「同大家介紹下先，呢位係Joshua，佢係我哋嘅Regional Manager，同事將來有咩疑問都可以搵Joshua幫忙。」老細帶住個男人出嚟介紹，同事們個個面帶微笑，逐一同呢位新任Regional Manager握手，不過我真係笑唔出，因為Joshua係我舊上司，我哋喺前公司鬧得好唔愉快。
當Joshua行到埋嚟握手時，我已經收拾起自己錯愕嘅表情，以官方禮貌式笑容同佢講：「好耐冇見。」而Joshua亦「咦」咗一聲，隨即伴以微笑同返我講：「喺度做？好耐冇見，下星期搵一日同你食晏。」我當然答好啦！身邊同事亦察覺到，我同呢位新任Regional Manager原來係認識。
後來同事問我點識，我唔介意分享呢單10年前嘅事。
10年前喺舊公司，我就係跟Joshua，佢係一個工作狂上司，份人好demanding，對自己同埋下屬嘅要求都好高，其實有好有唔好，跟咗佢一年的確學到好多嘢，但亦都好辛苦，加上當時只係人生第一份正職，我嗰陣24歲咋！
未定性嘅我當年經常遲到，做嘢亦甩漏，呢點我承認，因為會有種心態係東家唔打可以打西家，而10年前嘅Joshua亦只係一位普通Department Head，佢成日鬧我冇交帶同埋唔上心，24歲嘅我又點會接受到批評呀？畀人鬧梗係唔順氣啦！所以咪成日互相頂撞囉！
Joshua鬧我嘅嘢係啱，不過佢有時會當住其他同事面前話我，結果我忍唔住向隔籬部門一位Team Head「求助」，希望可以內部調組，唔想再跟Joshua，而家諗返係好天真，人哋個Team Head點解要為我呢種小角色得罪Joshua呢？何況我遲到甩漏真係有眼睇，唔通人哋又想擺我呢個計時炸彈入自己部門咩！
當中好多細節唔記得太清楚喇，印象中我最後頂唔順Joshua嗰種demanding，遞信辭職再做咗一件好爆嘅事，就係繞過晒所有人直接入房搵老細投訴，可能你會問：「自己遲到又做錯嘢都有得投訴個上司？」係呀，我都唔知點解，所以咪同老細講Joshua針對我、lunch time都搵我做嘢、當眾鬧我……全部都係雞毛蒜皮嘅小事，而家諗返當然知道冇point啦，細個就係乜都夠膽死，做嘢唔經大腦。
打工仔當然唔鍾意個上司苛刻，我又點會諗其實老細不知幾鍾意呢種人，結果我走咗之後再向舊同事打聽，舊老細似乎冇責怪Joshua，隔咗排Joshua仲升埋職，我一直諗個老細會唔會同Joshua講我煮咗佢一鑊……基本上我喺每個人面前都講過Joshua壞話，除咗IT同會計呢兩個部門之外，我幾乎搵晒舊公司所有department表達自己希望轉組，所以好多人都知我同Joshua唔啱。
不知天高地厚嘅我，後來仲轉過兩三份工，遇到苛刻過Joshua嘅上司，亦遇過比下屬更hea嘅上司，有冇人好似我咁，轉過工先知原來舊公司並唔係咁差呢？做人真係有比較先識得分高低，無論點都好，過去嘅事已經過去，踏入三字頭嘅我終於成熟咗啲，而家會坐定定做一份工喇！
遲到？唔會啦！唔係刻意去改，只係人大咗就會慢慢轉變，責任感亦愈嚟愈大，我喺目前呢間公司做咗5年半，升咗做一個部門嘅Assistant Manager，34歲嘅我派張卡片出去終於有個見得人嘅title，以前係畀人管，而家我都要幫手管人。
有時真係要做到嗰個位置先會明白，平時睇住班細嘅做嘢冇交帶，我終於知自己當年有幾乞人憎。我三十幾喇，喺一間公司見到有前景，當然想穩定發展啦！然後有啲新人就唔志在份工，佢哋嘅態度係：「遲到咪遲到囉！唔返咪唔返囉！扣假扣人工咪得囉！咩事呀？」
係嘅，每個人都有權利去「型」，不過佢哋忘記咗自己「型」嘅同時會影響到其他人，我喺呢班廿幾歲嘅人身上睇到以前嘅自己。
10年前Joshua已經係我Manager，10年後我做咗部門裡面一個小小嘅Assistant Manager，Joshua份人做嘢咁進取，而家搖身一變跳槽入嚟我公司做Regional Manager係好合理。
喺新公司遇見舊上司，呢件事我有同朋友講，佢哋覺得世界好細，咁都撞得返好橋，其實世界唔細，係行頭細（窄），某啲行業喺香港表面上有好多公司，不過一線嗰堆永遠係嗰幾間，除非你回塘降格去做細公司，否則喺同一個行業撞返舊上司舊同事並唔係罕見嘅事，終於明點解有種講法係「好嚟好去」。
講就輕鬆，但我喺而家公司撞返Joshua都係尷尷尬尬，人哋仲要係Regional Manager，而家唔係我上司喇，係我上司個上司個上司。
世界細，office當然更加細，某日喺pantry斟水就撞正Joshua，無可避免要寒暄幾句，我亦好直接咁同佢講咗聲對唔住：「Hello Joshua，又見返你，一直好想同你講聲sorry，以前啱啱出嚟做嘢……」
Joshua笑住打斷我：「傻啦！衰嘢唔好提，男人老狗好肉麻㗎！你喺度做咗幾耐？」
我：「5年喇！」
Joshua：「咁咪好囉！而家穩穩定定，結咗婚未呀？」
我：「之前趁疫情結咗，嗰陣唔使擺酒，慳好多！」
Joshua：「哈哈！大個仔喇喎！識計數，有小朋友未呀？」
我：「有呀！兩歲喇！」
Joshua：「我今個星期啱啱返，要同好多人食飯，下星期得閒啲，到時食個lunch！」
我：「好呀！」
一個星期之後，Joshua冇同我食lunch，但我收到大信封……
頂頭上司畀信我嘅時候係咁講：「個Regional Manager同你真係好大仇口，新官上任第一個就雞咗你，我盡晒力，幫你問咗個friend，佢公司要人，你有需要話我知，同你搭線。」
成熟男人真係唔同啲，做人處事乾淨俐落，Joshua上星期仲笑笑口話前事不計約食lunch，轉個頭就直接叫公司炒我，其實講乜都冇用，佢有權力去郁任何人，老細請Joshua返嚟其中一個任務就係幫公司開源節流，呢次賠償佢畀足我，所以死纏爛打係冇用。
諗返Joshua問我結咗婚同埋有小朋友未，應該係有啲弦外之音，出得嚟行，預咗要還，仔細老婆嫩，我都係將心機時間拎去搵新工先。