好不容易搵到份工，但我做唔夠一個月就走咗，因為有次喺pantry同隔籬部門個男同事傾計，我直屬上司入嚟沖咖啡見到，同日臨放工前走嚟同我講：「你唔好同啲男人玩到咁埋啦！保持距離呀！」
因為我係新人，又冇諗過上司會咁講，當時真係唔識畀反應，究竟佢唔想我同嗰位男同事傾計吖，定係唔想我同隔籬部門啲人玩呢？
後來又有一次，又係pantry，叮完飯有男同事同我傾咗幾句（唔係上次嗰位），我都唔知上司係幾時見到，同日又畀佢嗌入房訓話，內容都係叫我唔好同公司其他男人熟，唔好同佢哋玩。
雖然入嚟做嘅時候已經知我部門係全女班，連埋我有5個女仔，但後來諗清楚，全女班應該係上司刻意唔請男仔。我問過自己department另一位女同事，佢淨係簡單答我：「係呀，佢唔鍾意我哋同其他男同事熟㗎！你自己避忌下啦！」呢樣我知，我係問原因呀，個女同事基本上冇答到我。
同樣嘅事情發生第三次，其實office有幾大吖，男女同事撞口撞面傾兩句有咩出奇？然後我又畀上司話咗一輪。
「咪叫咗你唔好同其他男人熟囉，講咗好多次啦！成日見你同佢哋傾計，有咩好傾呀？」
我答返佢：「其實係咩問題？你叫我唔好同其他男同事傾計，但你自己咪就係男人囉！」
我上司係一個50幾歲嘅男人，佢成日叫我唔好同其他男人熟，唔好同其他男人玩，唔好同其他男人傾計，但佢自己咪係男人囉！
我冇再深究喇，一來成日畀人話已經唔高興，二來你係男人，不過你唔畀我同男人傾計，我男朋友都冇咁樣管我啦！結果我話唔做，呢位上司應該覺得我唔聽話，留都冇留就直接就畀我走。
而家諗返轉頭，同部門嗰幾條女都有啲怪，除咗必要嘅公事之外，佢哋真係冇同其他男同事講嘢，個上司係男人但唔畀佢哋同男人傾計，勁奇怪！