要咩高質答案呀？
不過我知呢個HR嬲啲乜，重點應該係另一句說話，因為個HR尾聲嗰陣循例同我講：「你有冇咩問題想問返我哋？如果冇就返去等消息，我哋仲有其他人要見。」
機會嚟喇飛雲，你畀位我入㗎咋！
我：「有！我想問下呢，你話有其他人要見吖嘛，咁如果有更好嘅求職者，你仲會唔會出offer畀我？」
個HR知我玩嘢，黑住面話要睇情況……喂！搞錯呀！頭先你問我有更好offer仲會唔會揀你哋公司，假設我答要睇情況，你對呢個答案都唔會收貨啦！哦，你問埋啲低質假設性問題就得，人哋問返同一樣嘢就黑晒面，即係公你贏，字我輸啫！
我冇咄咄逼人㗎，純粹係執個尾彩，希望佢唔好再向下一個求職者問埋啲咁白痴嘅問題啦！見份文職啫，唔係考藝員訓練班，唔使背埋啲model answer當劇本好似對戲咁嘅。
其實我想問下，將來見工再遇到呢啲問題，會唔會有更好嘅答法呢？如果呢篇投稿有幸登出嚟，我都想聽多啲人意見，例如其他人會點樣答？真係要好似個headhunter咁教，話要睇咩前景同passion？我真心講唔出喎！同埋我最後咁樣反問個HR，係咪太臭寸呢？