收到份resume都幾癲！
呢位求職者喺resume第二版寫咗自己識嘅language，睇到嗰陣簡直眼前一亮，除咗Cantonese, Mandarin同English之外，佢仲識法文、德文、日文，同埋阿拉伯語，七國語言堅喎！
咁我又睇返佢第一版啦！Education第一行係香港中文大學，掂晒，執到份超強CV！望多眼發覺唔對路，佢個「香港中文大學」就同其他內容一樣，我估字體尺寸係Font Size 14左右啦，同平時我哋啲email差唔多，但留意到有一行細字喺「香港中文大學」下面，個Font Size縮到最細，寫住「打算明年報讀」……打算？即係讀咗未？
個感覺有少少似咩呢，有時去買嘢咪會有啲舖頭大大隻字寫住「全場$50」，然後鬼鬼祟祟有個「起」字用最細最幼字體嘅，個feel就係咁喇，所以全句應該係「全場$50 起」，而你入到去會發現$50蚊嘅嘢並唔多，因為個「起」字係無敵㗎嘛，仲要寫到咁細隻！
我又再睇返佢resume嘅第二版，發現佢話自己識法文嘅下面，有一行好細嘅字體寫住「預計今年6月上課」，德文下面都一樣，有行特別細嘅字寫住「即將報讀」，而日文同阿拉伯語下面就分別用超細字體寫住「下月報讀工聯會」……
好耐冇收過啲咁搞鬼嘅CV，所以決定打去問清楚，唔係想寸佢呀，我係驚自己誤解咗佢咋！結果打去問下啦，原來法文、德文、日文，同埋阿拉伯語全部都未讀！
我：「咁香港中文大學呢？」
「我plan緊今年會報個高等文憑兼讀課程，仲諗緊讀邊一科。」
我：「即係你未讀過中大？咁樣寫落resume唔係太好喎！」
「我會讀㗎！決定咗今年報㗎喇！」
坦白講，呢份resume係吸睛嘅，不過好取巧，就當第二間公司嘅HR睇唔到然後叫你interview，最後階段都會出現問題，我覺得真係讀咗先打落resume啦！否則我話自己係「最受歡迎女歌手」都得㗎……再下面set最細字體寫住「準備學唱歌」！